मुंबई: भारत आणि व्हिएतनाम यांच्यातील द्विपक्षीय संबंध अधिक दृढ करण्याच्या दृष्टीने एक पाऊल पुढे पडले आहे. व्हिएतनाम समाजवादी प्रजासत्ताकाचे राष्ट्राध्यक्ष आणि महासचिव तो लाम यांचे आज मुंबईत आगमन झाले. छत्रपती शिवाजी महाराज आंतरराष्ट्रीय विमानतळावर महाराष्ट्राचे राज्यपाल जिष्णु देव वर्मा यांनी त्यांचे पुष्पगुच्छ देऊन भव्य स्वागत केले.
या ऐतिहासिक दौऱ्यादरम्यान विमानतळावर राजशिष्टाचार मंत्री जयकुमार रावल, मुख्य सचिव राजेश अग्रवाल, पोलीस महासंचालक सदानंद दाते, मुंबई पोलीस आयुक्त देवेन भारती, मुंबई शहर जिल्हाधिकारी आँचल गोयल यांच्यासह अनेक वरिष्ठ प्रशासकीय अधिकारी उपस्थित होते.
राज्यातील गुंतवणुकीला मिळणार चालना
व्हिएतनामचे राष्ट्राध्यक्ष आपल्या या एक दिवसीय मुंबई दौऱ्यात राज्यातील महत्त्वाच्या उद्योजकांशी संवाद साधणार आहेत. या भेटीमुळे भारत-व्हिएतनाम मैत्रीचे नवे पर्व सुरू होणार असून, महाराष्ट्रात तंत्रज्ञान आणि व्यापार क्षेत्रात मोठ्या प्रमाणावर गुंतवणूक येण्याची शक्यता वर्तवण्यात येत आहे.
आपल्या व्यस्त वेळापत्रकात राष्ट्राध्यक्ष तो लाम हे मुंबईतील आर्थिक केंद्रांनाही भेट देणार आहेत. या दौऱ्यातील व्हिएतनामचे राष्ट्राध्यक्ष तो लाम यांची NSE ला ऐतिहासिक भेट दोन्ही देशांमधील शेअर बाजार आणि आर्थिक देवाणघेवाणीसाठी अत्यंत महत्त्वाची मानली जात आहे.
लोकभवन येथे विशेष स्वागत समारंभ
आज संध्याकाळी राज्यपाल जिष्णु देव वर्मा यांनी व्हिएतनामच्या राष्ट्राध्यक्षांच्या आणि त्यांच्या उच्चस्तरीय शिष्टमंडळाच्या सन्मानार्थ ‘लोकभवन’ येथे एका विशेष स्नेहभोजनाचे आणि स्वागत समारोहाचे आयोजन केले आहे. या कार्यक्रमात राज्याच्या विकासावर आणि परस्पर सहकार्यावर चर्चा होण्याची शक्यता आहे. आपला नियोजित कार्यक्रम आटोपून राष्ट्राध्यक्ष आज रात्रीच मुंबईहून मायदेशी प्रस्थान करतील.