सोलापूर : अंगणवाडी सेविका या केवळ शासकीय कर्मचारी नसून त्या बालकांच्या सुदृढ आरोग्यासह सर्वांगीण विकासात मातेची भूमिका बजावतात. समाजाची भावी पिढी घडविण्याचे मोलाचे कार्य अंगणवाडी सेविकांच्या हातून घडत असून त्यांच्या कार्याचा यथोचित गौरव होणे गरजेचे आहे, असे मनोगत उच्च व तंत्र शिक्षण मंत्री चंद्रकांत पाटील यांनी व्यक्त केले.
पंतप्रधान नरेंद्र मोदी यांच्या वाढदिवसानिमित्त सोलापूर येथील शिवछत्रपती रंग भवन सभागृहात अंगणवाडी सेविकांच्या विशेष सन्मान सोहळ्याचे आयोजन करण्यात आले होते. या कार्यक्रमात मंत्री चंद्रकांत पाटील यांच्या हस्ते प्राथमिक टप्प्यात २५ अंगणवाडी सेविकांना सन्मानित करण्यात आले.
पुढील पिढी घडवण्यात अंगणवाडी सेविकांचे मोठे योगदान
कार्यक्रमात मार्गदर्शन करताना मंत्री चंद्रकांत पाटील म्हणाले की, अंगणवाडी सेविका ग्रामीण व शहरी भागातील बालकांचे पोषण, आरोग्य आणि संस्कारक्षम शिक्षणासाठी सातत्याने कार्यरत असतात. एका बालकाच्या आयुष्याची पहिली मजबूत पायरी अंगणवाडीत रचली जाते. त्यामुळे या सेविकांचे समाजाच्या जडणघडणीतील योगदान अतुलनीय आहे.
तसेच, देशाच्या ‘विकसित भारत २०४७’ या ध्येयाची पूर्तता करण्यासाठी तळागाळातील प्रत्येक घटकाचा सक्रिय सहभाग आवश्यक आहे. महिला आर्थिक व सामाजिकदृष्ट्या स्वावलंबी बनल्यास कुटुंब आणि पर्यायाने समाज सक्षम बनतो, या दृष्टीने शासन महिलांसाठी विविध उपक्रम राबवत आहे. अशाच प्रकारे महिला व बालकांच्या सक्षमीकरणावर भर देणाऱ्या योजना प्रत्यक्ष लाभार्थ्यांपर्यंत पोहोचवणे प्रशासनाचे कर्तव्य असल्याचे त्यांनी नमूद केले.
विविध सामाजिक उपक्रमांचे आयोजन
पंतप्रधान नरेंद्र मोदी यांच्या वाढदिवसाच्या निमित्ताने राज्यभरात विविध सामाजिक व लोकोपयोगी उपक्रम राबवले जात आहेत. यामध्ये विद्यार्थ्यांसाठी चित्रकला व वक्तृत्व स्पर्धा, स्वच्छता मोहीम, तसेच अंगणवाडी सेविकांचा सत्कार अशा विविध उपक्रमांचा समावेश आहे. नागरिकांमध्ये जागरूकता निर्माण करून आणि सेवा संकल्प अभियानांतर्गत योजनांचे लाभ थेट दारापर्यंत पोहोचवून जनकल्याण साधले जात आहे.
कार्यक्रमाचे आयोजक मोहन डोंगरे आणि नगरसेविका रोहिणी तडवळकर यांनीही अंगणवाडी सेविकांच्या समर्पणाचे कौतुक केले. याप्रसंगी प्रशासनाने शासनाच्या कल्याणकारी योजना गरजूंपर्यंत पोहोचवण्यासाठी सर्वांनी एकत्रित येऊन काम करण्याचे आवाहन केले.
कार्यक्रमास मान्यवरांची उपस्थिती
या गौरव सोहळ्यास उपमहापौर ज्ञानेश्वरी देवकर, प्रशांत फत्तेपूरकर, स्थायी समिती सभापती रणजीता चाकोते, शिक्षणाधिकारी धनंजय ढेपे, शशिकांत चव्हाण, तसेच बाल विकास प्रकल्प अधिकारी दीपक ढेपे यांच्यासह सोलापूर जिल्ह्यातील अंगणवाडी सेविका आणि नागरिक मोठ्या संख्येने उपस्थित होते.