सांगली: जत तालुक्याच्या विकासाला गती देण्यासाठी आणि प्रशासकीय कामकाज अधिक सुलभ करण्यासाठी जत येथे १५ कोटी रुपये खर्चून पंचायत समितीची नवीन प्रशासकीय इमारत उभारण्यात येत आहे. या भव्य इमारतीमुळे जत शहराच्या वैभवात मोठी भर पडणार असून, सर्वसामान्य नागरिकांना एकाच छताखाली उत्तम सुविधा मिळतील, अशी ग्वाही ग्रामविकास व पंचायतराज मंत्री जयकुमार गोरे यांनी दिली.
जत येथे पंचायत समितीच्या नूतन प्रशासकीय इमारतीचा भूमिपूजन समारंभ मंत्री गोरे यांच्या हस्ते उत्साहात संपन्न झाला. यावेळी आमदार सदाभाऊ खोत, आमदार गोपीचंद पडळकर, जतचे नगराध्यक्ष डॉ. रविंद्र आरळी यांच्यासह अनेक मान्यवर उपस्थित होते.
प्रशासकीय इमारतीमुळे कामाला मिळणार गती
मंत्री जयकुमार गोरे म्हणाले की, या नवीन इमारतीमध्ये आधुनिक फर्निचर आणि आवश्यक त्या सर्व सोयीसुविधा उपलब्ध करून देण्यासाठी शासन कटिबद्ध आहे. यामुळे केवळ अधिकारी आणि कर्मचाऱ्यांना काम करणे सोयीचे होणार नाही, तर कामासाठी येणाऱ्या ग्रामीण भागातील जनतेचा वेळही वाचणार आहे. जत तालुक्याच्या सर्वांगीण विकासासाठी निधीची कमतरता भासू दिली जाणार नाही, असेही त्यांनी यावेळी स्पष्ट केले.
ग्रामीण भागातील पायाभूत सुविधांबाबत बोलताना त्यांनी नमूद केले की, ग्रामपंचायतींचा कायापालट करण्यासाठी सरकार विविध योजना राबवत आहे.
देवस्थान विकास आणि रस्त्यांच्या जाळ्यासाठी मोठा निधी
जत तालुक्यातील धार्मिक पर्यटनाला चालना देण्यासाठी ग्रामविकास विभागाने ऐतिहासिक निर्णय घेतला आहे. तालुक्यातील ८ महत्त्वाच्या देवस्थानांना ‘ब’ वर्ग दर्जा देण्यात आला असून, प्रत्येक देवस्थानच्या विकासासाठी ५ कोटी याप्रमाणे एकूण ४० कोटी रुपयांचा निधी मंजूर करण्यात आला आहे.
रस्त्यांच्या कामाबाबत माहिती देताना मंत्री महोदय म्हणाले की, तालुक्यातील ग्रामीण रस्त्यांच्या सक्षमीकरणासाठी ७५ कोटी रुपयांचा निधी दिला जाणार आहे. विशेषतः शेतात जाणाऱ्या रस्त्यांसाठी मुख्यमंत्री बळीराजा शेत पाणंद रस्ते योजना प्रभावीपणे राबवून दळणवळणाचा प्रश्न सोडवला जाईल. तसेच, ज्या गावांमध्ये स्मशानभूमीची सोय नाही, त्यांनी प्रस्ताव सादर केल्यास तातडीने निधी उपलब्ध करून दिला जाईल.
आमदार गोपीचंद पडळकर यांचा विश्वास
यावेळी आमदार गोपीचंद पडळकर यांनी जत तालुक्याच्या प्रगतीचा संकल्प बोलून दाखवला. ते म्हणाले की, पंचायत समितीच्या इमारतीसोबतच गोरगरिबांना घरकुल, सोलर पॅनेल, क्रीडांगण विकास, जिल्हा परिषद शाळांची दुरुस्ती आणि शेतीसाठी स्वच्छ पाणी यांसारखी कामे प्राधान्याने पूर्ण केली जातील. या भागाचा चेहरामोहरा बदलण्यासाठी शासन सर्वतोपरी प्रयत्न करत असल्याचे त्यांनी सांगितले.
कार्यक्रमाच्या सुरुवातीला जत पंचायत समितीच्या नूतन इमारतीची कोनशिला अनावरण करण्यात आली. जिल्हा परिषद शाळा रामपूरच्या विद्यार्थिनींनी स्वागतगीत सादर केले. तसेच आवास योजनेत उत्कृष्ट कार्य केल्याबद्दल जिल्हा परिषदेचे अतिरिक्त मुख्य कार्यकारी अधिकारी मनोज जाधव यांचा विशेष सत्कार करण्यात आला.
या सोहळ्याला जत तालुक्यातील ग्रामपंचायत पदाधिकारी, विविध विभागांचे अधिकारी आणि नागरिक मोठ्या संख्येने उपस्थित होते.