बारामती: तालुक्यात नुकत्याच झालेल्या वादळी पावसामुळे आणि गारपिटीमुळे शेतकऱ्यांचे मोठे नुकसान झाले आहे. विशेषतः काऱ्हाटी परिसरात केळीच्या बागांचे अतोनात नुकसान झाले असून, या पार्श्वभूमीवर सुनेत्रा अजित पवार यांनी प्रत्यक्ष शेतावर जाऊन बाधित पिकांची पाहणी केली. शेतकऱ्यांशी संवाद साधत त्यांनी, “राज्य शासन या संकटाच्या काळात शेतकऱ्यांच्या पाठीशी खंबीरपणे उभे असून, बाधित शेतकऱ्यांना तातडीने मदत दिली जाईल,” असे आश्वासन दिले.
या पाहणी दौऱ्यावेळी त्यांच्यासोबत उपविभागीय अधिकारी उत्तम दिघे, जिल्हा अधीक्षक कृषी अधिकारी संजय काचोळे, तहसीलदार स्वप्नील रावडे, तालुका कृषी अधिकारी सचिन हाके यांच्यासह स्थानिक लोकप्रतिनिधी आणि शेतकरी उपस्थित होते.
नुकसानीचे तात्काळ पंचनामे करण्याचे निर्देश
सुनेत्रा पवार यांनी प्रशासकीय अधिकाऱ्यांना युद्धपातळीवर पंचनामे पूर्ण करण्याचे निर्देश दिले आहेत. शेतकऱ्यांना वेळेत नुकसानभरपाई मिळण्यासाठी महसूल आणि कृषी विभागाने समन्वयाने काम करणे गरजेचे आहे. अलीकडच्या काळात राज्यातील विविध भागांत महसूल यंत्रणेचा आढावा घेऊन कामांना वेग देण्याचे प्रयत्न सुरू आहेत. याच धर्तीवर बारामती तालुक्यातही गतिमान आणि पारदर्शक प्रशासनावर भर देत तातडीने पंचनामे पूर्ण करण्याचे निर्देश देण्यात आले आहेत.
बाधित कुटुंबांना आर्थिक मदतीचे वाटप
२ जून रोजी माळवाडी (लोणी) येथे झालेल्या वादळात पत्र्याचे शेड अंगावर पडल्याने नंदाबाई जनार्धन लडकत यांचा दुर्दैवी मृत्यू झाला होता. सुनेत्रा पवार यांनी लडकत कुटुंबाची भेट घेऊन त्यांचे सांत्वन केले आणि शासनाच्या वतीने ४ लाख रुपयांचा सानुग्रह अनुदानाचा धनादेश सुपूर्द केला. याशिवाय, मरण पावलेल्या २ शेळ्यांसाठी ८ हजार रुपयांचा धनादेशही देण्यात आला.
तसेच वादळामुळे नुकसान सोसावे लागलेल्या इतर ग्रामस्थांनाही धनादेशाद्वारे मदत देण्यात आली. यामध्ये प्रल्हाद पांडुरंग लडकत यांना १६ हजार रुपये, बाळासाहेब अमृता लडकत यांना ८ हजार रुपये आणि नंदा प्रताप फरांदे यांना १२ हजार रुपयांची नुकसानभरपाई देण्यात आली.
तालुक्यात मोठे नुकसान; वीज पडल्याने पशुहानी
वादळी वाऱ्याचा फटका तालुक्यातील अनेक गावांना बसला असून मोठे नुकसान झाले आहे:
- गुणवडी: येथील राधा रवीन आगवणे यांच्या घराचे पत्रे उडून गेले आहेत.
- काऱ्हाटी: शेतकरी नारायण लोणकर यांच्या शेतातील सुमारे २५० ते ३०० केळीची झाडे उन्मळून पडली आहेत.
- मोडवे: गुलाब मोटे यांच्या १० शेळ्या, ३ मेंढ्या आणि १ पाळीव कुत्रा वीज पडून दगावल्याची धक्कादायक घटना घडली आहे.
एकूणच तालुक्यातील ४ गावांमधील सुमारे १६९ शेतकऱ्यांचे ९५ हेक्टर क्षेत्रावरील पिकांचे अतोनात नुकसान झाले आहे.
कृषी मंत्र्यांकडून काटेवाडी परिसराची पाहणी
दुसरीकडे, राज्याचे कृषी मंत्री दत्तात्रय भरणे यांनीही काटेवाडी आणि परिसरातील नुकसानग्रस्त भागाची पाहणी केली. त्यांनी प्रत्यक्ष बांधावर जाऊन शेतकऱ्यांशी चर्चा केली आणि नुकसानीचा आढावा घेत प्रशासनाला सविस्तर अहवाल सादर करण्याचे निर्देश दिले आहेत.