मुंबई: महाराष्ट्रातील वाहनधारकांसाठी एक अत्यंत महत्त्वाची आणि दिलासादायक बातमी आहे. राज्यातील १ एप्रिल २०१९ पूर्वी नोंदणी झालेल्या जुन्या वाहनांना उच्च सुरक्षा नोंदणी क्रमांक (HSRP – High-Security Registration Plate) बसवण्यासाठी राज्य सरकारने आता थेट ३० जून २०२६ पर्यंत अंतिम मुदतवाढ दिली आहे. यापूर्वी ही मुदत ३१ डिसेंबर २०२५ पर्यंतच मर्यादित होती.
मुदतवाढ देण्यामागचे मुख्य कारण काय?
परिवहन विभागाने दिलेल्या माहितीनुसार, राज्यातील केवळ ५० टक्के जुन्या वाहनांवरच आतापर्यंत एचएसआरपी नंबर प्लेट्स बसवण्यात आल्या आहेत. उर्वरित ५० टक्के वाहनधारकांनी अद्याप ही प्रक्रिया पूर्ण केलेली नाही. यामुळे नागरिकांना त्रास होऊ नये आणि सर्वांना पुरेशा वेळ मिळावा, या उद्देशाने सरकारने ही मुदत वाढवण्याचा महत्त्वपूर्ण निर्णय घेतला आहे.
परिवहन विभागाच्या विविध सुरक्षात्मक उपाययोजनांमुळे राज्यातील रस्ता अपघातांत ८ टक्क्यांची मोठी घट झाली असून, आता एचएसआरपी नंबर प्लेटमुळे वाहनांची सुरक्षा आणि चोरीच्या घटनांवर नियंत्रण मिळवणे अधिक सोपे होणार आहे.
१ जुलै २०२६ पासून होणार कडक कारवाई आणि दंड!
ज्या वाहनधारकांनी निश्चित केलेल्या अंतिम मुदतीत (३० जून २०२६ पर्यंत) आपल्या वाहनावर एचएसआरपी प्लेट बसवलेली नसेल किंवा त्यासाठी आगाऊ बुकिंग (Appointment) केलेली नसेल, अशा वाहनांची १ जुलै २०२६ पासून रस्त्यावर कडक तपासणी केली जाईल. नियमांचे उल्लंघन करणाऱ्या वाहनधारकांकडून मोटार वाहन कायद्यानुसार १,००० रुपये तडजोड शुल्क (दंड) आकारला जाईल, असा इशारा परिवहन विभागाने दिला आहे.
ऑनलाईन अपॉइंटमेंट कशी घ्यावी?
सह परिवहन आयुक्त (संगणक) शैलेश कामत यांनी प्रसिद्धीपत्रकाद्वारे आवाहन केले आहे की, वाहनधारकांनी शेवटच्या क्षणाची वाट न पाहता तातडीने ऑनलाइन नोंदणी करावी. नोंदणीसाठी खालील प्रक्रिया फॉलो करा:
- सर्वप्रथम परिवहन विभागाच्या अधिकृत संकेतस्थळाला भेट द्या: transport.maharashtra.gov.in
- वेबसाईटवर दिलेल्या ‘HSRP’ नोंदणीच्या पर्यायावर क्लिक करा.
- तुमच्या वाहनाची माहिती अचूक भरा आणि सोयीची तारीख व वेळ (Appointment) निवडा.
- ठरलेल्या वेळी जाऊन नंबर प्लेट बसवून घ्या.
याशिवाय, राज्यातील तरुणांच्या प्रगतीसाठी आणि रोजगारासाठी शासनाकडून सातत्याने विविध उपक्रम राबवले जात आहेत, ज्याचाच एक भाग म्हणून नुकताच महाराष्ट्र व दक्षिण कोरियात ऐतिहासिक करार करण्यात आला आहे, ज्यामुळे तरुणांना जागतिक दर्जाचे कौशल्य प्रशिक्षण मिळणार आहे.
HSRP नंबर प्लेटचे फायदे काय आहेत?
एचएसआरपी नंबर प्लेट ही केवळ एक सामान्य पाटी नसून ती अत्यंत सुरक्षित आहे. याचे प्रमुख फायदे खालीलप्रमाणे आहेत:
- चोरीपासून संरक्षण: ही नंबर प्लेट सहज काढता किंवा बदलता येत नाही, ज्यामुळे वाहन चोरीला जाण्याचा धोका कमी होतो.
- डिजिटल ट्रॅकिंग: यावर एक युनिक लेझर कोड असतो, जो वाहनाच्या सर्व डेटाशी लिंक असतो.
- एकसमानता: सर्व वाहनांवर एकसारख्याच आकाराची आणि रंगाची नंबर प्लेट असल्याने गुन्हेगारी रोखण्यास मदत होते.
त्यामुळे विनाकारण दंड भरणे टाळण्यासाठी आणि आपल्या वाहनाच्या सुरक्षेसाठी त्वरित एचएसआरपी नोंदणी करून घ्यावी.