मुंबई: तंत्रज्ञानाचा वापर करून आयकर भरण्याची प्रक्रिया सुलभ करणे, पारदर्शकता वाढवणे आणि करदात्यांचा विश्वास संपादन करत स्वतःला ‘जनस्नेही’ संस्थेत रूपांतरित केल्याबद्दल महाराष्ट्राचे राज्यपाल जिष्णु देव वर्मा यांनी आयकर विभागाचे विशेष कौतुक केले आहे. “एकेकाळी ‘भीतीदायक’ म्हणून ओळखला जाणारा आयकर विभाग आज खऱ्या अर्थाने नागरिकांचा ‘जनस्नेही मित्र’ बनला आहे,” अशा शब्दांत राज्यपालांनी विभागाच्या कामगिरीचा गौरव केला.
आयकर विभागाच्या १६७ व्या स्थापना दिनानिमित्त मुंबईतील वांद्रे-कुर्ला संकुल (BKC) येथील ‘कौटिल्य भवन’ येथे एका विशेष कार्यक्रमाचे आयोजन करण्यात आले होते. या सोहळ्याला राज्यपाल जिष्णु देव वर्मा मुख्य अतिथी म्हणून उपस्थित होते.
देशाच्या प्रगतीत अन् ५ ट्रिलियन डॉलरच्या अर्थव्यवस्थेत आयकर विभागाचे योगदान
भारताला ५ ट्रिलियन डॉलर्सची अर्थव्यवस्था बनवण्याचे स्वप्न साकार होत असताना यामध्ये प्रत्यक्ष कर संकलनाचा आणि आयकर विभागाचा वाटा अत्यंत मोलाचा आहे, असे राज्यपालांनी नमूद केले. कररूपाने गोळा होणाऱ्या महसुलातूनच देशात सार्वजनिक शाळा, रुग्णालये, रस्ते, महामार्ग आणि विविध जनकल्याणकारी योजना राबवणे शक्य होते.
देशातील एकूण प्रत्यक्ष कर संकलनात महाराष्ट्राचा सर्वाधिक वाटा आहे. यावरून मुंबईने देशाची आर्थिक राजधानी म्हणून आपले अव्वल स्थान कायम राखल्याचे सिद्ध होते, असेही ते म्हणाले. राज्यपालांच्या विकासोन्मुख दृष्टिकोनाबाबत अधिक माहितीसाठी तुम्ही आदिवासी उत्पादनांना शाश्वत बाजारपेठ व रोजगार: राज्यपाल जिष्णु देव वर्मा यांचे क्लस्टर विकासाचे निर्देश ही बातमी वाचू शकता.
पा पायाभूत सुविधा आणि विकास प्रकल्पांना गती
करदात्यांनी दिलेल्या कराच्या जोरावरच आज मुंबईत मोठे पायाभूत प्रकल्प उभारले जात आहेत. राज्यपालांनी आपल्या भाषणात मुंबई मेट्रो, कोस्टल रोड प्रकल्प, मुंबई ट्रान्स हार्बर लिंक (MTHL) आणि मुंबई-अहमदाबाद बुलेट ट्रेन यांसारख्या महत्त्वाकांक्षी प्रकल्पांचा उल्लेख केला.
हे प्रकल्प केवळ वाहतूक सुलभ करत नसून राज्याला आर्थिक प्रगतीकडे घेऊन जात आहेत. सध्या राज्य शासन आर्थिक विकासाला मोठा वेग देत असून, या संदर्भात महाराष्ट्राची $1 ट्रिलियन अर्थव्यवस्थेकडे महाझेप! या करारांविषयीची माहिती नक्की पाहा.
ऑनलाइन अन्न मागवण्याइतके सोपे झाले आयकर विवरणपत्र भरणे!
कार्यक्रम प्रसंगी बोलताना मुंबईचे प्रधान मुख्य आयकर आयुक्त आलोक कुमार यांनी विभागाच्या डिजिटल क्रांतीवर प्रकाश टाकला. ते म्हणाले, “पूर्वी आयकर विवरणपत्र (ITR) प्रक्रिया पूर्ण होण्यासाठी तब्बल ८२ दिवस लागायचे, मात्र आज नवीन तंत्रज्ञानामुळे ही प्रक्रिया अवघ्या काही दिवसांत पार पडते. इतकेच नव्हे तर कर परतावा (रिफंड) देखील अत्यंत वेगाने थेट खात्यात जमा होतो.” आता आयकर भरणे हे ऑनलाइन जेवण मागवण्याइतके सुलभ आणि सोपे झाले असल्याचे त्यांनी स्पष्ट केले.
अभिनेता विकी कौशलची विशेष उपस्थिती
या आयकर दिन सोहळ्याला बॉलिवूड अभिनेता विकी कौशल यानेही हजेरी लावली होती. आयकर विभागाच्या या सोहळ्यात सहभागी होता आल्याबद्दल त्याने आनंद व्यक्त केला आणि विभागाला १६७ व्या स्थापना दिनानिमित्त मनापासून शुभेच्छा दिल्या.
अग्रीम कर (Advance Tax) हे सामाजिक उत्तरदायित्व
देशाच्या विकासाची गती कायम ठेवण्यासाठी प्रत्येक पात्र नागरिकाने वेळेवर आणि योग्य कर भरणे आवश्यक आहे. ‘अग्रीम कर’ (Advance Tax) हा केवळ कायदेशीर नियम नसून देशाच्या प्रगतीसाठीचे एक महत्त्वाचे सामाजिक उत्तरदायित्व आहे, असे सांगत राज्यपालांनी नागरिकांना नियमित कर भरण्याचे आवाहन केले.