पुणे: विकसित महाराष्ट्राचे ध्येय साध्य करण्यासाठी शासकीय यंत्रणेतील प्रत्येक अधिकारी आणि कर्मचाऱ्याचा कौशल्य विकास करणे अत्यंत गरजेचे आहे. यासाठी ‘क्षमता बांधणी आराखडा’ (Capacity Building Framework) तयार करणे हा एक अत्यंत महत्त्वाचा टप्पा असून, सर्व अधिकाऱ्यांनी आपल्या वैयक्तिक आणि व्यावसायिक प्रगतीसाठी या विषयाकडे गांभीर्याने लक्ष द्यावे, असे आवाहन सामान्य प्रशासन विभागाच्या अपर मुख्य सचिव व्ही. राधा यांनी केले.
पुण्यातील यशवंतराव चव्हाण विकास प्रशासन प्रबोधिनी (YASHADA) येथे आयोजित ‘क्षमता बांधणी आराखड्याच्या प्रगतीचा आढावा’ कार्यशाळेत त्या मुख्य मार्गदर्शक म्हणून बोलत होत्या. या प्रसंगी यशदाचे महासंचालक डॉ. सुहास दिवसे, उपमहासंचालक सचिन कलंत्रे, सामान्य प्रशासन विभागाच्या उपसचिव नीता शिंदे, डिजिटल लर्निंग लॅब प्रमुख कल्याणी गोखले आणि संचालक शाहूराज मोरे आदी मान्यवर उपस्थित होते.
प्रशासकीय सुधारणा आणि शाश्वत विकासाचे ध्येय
अपर मुख्य सचिव व्ही. राधा यांनी स्पष्ट केले की, हा आराखडा तयार करताना प्रशासनाच्या अगदी शेवटच्या स्तरावरील कर्मचाऱ्याच्या क्षमता विकासाचाही विचार केला गेला पाहिजे. प्रत्येक पदासाठी आवश्यक असणारी कौशल्ये आणि तंत्रज्ञानाचा अभ्यास करूनच प्रशिक्षणाचे वेळापत्रक निश्चित केले जावे. यामुळे सर्वसामान्य नागरिकांना मिळणाऱ्या सेवा अधिक दर्जेदार होतील आणि यामुळे देशापुढे महाराष्ट्राच्या बचतीचा आणि शाश्वत विकासाचा नवा आदर्श निर्माण होण्यास मदत होईल.
‘नियमाधारित’ ऐवजी ‘भूमिका आधारित’ प्रशासनावर भर
कार्यशाळेदरम्यान यशदाचे महासंचालक डॉ. सुहास दिवसे यांनीही अधिकाऱ्यांना मार्गदर्शन केले. ते म्हणाले की, आताचे प्रशासन केवळ ‘नियमाधारित’ (Rule-based) न राहता ‘भूमिका आधारित’ (Role-based) असणे गरजेचे आहे. या प्रशिक्षण आराखड्याला थेट पदोन्नती आणि सेवाविषयक बाबींशी जोडले जाणार असल्याने अत्यंत अचूक आणि सूक्ष्म पद्धतीने हा आराखडा तयार करण्याचे आवाहन त्यांनी केले.
तंत्रज्ञानाचा वापर आणि आधुनिक प्रशासन
महाराष्ट्रातील अधिकाऱ्यांनी हा क्षमता बांधणी आराखडा तयार करण्यासाठी कृत्रिम बुद्धिमत्ता (AI) आणि आधुनिक तंत्रज्ञानाचा वापर करण्यास सुरुवात केली आहे. सध्याच्या डिजिटल युगात ‘सीएसआर’ आणि तंत्रज्ञानाच्या संगमातून महाराष्ट्रात विकासाचे नवे पर्व सुरू होत असताना, शासकीय यंत्रणेचे हे डिजिटल पाऊल राज्याला प्रगतीपथावर नेण्यासाठी मैलाचा दगड ठरेल, असा विश्वास व्ही. राधा यांनी व्यक्त केला.
या कार्यशाळेत उपस्थित विविध विभागांच्या अधिकाऱ्यांनी आपल्या विभागाच्या क्षमता बांधणी आराखड्याचे सादरीकरण केले, तर उपमहासंचालक सचिन कलंत्रे यांनी अधिकाऱ्यांच्या विविध शंकांचे निरसन करून योग्य मार्गदर्शन केले.