Maharashtra Weather Update: महाराष्ट्रात मान्सून पुन्हा एकदा सक्रिय झाला असून हवामान विभागाने (IMD) राज्यातील काही भागांत विजांच्या कडकडाटासह जोरदार पावसाचा अंदाज वर्तवला आहे. मुंबई वेधशाळेने दिलेल्या ताज्या माहितीनुसार, विदर्भातील गडचिरोली, गोंदिया आणि भंडारा या जिल्ह्यांमध्ये मेघगर्जना व विजांच्या कडकडाटासह पावसाची शक्यता वर्तवत ‘यलो अलर्ट’ (Yellow Alert) जारी केला आहे. या पार्श्वभूमीवर राज्य आपत्ती व्यवस्थापन विभागाने नागरिकांना आणि विशेषतः शेतकऱ्यांना सतर्क राहण्याचे आवाहन केले आहे.
कोणत्या जिल्ह्यांना सतर्कतेचा इशारा?
हवामान खात्याच्या अंदाजानुसार पुढील दोन दिवस राज्यातील विविध भागांमध्ये पावसाचा जोर वाढण्याची शक्यता आहे:
- २४ ऑगस्ट: विदर्भातील गोंदिया, भंडारा, गडचिरोली आणि चंद्रपूर तसेच मराठवाड्यातील परभणी, नांदेड, हिंगोली आणि पश्चिम महाराष्ट्रातील पुणे घाट व सातारा घाट परिसरात मुसळधार पावसाचा ‘यलो अलर्ट’ देण्यात आला आहे.
- २५ ऑगस्ट: पुणे घाट, सातारा घाट, कोल्हापूर घाट या पर्वतीय परिसरासह विदर्भातील चंद्रपूर आणि गडचिरोली जिल्ह्यात विजांच्या कडकडाटासह जोरदार पावसाची शक्यता आहे.
शेतकरी आणि नागरिकांसाठी महत्त्वाच्या सूचना
पावसासोबतच वादळी वारे आणि विजांचा कडकडाट होण्याची दाट शक्यता असल्याने नागरिकांनी अनावश्यक प्रवास टाळावा. शेतात काम करताना मेघगर्जना सुरू झाल्यास झाडांखाली किंवा विजेच्या खांबाजवळ आश्रय घेऊ नये. आपत्कालीन परिस्थिती उद्भवल्यास स्थानिक प्रशासनाशी संपर्क साधावा. पावसाळ्यात आरोग्यविषयक तक्रारी वाढू नयेत यासाठी आरोग्य यंत्रणाही सज्ज करण्यात आली आहे; राज्यभरात ग्रामीण ते जिल्हा रुग्णालयांपर्यंत दर्जेदार उपचार देण्यासाठी विशेष मार्गदर्शक तत्त्वे अमलात आणली जात आहेत.
तसेच, घाटमाथ्यावर मुसळधार पावसामुळे दरडी कोसळणे किंवा वाहतूक विस्कळीत होण्याचा धोका असतो. त्यामुळे प्रवास करताना वाहनचालकांनी वाहने सावकाश चालवावीत. नुकताच राज्य सरकारने वाहतूक व वाहनांशी संबंधित नियमांत बदल केले असून, महाराष्ट्रात पीयूसी (PUC) तपासणी शुल्कात वाढ लागू करण्यात आली आहे, त्यामुळे प्रवासापूर्वी वाहनांची कागदपत्रे व स्थिती तपासूनच प्रवास सुरू करावा.
हवामान विभागाने दिलेल्या माहितीनुसार, शेतकऱ्यांनी शेतातील पाणी निचरा होण्याची व्यवस्था करावी आणि काढणीस आलेल्या पिकांचे सुरक्षित व्यवस्थापन करावे.