मुंबई: जागतिक अर्थव्यवस्थेतील भारताचे वाढते आर्थिक सामर्थ्य, नाविन्यता आणि महत्त्वपूर्ण भूमिका खरोखरच कौतुकास्पद आहे, असे गौरवोद्गार सायप्रस प्रजासत्ताकचे राष्ट्राध्यक्ष निकोस क्रिस्टोडोलाइड्स यांनी काढले. सायप्रस आणि भारतामधील आर्थिक आणि धोरणात्मक संबंध आता एका अत्यंत महत्त्वाच्या टप्प्यावर पोहोचले आहेत, असा विश्वासही त्यांनी यावेळी व्यक्त केला.
मुंबईतील बांद्रा कुर्ला कॉम्प्लेक्स (BKC) येथील नॅशनल स्टॉक एक्सचेंज (NSE) मध्ये आयोजित एका विशेष कार्यक्रमात ते बोलत होते. या विशेष प्रसंगी राष्ट्रपती निकोस क्रिस्टोडोलाइड्स यांच्या हस्ते एनएसई येथे पारंपारिक पद्धतीने ‘घंटानाद’ (Bell Ringing Ceremony) करण्यात आला. यावेळी व्यासपीठावर राष्ट्रीय शेअर बाजाराचे अध्यक्ष श्रीनिवास इंजेटी आणि व्यवस्थापकीय संचालक आशिष कुमार चौहान उपस्थित होते.
भारत आणि सायप्रस दरम्यान मजबूत व्यापारी संबंध
सायप्रस हा युरोपीय महासंघ (EU) आणि युरोझोनचा एक अत्यंत महत्त्वाचा सदस्य देश असून सध्या सायप्रसकडे युरोपीय महासंघाच्या परिषदेचे अध्यक्षपद आहे. या अध्यक्षपदाच्या कार्यकाळात सायप्रसने भारत आणि युरोपीय महासंघ यांच्यातील व्यावसायिक व राजनैतिक संबंध अधिक दृढ करण्याला सर्वोच्च प्राधान्य दिले आहे. सायप्रस हा भारत, युरोप, पूर्व भूमध्य समुद्र आणि मध्य पूर्व देशांना जोडणारा एक नैसर्गिक दुवा म्हणून कार्यरत आहे.
नुकतेच मुंबईतील एका परिषदेत महाराष्ट्राचे उपमुख्यमंत्री देवेंद्र फडणवीस यांनीही या संबंधांवर भाष्य केले होते. भारत-सायप्रस आर्थिक भागीदारीसाठी पुढील दशक महत्त्वाचे ठरणार असून मुंबईत लवकरच ‘सायप्रस ट्रेड सेंटर’ सुरू होणार असल्याचे त्यांनी सांगितले होते.
द्विपक्षीय गुंतवणूक आणि तंत्रज्ञानावर भर
पंतप्रधान नरेंद्र मोदी यांच्या मागील वर्षाच्या सायप्रस भेटीचा संदर्भ देत राष्ट्राध्यक्ष क्रिस्टोडोलाइड्स म्हणाले की, सध्या सुरू असलेल्या द्विपक्षीय दौऱ्याचा मुख्य उद्देश दोन्ही देशांमधील वित्तीय सेवा, तंत्रज्ञान, नाविन्यता (Innovation), शिपिंग, कनेक्टिव्हिटी आणि ऊर्जा क्षेत्रात मजबूत संबंध प्रस्थापित करणे हा आहे. यामुळे दोन्ही बाजूंनी मोठ्या गुंतवणुकीला चालना मिळेल.
पंतप्रधान मोदींच्या सायप्रस भेटीदरम्यान ‘सायप्रस स्टॉक एक्स्चेंज’ आणि ‘एनएसई इंटरनॅशनल एक्स्चेंज’ यांच्यात एका महत्त्वापूर्ण सामंजस्य करारावर (MoU) स्वाक्षरी झाली होती. हा करार दोन्ही देशांतील आर्थिक व वित्तीय व्यवस्थांना अधिक सुलभ करणारा आणि गुंतवणुकीचे नवे मार्ग खुले करणारा ठरला आहे.
२ अब्ज लोकांची अथांग बाजारपेठ
भारत ही आजच्या घडीला जगातील सर्वात गतिमान आणि वेगाने वाढणारी अर्थव्यवस्था आहे, तर दुसरीकडे युरोप ही जगातील सर्वात मोठी आणि स्थिर बाजारपेठ मानली जाते. जेव्हा जगातील या दोन बलाढ्य लोकशाही व्यवस्था एकत्र येतात, तेव्हा सुमारे २ अब्ज लोकांची एक अथांग आणि विशाल बाजारपेठ तयार होते. या ऐतिहासिक भागीदारीमुळे भविष्यात दोन्ही देशांसाठी प्रगतीच्या अनंत संधी खुल्या होतील, असा विश्वास राष्ट्राध्यक्ष निकोस क्रिस्टोडोलाइड्स यांनी व्यक्त केला.
कार्यक्रमाची सुरुवात दोन्ही देशांच्या राष्ट्रगीताने झाली. राष्ट्रीय शेअर बाजाराचे अध्यक्ष श्रीनिवास इंजेटी यांनी प्रास्ताविकात भारतातील भांडवली गुंतवणूक आणि सायप्रस-भारत यांच्यातील गुंतवणुकीच्या विविध संधींवर प्रकाश टाकला. या सोहळ्यानंतर, सायप्रसचे राष्ट्राध्यक्ष निकोस क्रिस्टोडोलाइड्स मुंबईहून दिल्लीकडे रवाना झाले, जेथे ते पुढील राष्ट्रीय स्तरावरील महत्त्वाच्या बैठकींमध्ये भाग घेतील.