श्रीवर्धन / रायगड: कोकणच्या नैसर्गिक सौंदर्याला पर्यटनाची जोड देऊन स्थानिक पातळीवर रोजगाराच्या नवीन संधी निर्माण करण्यासाठी राज्य सरकारकडून वेगाने पावले उचलली जात आहेत. श्रीवर्धन मतदारसंघाचा पर्यटनदृष्ट्या सर्वांगीण विकास करण्यासाठी म्हसळा तालुक्यातील कणघर येथे सुमारे २० एकर जागेवर भव्य ‘बायोडायव्हर्सिटी झोन’ (जैवविविधता क्षेत्र) विकसित करण्यात येणार आहे. महिला व बालविकास मंत्री आदिती तटकरे यांनी यासाठी तातडीने जागा निश्चित करण्याचे निर्देश प्रशासनाला दिले आहेत.
मंत्रालयात आयोजित एका विशेष आढावा बैठकित म्हसळा आणि श्रीवर्धन तालुक्यातील विविध पर्यटन प्रकल्पांच्या सद्यस्थितीचा आढावा घेण्यात आला. या बैठकीला रायगडचे जिल्हाधिकारी किसन जावळे (व्हीसीद्वारे), जिल्हा वनसंरक्षक जाधव, महाडचे कार्यकारी अभियंता कांबळे, तसेच महाराष्ट्र मेरीटाईम बोर्ड व महाराष्ट्र पर्यटन विकास महामंडळाचे (MTDC) वरिष्ठ अधिकारी उपस्थित होते.
कणघरमध्ये उभारणार अद्ययावत ‘पक्षी निरीक्षण केंद्र’
कणघर (ता. म्हसळा) परिसरातील समृद्ध जैवविविधतेचे संवर्धन करणे आणि पर्यटकांना आकर्षित करणे हा या प्रकल्पाचा मुख्य उद्देश आहे. या भागात निलगिरी वूड पिजन, मलबार पॅराकीट, मलबार ग्रे हॉर्नबिल, व्हाईट-चीक्ड बार्बेट आणि पर्पल-रम्प्ड सनबर्ड यांसारख्या दुर्मिळ व विविध पक्षी प्रजाती आढळतात. या पक्ष्यांबद्दल पर्यटक आणि पक्षीप्रेमींना सविस्तर माहिती मिळावी, यासाठी येथे सुसज्ज पक्षी निरीक्षण केंद्र उभारले जाणार आहे. तसेच पर्यटकांसाठी निसर्गरम्य वॉक-वे आणि पाथ-वे विकसित करण्याचा प्राथमिक प्रस्ताव तयार करण्याचे निर्देश मंत्री तटकरे यांनी दिले.
कोकणच्या पर्यटन विकासासोबतच तेथील निसर्गाचे संवर्धन करणेही तितकेच गरजेचे आहे. कोकणातील हवामान आणि निसर्गाविषयी अधिक माहिती जाणून घेण्यासाठी कृषी हवामान शास्त्रज्ञांचे ‘एल निनो आणि कोकण शेती मार्गदर्शन’ नक्की वाचा.
दिवेआगार समुद्रकिनाऱ्याचे ‘मरीन थीम’वर सौंदर्यीकरण
बैठकीत दिवेआगार येथील प्रस्तावित भव्य ॲक्वारियम (मत्स्यालय) आणि समुद्रकिनारा सौंदर्यीकरणाचे सादरीकरण करण्यात आले. दिवेआगार समुद्रकिनाऱ्याचे सौंदर्यीकरण करताना ‘मरीन थीम’चा वापर करण्यात यावा, तसेच संपूर्ण परिसर पर्यावरणपूरक ठेवण्यासाठी सौरऊर्जेवर आधारित सुविधांचा वापर करावा, अशा सूचना देण्यात आल्या. याशिवाय, पर्यटकांना आकर्षित करण्यासाठी वॉटर स्पोर्ट्स (जलक्रीडा) सुरू करण्याच्या अनुषंगाने आवश्यक ती प्रशासकीय कार्यवाही वेगाने करण्याचे निर्देशही त्यांनी महाराष्ट्र मेरीटाईम बोर्डाला दिले.
हरिहरेश्वर प्रदक्षिणा मार्गाच्या कामाला मिळणार गती
प्रसिद्ध तीर्थक्षेत्र असलेल्या हरिहरेश्वर येथील प्रदक्षिणा मार्गाचे काम अनेक पर्यटकांसाठी आकर्षणाचे केंद्र आहे. या मार्गाचे काम लवकरात लवकर आणि दर्जेदार पद्धतीने पूर्ण व्हावे यासाठी संबंधित अधिकाऱ्यांना गती देण्याचे आदेश देण्यात आले आहेत. या सर्व प्रकल्पांमुळे श्रीवर्धन आणि म्हसळा परिसरातील पर्यटन व्यवसायाला मोठी चालना मिळणार असून स्थानिक तरुणांना रोजगाराच्या प्रचंड संधी उपलब्ध होतील.
महाराष्ट्रात अशा प्रकारे ग्रामीण भागाचा कायापालट करण्यासाठी शासनाकडून सातत्याने विविध योजना राबविल्या जातात. राज्यातील पायाभूत विकासाला चालना देणाऱ्या संसदीय संकुल विकास योजनेचा विधानसभा स्तरावर विस्तार करण्याबाबतची माहिती देखील तुम्ही येथे वाचू शकता.
या महत्त्वपूर्ण बैठकीमुळे म्हसळा-श्रीवर्धनमधील रखडलेल्या पर्यटन प्रकल्पांना आता गती मिळणार असून येत्या काळात रायगड जिल्हा जागतिक पर्यटन नकाशावर अधिक ठळकपणे उदयास येईल, असा विश्वास व्यक्त केला जात आहे.