परभणी: ग्रामीण भागातील विद्यार्थ्यांना दर्जेदार आणि जागतिक दर्जाचे शिक्षण मिळावे, या उद्देशाने सेलू तालुक्यातील देऊळगाव गात येथील जिल्हा परिषद माध्यमिक शाळेच्या नव्याने उभारण्यात आलेल्या सुसज्ज इमारतीचे लोकार्पण परभणीच्या पालकमंत्री मेघना साकोरे-बोर्डीकर यांच्या हस्ते उत्साहात संपन्न झाले. सुमारे २ कोटी ७५ लाख रुपये (पावणेतीन कोटी) खर्च करून या शाळेची प्रशस्त आणि आधुनिक इमारत साकारण्यात आली आहे.
या सोहळ्यास जिल्हा परिषद अध्यक्षा लता वाकळे, सेलूचे नगराध्यक्ष मिलिंद सावंत, जिल्हा परिषद सदस्या प्रीती डख, अजय डासाळकर, पंचायत समिती सदस्य शिवराम कदम, गटविकास अधिकारी उदय जाधव, गटशिक्षणाधिकारी गजानन वाघमारे आणि शालेय शिक्षण समितीचे अध्यक्ष माऊली कदम यांच्यासह अनेक मान्यवर, ग्रामस्थ व विद्यार्थी उपस्थित होते.
खासगी शाळांना लाजवेल अशी आधुनिक शैक्षणिक सुविधा
सन १९४३ मध्ये स्थापन झालेल्या या ऐतिहासिक शाळेत सध्या इयत्ता ५ वी ते १० वी पर्यंत सुमारे ३५० विद्यार्थी ज्ञानार्जन करत आहेत. नव्या इमारतीच्या लोकार्पणप्रसंगी बोलताना पालकमंत्री मेघना बोर्डीकर म्हणाल्या की, ग्रामीण भागातील सर्वच विद्यार्थ्यांना शहरात जाऊन शिकणे आर्थिकदृष्ट्या परवडत नाही. त्यामुळे अशा प्रकारच्या अत्याधुनिक व डिजिटल सुविधा ग्रामीण भागातच उपलब्ध करून देणे काळाची गरज आहे.
शाळेत उभारण्यात आलेल्या अत्याधुनिक प्रयोगशाळा, टिंकरिंग लॅब आणि डिजिटल क्लासरूम्सचा विद्यार्थ्यांनी पुरेपूर वापर करावा. विद्यार्थ्यांमध्ये केवळ नोकरी मिळवण्याची मानसिकता न ठेवता उद्योजकता आणि नावीन्यपूर्ण विचार विकसित व्हावेत, यासाठी कौशल्याधारित शिक्षणावर भर देण्याचे आवाहन त्यांनी केले. राज्यातील शैक्षणिक गुणवत्तेत वाढ करण्यासाठी शासन सर्वतोपरी प्रयत्न करत असून, नुकतीच पवित्र पोर्टल शिक्षक भरती प्रक्रियाही गतीने राबवण्यात आली आहे.
स्थानिक पातळीवर ६०० तरुणांना रोजगाराच्या संधी
पालकमंत्र्यांनी यावेळी तालुक्यातील औद्योगिक व तंत्रज्ञान क्षेत्रातील प्रगतीवरही प्रकाश टाकला. सेलू येथील आयटी कंपन्यांच्या माध्यमातून स्थानिक युवकांना रोजगाराच्या मोठ्या संधी उपलब्ध होणार असून, सुमारे ६०० तरुणांना थेट रोजगार मिळण्याची शक्यता वर्तवण्यात आली. विद्यार्थ्यांनी मोबाईलचा गैरवापर टाळून अभ्यासावर लक्ष केंद्रित करावे आणि शिक्षक-पालकांनीही मुलांच्या मोबाईल वापरावर लक्ष ठेवावे, असा मोलाचा सल्ला त्यांनी दिला.
शासनाकडून ग्रामीण व दुर्गम भागातील विद्यार्थ्यांच्या कल्याणासाठी विविध उपाययोजना केल्या जात आहेत, ज्याप्रमाणे आदिवासी विद्यार्थ्यांच्या हिताला सर्वोच्च प्राधान्य देऊन सुविधा पुरविल्या जात आहेत, त्याच धर्तीवर जि.प. शाळांनाही सर्वोत्कृष्ट बनवण्याचा मानस यावेळी व्यक्त करण्यात आला.
शेती, पर्यावरण आणि महिला सक्षमीकरणाचा संदेश
कार्यक्रमादरम्यान पालकमंत्री मेघना बोर्डीकर यांनी शेतकऱ्यांना एकात्मिक शेती, रेशीम शेती आणि मिश्र पिकांची पद्धत अवलंबण्याचे आवाहन केले. पर्यावरण संवर्धनासाठी शाळा परिसरात वृक्षारोपण करणे आणि प्लास्टिकचा वापर टाळणे आवश्यक असल्याचे त्यांनी नमूद केले. महिला बचत गटांना आर्थिकदृष्ट्या सक्षम करण्यासाठी ‘अहिल्या बचत गट भवन’ उभारण्याचे आश्वासन देत त्यांनी महिलांनी ‘लखपती दीदी’ मोहिमेचा लाभ घ्यावा, असे आवाहन केले.
गटविकास अधिकारी उदय जाधव यांनी प्रास्ताविकात सांगितले की, सेलू तालुक्यात पीएमश्री उपक्रमांतर्गत शाळांचा विकास वेगाने होत आहे. देऊळगाव गातच्या शाळेत लवकरच विद्यार्थिनींसाठी सॅनिटरी नॅपकिन व्हेंडिंग मशीन बसवण्यात येणार आहे. कार्यक्रमाचे नेटके सूत्रसंचालन दत्ता तांबे यांनी केले.