मुंबई: भारत आणि सायप्रस यांच्यातील आर्थिक व औद्योगिक भागीदारीला नव्या उंचीवर नेण्यासाठी पुढील दशक अत्यंत महत्त्वपूर्ण ठरणार आहे. महाराष्ट्रात गुंतवणुकीसाठी पूरक वातावरण असून सायप्रसच्या नामांकित उद्योगसमूहांनी राज्यात येऊन उत्पादन, नवोपक्रम आणि व्यापार क्षेत्रात दीर्घकालीन भागीदारी करावी, असे प्रतिपादन महाराष्ट्राचे उपमुख्यमंत्री देवेंद्र फडणवीस यांनी केले. मुंबईतील हॉटेल ताज महल पॅलेस येथे आयोजित ‘सायप्रस-भारत बिझनेस फोरम’मध्ये ते बोलत होते.
या महत्त्वपूर्ण परिषदेला सायप्रसचे राष्ट्राध्यक्ष निकोस क्रिस्टोडौलिडेस विशेष अतिथी म्हणून उपस्थित होते. नुकतीच त्यांनी मुंबई भेटीदरम्यान २६/११ मुंबई हल्ल्यातील शहिदांना सायप्रसचे राष्ट्राध्यक्ष निकोस क्रिस्टोडौलिडेस यांच्याकडून भावपूर्ण श्रद्धांजली वाहिली होती.
महाराष्ट्र: ६६० अब्ज डॉलर्सची वेगाने वाढणारी अर्थव्यवस्था
उपमुख्यमंत्री फडणवीस यांनी महाराष्ट्राच्या आर्थिक ताकदीचा उल्लेख करत सांगितले की, महाराष्ट्र ही आज ६६० अब्ज डॉलर्सची बलाढ्य अर्थव्यवस्था आहे. देशाच्या एकूण औद्योगिक उत्पादनात महाराष्ट्राचा वाटा ३० टक्के असून, थेट परकीय गुंतवणुकीत (FDI) राज्याचा वाटा तब्बल ४० टक्के आहे.
मुंबई हे जगातील अग्रगण्य आर्थिक केंद्र बनत असून, राज्यात समृद्धी महामार्ग, मुंबई ट्रान्स हार्बर लिंक, नवी मुंबई आंतरराष्ट्रीय विमानतळ आणि विस्तीर्ण मेट्रो नेटवर्क यांसारखे महत्त्वाकांक्षी पायाभूत सुविधांचे प्रकल्प युद्धपातळीवर पूर्ण केले जात आहेत. ऊर्जा क्षेत्रात महाराष्ट्र ९३ गिगावॅट क्षमतेकडे वाटचाल करत असून, त्यातील ५२ टक्के ऊर्जा ही अक्षय आणि नवीकरणीय स्रोतांतून निर्माण केली जाणार आहे. यापूर्वी, राज्य सरकारने अणुऊर्जा क्षेत्रात महाराष्ट्र मोठी झेप घेण्यासाठी जागतिक स्तरावर विविध करार केले आहेत.
मुंबईत ‘सायप्रस ट्रेड सेंटर’ सुरू होणार!
भारत आणि सायप्रस दरम्यानचे व्यापार संबंध अधिक वृद्धिंगत करण्यासाठी मुंबईत १ सप्टेंबरपासून ‘सायप्रस ट्रेड सेंटर’ (Cyprus Trade Center) सुरू करण्याची महत्त्वपूर्ण घोषणा सायप्रसचे राष्ट्राध्यक्ष निकोस क्रिस्टोडौलिडेस यांनी केली.
हे ट्रेड सेंटर भारतीय उद्योजकांना सायप्रस तसेच युरोपियन युनियनच्या (EU) ४५ कोटी ग्राहकांच्या बाजारपेठेत सहज प्रवेश मिळवून देण्यासाठी महत्त्वपूर्ण भूमिका बजावणार आहे. दोन्ही देशांमध्ये केवळ व्यापारीच नव्हे, तर भारत-सायप्रस सांस्कृतिक संबंध होणार अधिक घट्ट करण्यासाठी देखील अनुकूल वातावरण तयार झाले आहे.
६ महत्त्वाच्या करारांवर स्वाक्षऱ्या
या बिझनेस फोरममध्ये दोन्ही देशांतील आर्थिक व तांत्रिक सहकार्य वाढवण्यासाठी एकूण ६ महत्त्वाच्या सामंजस्य करारांवर (MoUs) स्वाक्षऱ्या करण्यात आल्या:
- फिक्की (FICCI) आणि सायप्रस चेंबर ऑफ कॉमर्स: उद्योग व व्यापार सहकार्य वाढवण्यासाठी.
- इन्व्हेस्ट सायप्रस आणि फिक्की: परस्परांमध्ये गुंतवणूक वाढवण्यासाठी प्रोत्साहन देणे.
- सीआयआय (CII) आणि सायप्रस चेंबर ऑफ कॉमर्स: औद्योगिक क्षेत्रातील परस्पर सहकार्य.
- युरोबँक आणि फिक्की: बँकिंग व वित्तीय क्षेत्रातील सहकार्य वाढवणे.
- सोसायटी ऑफ इंडियन डिफेन्स मॅन्युफॅक्चर्स आणि सायप्रस डिफेन्स क्लस्टर: संरक्षण आणि अंतराळ तंत्रज्ञान क्षेत्रात भागीदारी.
- सप्तंग लॅब प्रा.लि. आणि चॅनेल आयटी लिमिटेड: अत्याधुनिक तंत्रज्ञान व नवोपक्रम क्षेत्रात संयुक्त भागीदारी.
या परिषदेमुळे भारत आणि सायप्रसमधील संबंधांना आता “स्ट्रॅटेजिक पार्टनरशिप” (धोरणात्मक भागीदारी) चे स्वरूप आले असून, आगामी काळात माहिती तंत्रज्ञान, फिनटेक, कृत्रिम बुद्धिमत्ता (AI) आणि हरित ऊर्जा क्षेत्रात मोठी क्रांती घडण्याची अपेक्षा आहे.