पुणे: जुन्नर तालुक्यातील पिंपळवंडी येथे अवघ्या साडेनऊ वर्षांच्या चिमुकलीवर झालेला अमानुष अत्याचार आणि तिची झालेली निर्घृण हत्या अत्यंत सुन्न करणारी आणि संतापजनक आहे. या दुर्दैवी प्रकरणाची दखल घेत उपमुख्यमंत्री तथा पुणे जिल्ह्याच्या पालकमंत्री सुनेत्रा अजित पवार यांनी पुणे ग्रामीण पोलिसांकडून संपूर्ण घटनेचा सविस्तर आढावा घेतला आहे. या प्रकरणातील आरोपीला फाशीसारखी कठोर शिक्षा लवकरात लवकर व्हावी, यासाठी हा खटला फास्ट ट्रॅक (जलदगती) न्यायालयात चालवण्यासाठी मुख्यमंत्री तथा गृहमंत्री देवेंद्र फडणवीस यांच्याकडे विशेष पाठपुरावा करणार असल्याचे त्यांनी स्पष्ट केले.
सखोल तपास आणि कठोर कारवाईचे निर्देश
घटनेचे गांभीर्य लक्षात घेऊन उपमुख्यमंत्री सुनेत्रा पवार यांनी पुणे जिल्ह्याचे पोलीस अधीक्षक संदीप सिंह गिल यांच्याशी फोनवरून थेट संवाद साधला. या प्रकरणाचा तपास अत्यंत निष्पक्ष, पारदर्शक आणि वेगाने करण्याचे स्पष्ट आदेश त्यांनी प्रशासनाला दिले आहेत. राज्यातील कायदा व सुव्यवस्था राखण्यासाठी पोलीस प्रशासनाने तत्परता दाखवत संशयित आरोपीला तात्काळ बेड्या ठोकल्या असून पुढील तपास युद्धपातळीवर सुरू आहे.
माणुसकीला काळीमा फासणारी घटना – सुनेत्रा पवार
उपमुख्यमंत्री सुनेत्रा पवार यांनी या घटनेवर तीव्र शोक आणि संताप व्यक्त केला. त्या म्हणाल्या, “पिंपळवंडीतील ही घटना अत्यंत निंदनीय असून माणुसकीला काळीमा फासणारी आहे. पीडित बालिकेला आणि तिच्या कुटुंबियांना न्याय मिळवून देणे हे आमचे सर्वोच्च प्राधान्य आहे. अशा नराधमांना समाजात अजिबात थारा मिळणार नाही. आरोपीवर भक्कम पुराव्यांसह दोषारोपपत्र दाखल करून हा खटला जलदगती न्यायालयात चालवला जावा, यासाठी गृहखात्याकडे तातडीने मागणी केली जाईल.”
राज्यात महिला व बालकांच्या सुरक्षेसाठी शासन कटिबद्ध असून, गुन्हेगारी प्रवृत्ती आणि व्यसनाधीनतेविरुद्ध शासनाने कठोर पावले उचलली आहेत. याआधीही राज्यभरात नशामुक्त महाराष्ट्र धोरण राबवून समाजकंटकांवर वचक निर्माण करण्याचे काम सुरू आहे.
पीडित कुटुंबाच्या पाठीशी शासन खंबीर
शासनाकडून पीडित कुटुंबाला सर्वतोपरी कायदेशीर व आर्थिक साहाय्य केले जाईल, अशी ग्वाही उपमुख्यमंत्र्यांनी दिली. तसेच त्या लवकरच स्वतः पिंपळवंडी गावाला भेट देऊन शोकाकुल कुटुंबीयांचे सांत्वन करणार आहेत. या प्रकरणातील तपासावर वरिष्ठ पातळीवरून सातत्याने लक्ष ठेवले जात असल्याचेही प्रशासनाकडून सांगण्यात आले आहे.