सिंधुदुर्गनगरी: सिंधुदुर्ग जिल्हा हे आपले स्वतःचे कुटुंब असून या कुटुंबावर ओढवणाऱ्या संभाव्य दुष्काळजन्य संकटावर मात करण्यासाठी समाजातील प्रत्येक घटकाने पुढे येणे काळाची गरज आहे. जिल्ह्यातील व्यापारी, उद्योजक, सामाजिक संस्था, तरुण वर्ग आणि दानशूर नागरिकांनी एकत्र येऊन लोकसहभागातून जलसंवर्धनाची एक मोठी लोकचळवळ उभी करावी, असे आवाहन सिंधुदुर्ग जिल्ह्याचे पालकमंत्री नितेश राणे यांनी केले आहे.
जिल्ह्यातील घटती भूजल पातळी आणि आगामी उन्हाळ्यातील संभाव्य पाणीटंचाईच्या पार्श्वभूमीवर मायनाक भंडारी सभागृहात विविध सामाजिक संस्था, संघटना आणि तज्ज्ञांची विशेष आढावा बैठक पालकमंत्री नितेश राणे यांच्या अध्यक्षतेखाली संपन्न झाली. या बैठकीत पाणीटंचाई निवारणासाठी तातडीने उपाययोजना आखण्यावर सविस्तर चर्चा करण्यात आली.
पाणीटंचाई निवारणासाठी व्यापक कृती आराखडा
बैठकीस जिल्हाधिकारी तृप्ती धोडमिसे, जिल्हा परिषदेचे अध्यक्ष प्रमोद कामत, मुख्य कार्यकारी अधिकारी डॉ. अपूर्वा बासुर, सिंधुदुर्ग जिल्हा बँकेचे अध्यक्ष मनीष दळवी आणि प्रभाकर सावंत यांच्यासह विविध क्षेत्रांतील मान्यवर उपस्थित होते. यापूर्वी प्रशासनाने सिंधुदुर्ग जिल्ह्यात संभाव्य पाणीटंचाईसाठी तात्काळ उपाययोजना करण्याचे नियोजन सुरू केले असून, आता त्याला व्यापक लोकसहभागाची जोड दिली जात आहे.
बैठकीत पालकमंत्री म्हणाले की, पाणीटंचाई केवळ कागदावर उपाययोजना करून मिटणार नाही, तर प्रत्यक्षात जलसंधारणाची कामे जमिनीवर उभी राहिली पाहिजेत. तालुका आणि गावपातळीवर स्थानिक गरजेनुसार कृती आराखडे तयार करून त्याची काटेकोर अंमलबजावणी करण्याचे स्पष्ट निर्देश त्यांनी प्रशासनाला दिले.
संस्था व दानशूर व्यक्तींचा तत्काळ पुढाकार
पालकमंत्र्यांच्या आवाहनाला प्रतिसाद देत बैठकीतच महत्त्वपूर्ण मदतीची घोषणा करण्यात आली:
- सिंधुदुर्ग जिल्हा बँक: जलसंधारणासाठी वनराई बंधारे बांधण्याकरिता तब्बल २५ हजार रिकामी सिमेंटची पोती मोफत देण्याची घोषणा जिल्हा बँकेचे अध्यक्ष मनीष दळवी यांनी केली.
- भगीरथ ग्रामविकास प्रतिष्ठान: दुष्काळ निवारण आणि जलसंधारण कामांसाठी १० लाख रुपयांचा विशेष निधी राखून ठेवल्याचे जाहीर केले.
- स्थानिक यंत्रणा व संघटना: जिल्ह्यातील जेसीबी, डंपर व्यावसायिक संघटना आणि शाळा-महाविद्यालयांतील एनसीसी, स्काऊट-गाईडचे स्वयंसेवक श्रमदानासाठी पुढे येणार आहेत.
राज्यातील विविध भागांमध्ये जसे दुष्काळाच्या पार्श्वभूमीवर जलसंधारण आणि पाणीटंचाई निवारणाची कामे वेगाने केली जात आहेत, त्याच धर्तीवर सिंधुदुर्गातही जलस्रोत बळकटीकरणाला प्राधान्य दिले जात आहे.
शास्त्रीय पद्धतीने जलसंधारण आणि चारा नियोजन
पाणी परिषदेचे डॉ. अविनाश पोळ यांनी भूजल सर्वेक्षण विभागाच्या सहकार्याने शास्त्रीय पद्धतीने जलसंधारणाची कामे आखण्याचा सल्ला दिला. याशिवाय जनावरांच्या पिण्याचे पाणी आणि चाऱ्याचा प्रश्न गंभीर होऊ नये म्हणून सध्या उपलब्ध असलेला हिरवा चारा कापून, वाळवून साठवून ठेवण्याचे नियोजन संस्थांच्या वतीने सुचवण्यात आले.
जिल्हाधिकारी तृप्ती धोडमिसे यांनी सांगितले की, प्रशासकीय प्रयत्नांना स्वयंसेवी संस्थांच्या अनुभवाची जोड मिळाल्यास टंचाईवर सहज मात करता येईल. ‘आपला जिल्हा, आपली जबाबदारी’ ही भावना मनात ठेवून सर्वांनी जलसंधारणाच्या या महायज्ञात सक्रिय सहभाग नोंदवावा, असा पुनरुच्चार शेवटी करण्यात आला.