अमरावती जिल्ह्यातील ग्रामीण भागात आता स्वच्छतेचा नवा पॅटर्न पाहायला मिळणार आहे. जिल्हा परिषद, अमरावती अंतर्गत १५ व्या वित्त आयोगाच्या निधीतून जिल्ह्यातील २६ ग्रामपंचायतींना घनकचरा व्यवस्थापनासाठी अत्याधुनिक बॅटरी ऑपरेटेड ई-रिक्षांचे (घंटागाड्या) वाटप करण्यात आले आहे. या उपक्रमामुळे ग्रामीण स्वच्छता व्यवस्थेला मोठी बळकटी मिळणार आहे.
पालकमंत्री चंद्रशेखर बावनकुळे यांच्या हस्ते शुभारंभ
जिल्हा परिषद येथे आयोजित एका विशेष कार्यक्रमात महसूल तथा पालकमंत्री चंद्रशेखर बावनकुळे यांच्या हस्ते या ई-वाहनांना हिरवी झेंडी दाखवून लोकार्पण करण्यात आले. यावेळी जिल्ह्यातील विविध लोकप्रतिनिधी आणि वरिष्ठ अधिकारी उपस्थित होते. या उपक्रमामुळे ग्रामपंचायतींना कचरा संकलनासाठी आता डिझेलवर अवलंबून राहावे लागणार नाही.
अमरावती जिल्ह्यात राबविल्या जाणाऱ्या विविध विकासकामांचा आढावा घेतला जात असतानाच, दुसरीकडे अमरावतीच्या वडाळी तलावाचा चेहरामोहरा बदलणार असून शहरासोबतच ग्रामीण भागाच्या विकासावरही भर दिला जात आहे.
पर्यावरणपूरक आणि आर्थिक बचत करणारी यंत्रणा
ग्रामीण भागात घराघरातून कचरा संकलन करणे, त्याचे योग्य वर्गीकरण करणे आणि शास्त्रोक्त पद्धतीने विल्हेवाट लावणे या प्रक्रियेला आता वेग येणार आहे. पारंपारिक डिझेल वाहनांच्या तुलनेत ही ई-वाहने पूर्णपणे पर्यावरणपूरक आहेत. यामुळे इंधन खर्चात मोठी बचत होणार असून पर्यावरणाचे संवर्धन होण्यासही मदत होईल.
ग्रामीण भागातील पायाभूत सुविधांच्या विकासाबाबत बोलताना, शासनाकडून मुख्यमंत्री बळीराजा शेत पाणंद रस्ते योजना देखील प्रभावीपणे राबवली जात आहे, जेणेकरून शेतकऱ्यांना शेतात येण्या-जाण्यासाठी सुलभता निर्माण होईल.
७८ लाख रुपयांच्या निधीतून वाहन वाटप
पंचायत विभागाच्या प्रशासकीय मान्यतेने ही वाहने उपलब्ध करून देण्यात आली आहेत. एका ई-रिक्षाची किंमत साधारण ३ लाख रुपये असून, एकूण २६ वाहनांसाठी १५ व्या वित्त आयोगातून ७८ लाख रुपयांचा निधी खर्च करण्यात आला आहे. ही वाहने लवकरच संबंधित ग्रामपंचायतींच्या ताब्यात दिली जाणार आहेत, ज्यामुळे ‘स्वच्छ भारत मिशन’ अंतर्गत गावे अधिक सुंदर आणि आरोग्यदायी होण्यास मदत होईल.
या २६ ग्रामपंचायतींचा होणार फायदा:
- अमरावती तालुका: ब्राम्हणवाडा गोविंदपूर, लोणटेक.
- अचलपूर तालुका: वडगाव फत्तेपूर, रासेगाव.
- अंजनगाव सुर्जी: टाकरखेडा मोरे, खानमपूर पांढरी.
- भातकुली: आसरा, टाकरखेडा शंभू.
- चांदूर बाजार: कुर्हा.
- दर्यापूर: पिंपलोद, थिलोरी.
- मोर्शी: शिरखेड, खानापूर.
- तिवसा: शिरजगाव मो.
- वरुड: हातुर्णा, शहापूर.
- धारणी: हरिसाल, कुसुमकोट बु.
- चिखलदरा: टेंभूसोडा, काटकुंभ.
- इतर: आमला, कवठा कडू, वाढोणा रामनाथ, धानोरा गुरव, अंजनसिंगी, वडगाव राजदी.