मुंबई: आपल्या सुमधुर आणि अवीट गोडीच्या स्वरांनी संपूर्ण भारतीय संगीत जगतावर अधिराज्य गाजवणाऱ्या ज्येष्ठ गायिका, पद्मभूषण सुमन कल्याणपूर यांच्या निधनाने संगीत क्षेत्रातील एक दैदिप्यमान तारा निमाला आहे. त्यांच्या निधनामुळे भारतीय संगीत क्षेत्राची कधीही भरून न निघणारी हानी झाली आहे, अशा शब्दांत महाराष्ट्राचे उपमुख्यमंत्री एकनाथ शिंदे यांनी आपल्या तीव्र शोकभावना व्यक्त केल्या आहेत. “सुमनताईंच्या जाण्याने संगीताचे खऱ्या अर्थाने ‘सुमन’ कोमेजले आहे,” असे भावूक उद्गार त्यांनी काढले.
भारतीय सुगम संगीताचा सुवर्णकाळ हरपला
उपमुख्यमंत्री एकनाथ शिंदे यांनी आपल्या शोकसंदेशात सुमन कल्याणपूर यांच्या सांगीतिक प्रवासाचे स्मरण करत त्यांच्या अमूल्य योगदानाचा गौरव केला. ते म्हणाले की, सुमन कल्याणपूर या केवळ एक पार्श्वगायिका नव्हत्या, तर त्या भारतीय सुगम आणि चित्रपट संगीताच्या सुवर्णकाळाचे प्रतिनिधित्व करणाऱ्या महान कलाकार होत्या. अत्यंत भावपूर्ण, नितळ आणि मधुर आवाजाच्या बळावर त्यांनी मराठी, हिंदीसह अनेक प्रादेशिक भाषांमध्ये हजारो अजरामर गाणी गायली. त्यांच्या आवाजातील सात्त्विकता थेट रसिक प्रेक्षकांच्या मनाचा ठाव घेत असे.
या दुःखद प्रसंगी, ज्येष्ठ पार्श्वगायिका सुमन कल्याणपूर यांच्या निधनाबद्दल मुख्यमंत्री देवेंद्र फडणवीस यांनीही भावपूर्ण श्रद्धांजली अर्पण करून त्यांच्या आठवणींना उजाळा दिला आहे.
स्वतःच्या प्रतिभेने निर्माण केले अढळ स्थान
सुमनजींचा संगीताचा कोणताही कौटुंबिक किंवा औपचारिक वारसा नव्हता. परंतु, केवळ स्वतःची जिद्द, कठोर साधना आणि अद्भूत प्रतिभेच्या जोरावर त्यांनी संगीत क्षेत्रात स्वतःचे अढळ स्थान निर्माण केले. ‘शब्दावाचून कळले सारे’, ‘तूच सुखाचा सागर’, ‘केतकीच्या बनी तिथे’, आणि ‘पाखरा जा रे जा’ यांसारखी त्यांची अनेक भावगीते आणि चित्रपटगीते आजही तितकीच लोकप्रिय आहेत. त्यांनी गायलेली भक्तिगीते आणि कोळीगीते आजही प्रत्येक मराठी घराघरांमध्ये ऐकली जातात.
तसेच, उपमुख्यमंत्री सुनेत्रा अजित पवार यांनीही सुमन कल्याणपूर यांना श्रद्धांजली वाहिली असून त्यांच्या जाण्याने संगीतातील एका सुवर्ण पर्वाचा अंत झाल्याची भावना व्यक्त केली आहे.
‘पद्मभूषण’ पुरस्काराने झाला होता गौरव
भारत सरकारने सुमन कल्याणपूर यांच्या संगीत क्षेत्रातील अतुलनीय कामगिरीची दखल घेत त्यांना देशाचा सर्वोच्च नागरी पुरस्कार ‘पद्मभूषण’ देऊन सन्मानित केले होते. त्यांचा सांगीतिक वारसा आणि त्यांनी गायलेली गाणी येणाऱ्या अनेक पिढ्यांसाठी सदैव प्रेरणादायी ठरतील, अशा शब्दांत उपमुख्यमंत्री एकनाथ शिंदे यांनी त्यांना भावपूर्ण आदरांजली वाहिली.