नंदुरबार: नंदुरबार जिल्ह्यामध्ये शैक्षणिक संस्था, सार्वजनिक न्यास आणि धर्मादाय रुग्णालयांची संख्या मोठ्या प्रमाणावर वाढत आहे. त्यामुळे या संस्थांच्या प्रशासकीय व कायदेशीर कामकाजाला गती देण्यासाठी नंदुरबार येथील सार्वजनिक न्यास नोंदणी कार्यालयासाठी स्वतंत्र अधिकारी नियुक्त केला जाईल, अशी महत्त्वपूर्ण ग्वाही राज्याचे वैद्यकीय शिक्षण मंत्री तथा जिल्ह्याचे पालकमंत्री हसन मुश्रीफ यांनी दिली आहे.
महाराष्ट्र शासनाच्या विधि व न्याय विभागांतर्गत नंदुरबार येथील सार्वजनिक न्यास नोंदणी कार्यालयाच्या सुमारे १२ कोटी ६० लाख रुपये खर्चाच्या नूतन शासकीय इमारतीचे भूमिपूजन पालकमंत्री हसन मुश्रीफ यांच्या हस्ते संपन्न झाले. यावेळी खासदार ॲड. गोवाल पाडवी कार्यक्रमाच्या अध्यक्षस्थानी उपस्थित होते.
धुळे-नंदुरबार संयुक्त व्यवस्थेतून सुटका होणार
सध्या धुळे आणि नंदुरबार जिल्ह्यांसाठी सार्वजनिक न्यास नोंदणी कार्यालयाची संयुक्त व्यवस्था कार्यरत आहे. त्यामुळे नंदुरबारमध्ये केवळ मर्यादित दिवसच कामकाज चालते. याचा मोठा फटका जिल्ह्यातील सामाजिक संस्थांचे विश्वस्त, पदाधिकारी आणि वकिलांना बसत असून अनेक प्रकरणे प्रलंबित राहतात. ही समस्या दूर करण्यासाठी नवीन सुसज्ज प्रशासकीय इमारत पूर्ण होताच येथे स्वतंत्र अधिकारी नियुक्त करून नियमित कामकाज सुरू केले जाईल, असे पालकमंत्र्यांनी स्पष्ट केले.
दरम्यान, जिल्ह्यातील विकासाला गती देण्यासाठी शासन कटिबद्ध असून नुकतेच नंदुरबार जिल्ह्यातील अपूर्ण विकासकामे वेळेत पूर्ण करण्याचे निर्देश पालकमंत्री हसन मुश्रीफ यांनी दिले होते. त्याच धर्तीवर या इमारतीचे बांधकामही विहित मुदतीत पूर्ण करण्याच्या सूचना देण्यात आल्या आहेत.
प्रलंबित ‘बदल अहवाल’ (Change Report) वेळेत सोडवण्याचे आवाहन
संस्था आणि ट्रस्टच्या कामकाजात पारदर्शकता आणण्यावर भर देताना पालकमंत्री म्हणाले की, अनेक संस्थांचे ‘बदल अहवाल’ (Change Report) सात ते आठ वर्षे प्रलंबित राहत असल्याचे चित्र आहे. अशा विलंबामुळे अंतर्गत वाद वाढतात. त्यामुळे बदल अहवाल आणि विवादांवर निष्पक्ष, पारदर्शक आणि वेळेत निर्णय होणे गरजेचे आहे.
“ही इमारत केवळ सिमेंट-विटांची वास्तू न राहता पारदर्शक, गतिमान आणि लोकाभिमुख कारभाराचे केंद्र ठरली पाहिजे,” असा विश्वास त्यांनी व्यक्त केला. स्वातंत्र्यदिनाच्या पूर्वसंध्येला हा महत्त्वाचा कार्यक्रम पार पडला. राज्यभरात प्रशासकीय व आरोग्य सुविधांच्या बळकटीकरणासाठी आरोग्य संस्थांचे लोकार्पण व विविध विकासकामांना गती दिली जात आहे, त्या पार्श्वभूमीवर नंदुरबारमधील हा निर्णय अत्यंत स्वागतार्ह मानला जात आहे.
अत्याधुनिक सुविधांनी युक्त असेल नवीन इमारत
टोकरतलाव रोडवरील दूध भवनाशेजारी सर्व्हे क्र. ४१४ येथील नियोजित जागेवर हा भूमिपूजन सोहळा पार पडला. १२.६० कोटी रुपये खर्चून बांधण्यात येणाऱ्या या इमारतीमुळे सार्वजनिक न्यासांच्या नोंदणीसह प्रशासकीय कामकाजासाठी स्वतंत्र आणि आधुनिक सुविधा उपलब्ध होणार आहेत.
या कार्यक्रमास विधान परिषद सदस्य चंद्रकांत रघुवंशी, किशोर दराडे, आमदार राजेश पाडवी, आमश्या पाडवी, जिल्हाधिकारी डॉ. मिताली सेठी, मुख्य कार्यकारी अधिकारी नमन गोयल, पोलीस अधीक्षक अश्विनी सानप, धर्मादाय आयुक्त अमोघ कलोती, धर्मादाय सहआयुक्त विवेक सोनुने यांच्यासह अनेक मान्यवर व नागरिक उपस्थित होते.