PM Kisan 23rd Installment Date: देशातील कोट्यवधी शेतकऱ्यांसाठी एक अतिशय दिलासादायक आणि आनंदाची बातमी समोर आली आहे. केंद्र सरकारच्या अत्यंत महत्त्वाकांक्षी असलेल्या ‘पंतप्रधान किसान सन्मान निधी’ (PM Kisan Samman Nidhi Yojana) योजनेच्या २३ व्या हप्त्याची तारीख अखेर जाहीर झाली आहे. खरीप हंगामाच्या सुरुवातीलाच शेतकऱ्यांच्या बँक खात्यात थेट २ हजार रुपये जमा होणार असल्याने शेतकऱ्यांना मोठा आर्थिक हातभार मिळणार आहे.
केंद्रीय कृषी मंत्रालयाने दिलेल्या माहितीनुसार, पीएम किसान योजनेचा २३ वा हप्ता २० जून २०२६ रोजी देशभरातील पात्र लाभार्थी शेतकऱ्यांच्या बँक खात्यात वर्ग केला जाणार आहे. आतापर्यंत शेतकऱ्यांना या योजनेचे यशस्विरित्या २२ हप्ते वितरित करण्यात आले आहेत. यापूर्वीचा २२ वा हप्ता १३ मार्च २०२६ रोजी पंतप्रधान नरेंद्र मोदी यांच्या हस्ते आसाममधील गुवाहाटी येथून जारी करण्यात आला होता.
खरीप हंगामात शेतकऱ्यांना मोठा आधार
सध्या मान्सूनचे आगमन झाले असून शेतकरी खरीप हंगामातील पेरणी आणि इतर कामांमध्ये व्यस्त आहेत. अशा वेळी बियाणे, खते आणि शेतीकामांसाठी पैशांची नितांत गरज असते. या पार्श्वभूमीवर २० जून रोजी जमा होणारा २ हजार रुपयांचा हप्ता शेतकऱ्यांसाठी अत्यंत महत्त्वाचा ठरेल. खरिपाच्या या काळात योग्य नियोजनासाठी शेतकरी खरीप हंगामाबाबत कृषी उपसंचालकांचे मार्गदर्शन घेऊ शकतात, जेणेकरून उत्पादनात चांगली वाढ होईल.
दुसरीकडे, शेतीतील वाढता खर्च आणि नैसर्गिक संकटामुळे शेतकरी आर्थिक अडचणीत आहेत. याच कारणास्तव राज्यातील विविध शेतकरी संघटनांनी शेतकऱ्यांची संपूर्ण कर्जमुक्तीची आग्रही मागणी सरकारकडे लावून धरली आहे.
योजनेबद्दल थोडक्यात माहिती
पंतप्रधान किसान सन्मान निधी योजनेची सुरुवात २४ फेब्रुवारी २०१९ रोजी झाली होती. या योजनेंतर्गत पात्र शेतकरी कुटुंबाला वर्षाला एकूण ६,००० रुपयांची आर्थिक मदत दिली जाते. ही रक्कम प्रत्येकी २,००० रुपयांच्या तीन समान हप्त्यांमध्ये थेट बँक खात्यात (DBT द्वारे) जमा केली जाते.
‘या’ चुकांमुळे तुमचा हप्ता अडकू शकतो!
जर तुम्हाला २३ व्या हप्त्याचा लाभ घ्यायचा असेल, तर खालील बाबींची काळजी घेणे अत्यंत आवश्यक आहे. अन्यथा तुमचा हप्ता थांबू शकतो:
- ई-केवायसी (e-KYC): ज्या शेतकऱ्यांनी अद्याप ई-केवायसी प्रक्रिया पूर्ण केलेली नाही, त्यांचा हप्ता अडकू शकतो.
- बँक खाते आधार सीडिंग: तुमचे बँक खाते आधार कार्डशी लिंक असणे बंधनकारक आहे.
- चुकीची माहिती: बँक खाते क्रमांक, आयएफएससी (IFSC) कोड किंवा नावामध्ये चुका असल्यास पैसे जमा होणार नाहीत.
- फार्मर आयडी (Farmer ID): शेतीची नोंदणी आणि फार्मर आयडी योग्य असणे आवश्यक आहे.
पीएम किसान लाभार्थी स्टेटस (Beneficiary Status) कसे तपासावे?
तुमच्या खात्यात पैसे जमा होणार की नाही, हे तपासण्यासाठी खालील सोप्या स्टेप्स फॉलो करा:
- सर्वप्रथम पीएम किसानच्या अधिकृत वेबसाईट pmkisan.gov.in वर जा.
- होमपेजवरील ‘Farmers Corner’ या विभागात जा आणि ‘Know Your Status’ या पर्यायावर क्लिक करा.
- त्यानंतर तुमचा नोंदणी क्रमांक (Registration Number) आणि स्क्रीनवर दिसणारा कॅप्चा कोड प्रविष्ट करा.
- ‘Get Data’ वर क्लिक करताच तुमचे स्टेटस समोर येईल. येथे तुम्ही तुमची ई-केवायसी स्थिती आणि बँक खाते आधार लिंक आहे की नाही, हे सहज पाहू शकता.