सोलापूर: स्वातंत्र्यलढ्यात आपले अमूल्य योगदान देणारे आंत्रोळी गावचे सुपुत्र आणि थोर देशभक्त स्वातंत्र्य सेनानी डॉ. कृष्णा (भाऊ काका) भीमराव अंत्रोळीकर यांच्या अर्धपुतळ्याचे सोलापूरचे पालकमंत्री जयकुमार गोरे यांच्या हस्ते उत्साहात अनावरण करण्यात आले. सोलापूर जिल्ह्यातील आंत्रोळी येथे या सोहळ्याचे आयोजन करण्यात आले होते.
साने गुरुजी प्राथमिक विद्यालय आणि जिल्हा परिषद प्राथमिक शाळा येथे हा भव्य कार्यक्रम पार पडला. याप्रसंगी शहाजी पवार, शशिकांत चव्हाण, महानगरपालिका गटनेते नरेंद्र काळे, नगरसेविका रोहिणी तडवळकर, रामभाऊ तडवळकर, जिल्हा परिषद सदस्या सोनाली कडते, अध्यक्ष श्रीकांत येळेगावकर, मोहन अंत्रोळीकर यांच्यासह गावातील नागरिक आणि मान्यवर मोठ्या संख्येने उपस्थित होते.
डॉ. अंत्रोळीकरांचे कार्य संपूर्ण जिल्ह्यासाठी अभिमानास्पद: पालकमंत्री जयकुमार गोरे
यावेळी बोलताना पालकमंत्री जयकुमार गोरे म्हणाले की, “डॉ. अंत्रोळीकर हे केवळ आंत्रोळी गावचेच नव्हे, तर संपूर्ण सोलापूर जिल्ह्याचा आणि महाराष्ट्राचा अभिमान आहेत. त्यांच्या अतुलनीय कार्याची नोंद इतिहासात सुवर्ण अक्षरांनी झाली आहे. स्वातंत्र्य चळवळीच्या काळात त्यांनी केलेले काम अत्यंत प्रेरणादायी होते.”
तत्कालीन काळात वैद्यकीय क्षेत्रातील सर्वोच्च पदवी (MBBS) घेतलेले डॉ. अंत्रोळीकर हे उच्चशिक्षित आणि अत्यंत प्रगल्भ विचारांचे व्यक्तिमत्त्व होते. गरिबांचे डॉक्टर म्हणून त्यांची जनमानसात मोठी ओळख होती. त्यांनी असहकार चळवळीत स्वतःला पूर्णपणे झोकून दिले होते. ‘साधी राहणी आणि उच्च विचारसरणी’ हे त्यांच्या जीवनप्रवासाचे मुख्य सूत्र होते.
हुतात्म्यांचे मार्गदर्शक आणि आदर्श व्यक्तिमत्त्व
सोलापूरच्या स्वातंत्र्यलढ्यातील चार हुतात्म्यांपैकी हुतात्मा कुर्बान हुसेन हे डॉ. अंत्रोळीकर यांचे थेट शिष्य होते, तर उर्वरित हुतात्मे त्यांचे जवळचे मित्र होते. यावरून त्यांच्या मार्गदर्शनाची आणि नेतृत्वाची उंची स्पष्ट होते. या भव्य अर्धपुतळ्याच्या माध्यमातून नव्या पिढीला स्वातंत्र्यलढ्याची थोरवी आणि देशाभिमान समजण्यास मोठी मदत होईल, असा विश्वासही पालकमंत्र्यांनी व्यक्त केला.
ग्रामीण विकासाची ग्वाही आणि आश्वासने
ग्रामविकास खात्याचा मंत्री म्हणून पहिल्यांदाच आंत्रोळी गावात आल्याचे सांगत पालकमंत्री जयकुमार गोरे यांनी गावच्या विकासासाठी पूर्ण सहकार्य करण्याचे आश्वासन दिले. गावकऱ्यांनी दिलेल्या निवेदनाची दखल घेत डॉ. अंत्रोळीकर यांच्या स्मरणार्थ गावातील सर्व प्रलंबित विकासकामे तातडीने पूर्ण केली जातील, असे त्यांनी जाहीर केले.
सोलापूर जिल्हा हा अध्यात्म आणि क्रांतीची भूमी म्हणून ओळखला जातो. याच जिल्ह्यात पंढरपूरचा विकास काशी, अयोध्येच्या धर्तीवर करणार असल्याचा महत्त्वपूर्ण निर्णय शासनाने घेतला आहे, ज्यामुळे जिल्ह्याला एक नवे धार्मिक आणि सांस्कृतिक वैभव प्राप्त होणार आहे. तसेच, ग्रामीण भागाच्या सर्वांगीण विकासासाठी विविध उपक्रम राबवले जात असून, महिला स्वयंसहायता गटांमुळे देशात ग्रामीण क्रांती घडून येत असल्याचे चित्र पाहायला मिळत आहे.
या देखण्या पुतळ्याच्या उभारणीसाठी परिश्रम घेतलेल्या पुतळा समितीचे आणि ग्रामस्थांचे पालकमंत्र्यांनी शेवटी विशेष कौतुक केले.