जतचा दुष्काळी कलंक पुसण्यासाठी टप्प्याटप्प्याने विकास आराखडा तयार करा: पालकमंत्री चंद्रकांत पाटील; १२ कोटींच्या विकासकामांचे भूमिपूजन!

सांगली: सांगली जिल्ह्यातील जत तालुक्याची ‘दुष्काळी भाग’ ही ओळख कायमस्वरूपी पुसून काढण्यासाठी एका विशेष तज्ज्ञ एजन्सीमार्फत टप्प्याटप्प्याने विकास आराखडा (Master Plan) तयार करण्याचे निर्देश उच्च व तंत्रशिक्षण, संसदीय कार्य मंत्री तथा सांगली जिल्ह्याचे पालकमंत्री चंद्रकांत पाटील यांनी दिले आहेत. तसेच या विकासासाठी राज्य शासन कोणत्याही प्रकारच्या निधीची कमतरता भासू देणार नाही, अशी ग्वाही त्यांनी दिली.

जत नगरपरिषदेच्या विविध विकासकामांचे भूमिपूजन आणि त्यानिमित्ताने आयोजित करण्यात आलेल्या जाहीर सभेत पालकमंत्री बोलत होते. यावेळी आमदार गोपीचंद पडळकर, आमदार सदाभाऊ खोत, नगराध्यक्ष डॉ. रवींद्र आरळी, उपनगराध्यक्ष विक्रम ताड, उपविभागीय अधिकारी अजयकुमार नष्टे, तहसीलदार प्रवीण धानोरकर, मुख्याधिकारी लक्ष्मण राठोड यांसह अनेक मान्यवर व्यासपीठावर उपस्थित होते.

नागरिक आणि विद्यार्थ्यांच्या सहभागातून सर्वसमावेशक विकास आराखडा

पालकमंत्री चंद्रकांत पाटील म्हणाले की, वर्षानुवर्षे दुष्काळाचा सामना करणाऱ्या जत तालुक्यातील नागरिकांच्या समस्या सोडवण्यासाठी सर्वांगीण नियोजन आवश्यक आहे. यासाठी स्वतंत्र एजन्सी नेमून रस्ते, शिक्षण, अखंडित वीजपुरवठा आणि शाश्वत पाणीपुरवठा या मूलभूत गरजा प्राधान्याने पूर्ण केल्या जातील. हा आराखडा तयार करताना स्थानिक नागरिक आणि विद्यार्थ्यांची मतेही विचारात घेतली जावीत.

ज्याप्रमाणे राज्यात दुष्काळ निवारणासाठी व्यापक पावले उचलली जात असून मराठवाडा कायमस्वरूपी दुष्काळमुक्त करण्याचा संकल्प शासनाने केला आहे, त्याच धर्तीवर जत तालुक्याला जलसमृद्ध करण्यासाठी विस्तारित म्हैसाळ उपसा सिंचन योजना आणि इतर जलसंधारण कामांवर भर दिला जात आहे. राज्यात जलयुक्त महाराष्ट्र घडवण्यासाठी राज्य सरकारचे मोठे अभियान सुरू असून याचा थेट फायदा ग्रामीण भागाला होत आहे.

जत तालुक्यातील स्थलांतर रोखण्यासाठी ५०२ कोटींचा निधी – गोपीचंद पडळकर

कार्यक्रमात बोलताना आमदार गोपीचंद पडळकर म्हणाले की, रोजगारासाठी जत तालुक्यातील तरुणांचे व नागरिकांचे होणारे स्थलांतर थांबवण्यासाठी शासन कटिबद्ध आहे. तालुक्यात रस्त्यांच्या मजबुतीकरणासाठी तब्बल ५०२ कोटी रुपयांचा निधी उपलब्ध करून देण्यात आला आहे. याशिवाय जत शहरासाठी स्वतंत्र पाणीपुरवठा योजना, बंदिस्त भुयारी गटार योजना, नाट्यगृह, क्रीडा संकुल आणि तालुक्यातील मंदिरांच्या साखळी विकासासाठी मोठ्या प्रमाणावर निधी मंजूर करण्यात आला आहे.

जत नगरपरिषदेच्या १२ कोटी रुपयांच्या मंजूर कामांचा तपशील

पालकमंत्र्यांच्या हस्ते जत शहरात खालील महत्त्वाच्या विकासकामांचे भूमिपूजन पार पडले:

• जत नगरपरिषद नवीन इमारत बांधकाम (१० कोटी रुपये): नगरविकास विभागाच्या विशेष अनुदान योजनेतून ५ कोटी व नियोजन विभागाकडून ५ कोटी अशा एकूण १० कोटींच्या निधीतून ही भव्य प्रशासकीय इमारत उभी राहणार आहे.
• नमो उद्यान निर्मिती (१ कोटी रुपये): नागरिकांना विरंगुळा व मनोरंजनासाठी नगरविकास विभागाच्या निधीतून अत्याधुनिक ‘नमो उद्यान’ विकसित करण्यात येणार आहे.
• भव्य अभ्यासिका व ग्रंथालय (१ कोटी रुपये): महाराष्ट्र सुवर्ण जयंती नगरोत्थान महाअभियानांतर्गत ८० विद्यार्थ्यांची एकाच वेळी बसण्याची क्षमता असणारी दोन मजली सुसज्ज ग्रंथालय इमारत बांधण्यात येणार आहे.

या कार्यक्रमास नगरसेवक, स्थानिक लोकप्रतिनिधी, शासकीय अधिकारी आणि जतमधील नागरिक मोठ्या संख्येने उपस्थित होते.