Maha Agri (सिंधुदुर्ग): कोकणातील बळीराजासाठी एक अत्यंत दिलासादायक बातमी समोर आली आहे. पुण्यश्लोक अहिल्यादेवी होळकर शेतकरी कर्जमुक्ती योजना २०२६ अंतर्गत सिंधुदुर्ग जिल्ह्यातील १५६९ पात्र शेतकऱ्यांच्या बँक खात्यावर पहिल्या टप्प्यात तब्बल ७ कोटी ७७ लाख ९८ हजार ६४४ रुपयांची रक्कम थेट वर्ग करण्यात आली आहे.
मुंबई येथे मुख्यमंत्री देवेंद्र फडणवीस यांच्या हस्ते राज्यस्तरीय कार्यक्रमात या निधीचे थेट वितरण करण्यात आले. याप्रसंगी जिल्ह्याचे पालकमंत्री नितेश राणे यांनी मुख्यमंत्र्यांचे आभार मानले तसेच जिल्ह्यातील प्रलंबित व तांत्रिक अडचणीत अडकलेल्या शेतकरी प्रकरणांवर विशेष सवलत देण्याची विनंती केली.
राज्यभरात या योजनेच्या पहिल्या टप्प्यात ६.२२ लाख पात्र शेतकऱ्यांना ५,०२९ कोटी रुपयांचा लाभ देण्यात आला आहे. या संदर्भातील सविस्तर राज्यस्तरीय माहिती जाणून घेण्यासाठी पुण्यश्लोक अहिल्यादेवी होळकर शेतकरी कर्जमुक्ती योजना: पहिल्या टप्प्यात ५,०२८ कोटींचे थेट वितरण हा लेख नक्की वाचा.
सिंधुदुर्ग जिल्ह्यातील कर्जमुक्तीची आकडेवारी काय सांगते?
सिंधुदुर्ग जिल्ह्यात आतापर्यंत कर्जमुक्ती पोर्टलवर अपलोड केलेल्या डेटाची सद्यस्थिती खालीलप्रमाणे आहे:
- एकूण अपलोड शेतकरी: ६,४९९
- पात्र ठरलेले शेतकरी: ३,७०८
- आधार प्रमाणीकरण पूर्ण: २,२९५ शेतकरी
- पहिल्या टप्प्यात लाभ मिळालेले: १,५६९ शेतकरी
उर्वरित पात्र शेतकरी जसे आधार प्रमाणीकरण (Aadhaar Authentication) पूर्ण करतील, तसतसा त्यांच्या खात्यात पुढील टप्प्यात कर्जमुक्तीचा निधी जमा केला जाणार आहे.
७४७ शेतकरी तांत्रिक अडचणींमुळे लाभापासून वंचित राहण्याची शक्यता
कर्जमुक्ती योजनेच्या ऑनलाईन प्रक्रियेत तांत्रिक व कायदेशीर कारणांमुळे ७४७ शेतकरी सध्या अडचणीत आले आहेत. यामध्ये प्रामुख्याने:
- मयत शेतकरी: १६९ प्रकरणे
- देवस्थान / कबुलायतदार जमिनी: ३३९ प्रकरणे
- संमतीपत्राने वाटप: २१५ प्रकरणे
- इतर तांत्रिक कारणे: २४ प्रकरणे
या सर्व प्रकरणांचा गंभीरपणे विचार करून शासनाने नियमावलीत विशेष शिथिलता आणि सवलत द्यावी, अशी आग्रही मागणी पालकमंत्री नितेश राणे यांनी मुख्यमंत्री देवेंद्र फडणवीस यांच्याकडे केली आहे.
उर्वरित २३० कर्जदारांचे आधार ऑथेंटिकेशन प्रलंबित
जिल्ह्यातील २३० कर्जदार शेतकऱ्यांचे आधार प्रमाणीकरण अजूनही बाकी आहे. तसेच फार्मर आयडी (Farmer ID) काढताना येणाऱ्या अडचणी आणि खावटी कर्ज पुरवठ्याबाबतही शेतकऱ्यांना दिलासा देण्याची गरज व्यक्त करण्यात आली आहे. कोकणाची भौगोलिक व आर्थिक रचना विचारात घेऊन एकाही पात्र शेतकऱ्यावर अन्याय होणार नाही, याची दक्षता घेण्याचे आश्वासन प्रशासनाकडून देण्यात आले आहे.
या योजनेचे स्वरूप, पात्रता आणि इतर निकषांबद्दल अधिक माहितीसाठी तुम्ही सहकार विभागाच्या मार्गदर्शक सूचना पाहू शकता. कर्जमुक्ती योजनेची सविस्तर पार्श्वभूमी समजून घेण्यासाठी सहकार सचिव प्रवीण दराडे यांची विशेष मुलाखत नक्की वाचा.
शेतकऱ्यांनी तातडीने काय करावे?
ज्या पात्र शेतकऱ्यांचे आधार प्रमाणीकरण अद्याप पूर्ण झालेले नाही, त्यांनी जवळच्या सीएससी (CSC) केंद्रावर किंवा बँकेत जाऊन आपले आधार प्रमाणीकरण लवकरात लवकर पूर्ण करून घ्यावे, जेणेकरून पुढील टप्प्यात कर्जमुक्तीची रक्कम खात्यात जमा होणे सुलभ होईल.