अमरावती: अमरावती ग्रामीण पोलिसांच्या वतीने जिल्ह्यातील तरुणाईला व्यसनाच्या विळख्यातून मुक्त करण्यासाठी राबविण्यात येत असलेल्या ‘ऑपरेशन कवच’ या मोहिमेअंतर्गत एक महत्त्वपूर्ण पाऊल उचलण्यात आले आहे. या उपक्रमाचा भाग म्हणून तयार करण्यात आलेल्या ‘नॉट नॉर्मल’ या व्यसनविरोधी लघुपटाच्या अधिकृत ट्रेलरचे अनावरण अमरावतीचे पालकमंत्री तथा महसूलमंत्री चंद्रशेखर बावनकुळे यांच्या हस्ते नियोजन भवन येथे दिमाखात करण्यात आले.
पालकमंत्री बावनकुळे यांच्या अध्यक्षतेखाली नियोजन भवन येथे विविध प्रशासकीय कामांच्या आढावा बैठका पार पडल्या. यापूर्वी पालकमंत्री महोदयांनी शेतीच्या कामासाठी रेती-माती वाहून नेणारे ट्रॅक्टर अडवू नका; अमरावतीतील ‘जनसंवाद’मध्ये पालकमंत्र्यांचे निर्देश दिले होते. याच बैठकींच्या पार्श्वभूमीवर सामाजिक उत्तरदायित्वाचा भाग म्हणून या लघुपटाच्या ट्रेलरचे लोकार्पण करण्यात आले.
‘नशामुक्त भारत’ आणि ‘नशामुक्त महाराष्ट्र’ अभियानाला बळ
पंतप्रधान नरेंद्र मोदी आणि केंद्रीय गृहमंत्री अमित शाह यांच्या संकल्पनेतील ‘नशामुक्त भारत’ अभियान तसेच उपमुख्यमंत्री देवेंद्र फडणवीस यांच्या ‘नशामुक्त महाराष्ट्र’ या उद्दिष्टाला प्रत्यक्ष कृतीची जोड देण्यासाठी अमरावती ग्रामीण पोलिसांनी हा नावीन्यपूर्ण प्रयोग केला आहे. पोलीस अधीक्षक निकेतन कदम यांच्या विशेष पुढाकारातून आणि मार्गदर्शनाखाली स्थानिक डिजिटल कलाकारांना सोबत घेऊन ‘नॉट नॉर्मल’ या लघुपटाची निर्मिती करण्यात आली आहे.
आजच्या काळात राज्यातील महाराष्ट्रातील तरुणांना परदेशात नोकरीची मोठी संधी आणि विकासाची नवी क्षितिजे खुली होत असताना, दुसरीकडे व्यसनाधीनतेचे वाढते प्रमाण चिंतेचा विषय ठरत आहे. याच पार्श्वभूमीवर तरुणाईला ड्रग्ज व अंमली पदार्थांच्या विळख्यातून वाचवणे आणि ‘नशेचा नकार… जीवनाचा स्वीकार!’ हा सकारात्मक विचार समाजात रुजविणे हा या लघुपटाचा मुख्य हेतू आहे.
स्थानिक कलाकारांचा दर्जेदार अभिनय आणि निर्मिती
या लघुपटाचे विशेष वैशिष्ट्य म्हणजे स्थानिक कंटेंट क्रिएटर्स आणि सोशल मीडिया इन्फ्लुएन्सर्स यांनी एकत्र येऊन सामाजिक बांधिलकीतून यामध्ये सहभाग घेतला आहे.
- लेखन व दिग्दर्शन: प्रेम माणिक
- छायांकन: शुभम जगदाळे
- प्रमुख कलाकार: ईश्वर सुतार, शितल भिलावेकर आणि आरिश शाह
कार्यक्रमाला आमदार प्रताप अडसड, उमेश यावलकर, प्रवीण तायडे, रवी राणा, केवलराम काळे यांच्यासह विभागीय आयुक्त नयना गुंडे, जिल्हाधिकारी आशिष येरेकर, मुख्य कार्यकारी अधिकारी सत्यम गांधी, मनपा आयुक्त डॉ. मंगेश गोंदावले आणि पोलीस अधीक्षक निकेतन कदम आदी मान्यवर उपस्थित होते. हा लघुपट व्यसनमुक्तीसाठी अत्यंत परिणामकारक माध्यम ठरेल असा विश्वास यावेळी उपस्थितांनी व्यक्त केला.