नागपूर: फाळणीच्या काळात निर्वासित म्हणून भारतात आलेल्या सिंधी समाजाने अत्यंत प्रतिकूल परिस्थितीत शून्यातून आपले विश्व निर्माण केले. आज हा समाज केवळ व्यापार क्षेत्रातच नव्हे, तर देशाच्या सर्वांगीण विकासात मोलाचे योगदान देत आहे, अशा शब्दांत मुख्यमंत्री देवेंद्र फडणवीस यांनी सिंधी समाजाचे कौतुक केले. नागपूरमधील जरीपटका येथील महात्मा गांधी हायस्कूलच्या प्रांगणात विदर्भ सिंधी विकास परिषदेच्या वतीने आयोजित एका विशेष कार्यक्रमात ते बोलत होते.
सिंधी बांधवांच्या हक्काच्या घरांचा प्रश्न सुटला
या कार्यक्रमाचे मुख्य आकर्षण म्हणजे सिंधी बांधवांना त्यांच्या वास्तव्याच्या जमिनींचे मालकी हक्क (मालकी पट्टे) प्रदान करण्यात आले. मुख्यमंत्री म्हणाले की, अनेक वर्षांपासून सिंधी बांधवांच्या जमिनी अतिक्रमणाच्या विळख्यात होत्या. त्यांना मालकी हक्क मिळावा, अशी मागणी प्रलंबित होती. राज्य सरकारने तातडीने निर्णय घेत या जमिनींना ‘वर्ग-१’ च्या मालकी हक्काचा दर्जा दिला आहे. यामुळे हजारो कुटुंबांना आता हक्काचे घर मिळाले आहे.
मालमत्तांच्या अधिकारांबाबत सरकार किती गंभीर आहे, हे या निर्णयावरून स्पष्ट होते. याच पार्श्वभूमीवर महाराष्ट्रात ‘लँड टायटलिंग ॲक्ट’ लागू होणार असून, यामुळे मालमत्ता व्यवहार अधिक पारदर्शक आणि सुलभ होतील.
संघर्षातून उभारले यशाचे शिखर
देशाच्या फाळणीनंतर घर, शेती आणि व्यवसाय सोडून भारतात आलेल्या सिंधी बांधवांना सुरुवातीची अनेक वर्षे निर्वासितांच्या शिबिरात काढावी लागली. मात्र, या समाजाने आपल्या दुःखालाच संघर्षाचे शस्त्र बनवले. आज हा समाज प्रत्येक क्षेत्रात आघाडीवर आहे. मुख्यमंत्र्यांनी नमूद केले की, भविष्यातील जागतिक अर्थव्यवस्थेचे नेतृत्व महाराष्ट्रच करणार असून, यामध्ये सिंधी समाजासारख्या उद्यमशील घटकांचा वाटा अत्यंत महत्त्वाचा ठरेल.
३५० कुटुंबांना मिळाले मालकी हक्क
नागपूरमधील खामला, मेकोसाबाग आणि जरीपटका या भागांत पुनर्वसन झालेल्या ३५० सिंधी बांधवांना यावेळी मालकी हक्काचे पट्टे वाटप करण्यात आले. मुख्यमंत्र्यांच्या हस्ते प्रातिनिधिक स्वरूपात १२ जणांना हे पट्टे देण्यात आले. तसेच, समाजातील ३६ नवनियुक्त नगरसेवकांचाही यावेळी गौरव करण्यात आला.
उल्हासनगरच्या प्रश्नावरही तोडगा काढणार
नागपूरप्रमाणेच उल्हासनगर येथील सिंधी बांधवांच्या घरांच्या नियमितीकरणाचा प्रश्नही मार्गी लावला जाईल, अशी ग्वाही मुख्यमंत्र्यांनी यावेळी दिली. पंतप्रधान नरेंद्र मोदी यांच्या नेतृत्वाखाली सिंधी बांधवांना नागरिकत्व देण्याचे मोठे अभियान राबवण्यात आले असून, आता त्यांच्या जमिनींच्या मालकी हक्काचा प्रश्नही सरकार प्राधान्याने सोडवत आहे.
या सोहळ्याला आमदार कुमार आयलानी, महापौर श्रीचंद तेजवानी, जिल्हाधिकारी कुमार आशीर्वाद, विदर्भ सिंधी विकास परिषदेचे अध्यक्ष डॉ. विनकी रूघवानी आणि इतर मान्यवर उपस्थित होते. प्रास्ताविक डॉ. विनकी रुघवानी यांनी केले, तर आभार प्रदर्शन सचिव पी.टी. दारा यांनी मानले.