धुळे: राज्य शासनाच्या महत्त्वाकांक्षी ‘पुण्यश्लोक अहिल्यादेवी होळकर शेतकरी कर्जमुक्ती योजना’ अंतर्गत लाभ वितरणाच्या तिसऱ्या टप्प्यात धुळे जिल्ह्यातील ३ हजार २५८ शेतकऱ्यांना तब्बल ३३ कोटी १ लाख रुपयांचा मोठा दिलासा मिळाला आहे. ही रक्कम थेट शेतकऱ्यांच्या कर्जखात्यांवर वर्ग करण्यात आली आहे. या कर्जमुक्तीमुळे शेतकऱ्यांच्या खांद्यावरील कर्जाचा बोजा हलका झाला असून, त्यांना आगामी हंगामासाठी नवीन पीक कर्ज मिळण्याचा मार्गही सुकर झाला असल्याची माहिती राज्याचे पणन व वस्त्रोद्योग मंत्री तथा धुळे जिल्ह्याचे पालकमंत्री जयकुमार रावल यांनी दिली.
धुळे जिल्ह्यातील कर्जमुक्तीचा लेखाजोखा
धुळे जिल्ह्यात सहकारी आणि राष्ट्रीयकृत बँकांच्या माध्यमातून कर्जमुक्ती योजनेची अंमलबजावणी वेगाने सुरू आहे. नाशिक विभागाचा विचार केल्यास विभागात सुमारे २.४८ लाख शेतकऱ्यांना २,१७४ कोटींचा लाभ देण्यात आला आहे. यामध्ये धुळे जिल्ह्यातील ३,२५८ शेतकरी कर्जमुक्त झाले आहेत.
धुळे जिल्हा मध्यवर्ती सहकारी बँकेच्या (DCCB) माध्यमातून आतापर्यंत तिन्ही टप्प्यांत पुढीलप्रमाणे निधी वितरित झाला आहे:
- पहिला टप्पा: ३,५९६ कर्जखात्यांना ₹३२.१४ कोटी
- दुसरा टप्पा: १,५९५ कर्जखात्यांना ₹१४.२१ कोटी
- तिसरा टप्पा: २०३ कर्जखात्यांना ₹१.७९ कोटी
अशा प्रकारे केवळ जिल्हा बँकेमार्फत ५,३९४ कर्जखात्यांना ४८ कोटी १३ लाख रुपयांचा निधी मंजूर करण्यात आला आहे.
राज्यात तिसऱ्या टप्प्यात कोट्यवधींचे वाटप
राज्यभरात कर्जमुक्ती योजनेची प्रक्रिया गतीने राबवली जात आहे. नुकताच शेतकरी कर्जमुक्तीचा तिसरा टप्पा सुरू झाला असून, या टप्प्यात राज्यभरातील ३ लाख २७ हजार २५० शेतकऱ्यांच्या खात्यात ३,१६०.४४ कोटींची मदत जमा करण्यात आली आहे. आतापर्यंत राज्यातील एकूण १५ लाख ८५ हजार ४९३ कर्जखात्यांवर १३ हजार २७५ कोटी रुपयांपेक्षा जास्त रक्कम वर्ग करण्यात आली आहे.
नैसर्गिक आपत्ती व दुष्काळी संकटाच्या काळात शेतकऱ्यांना आधार देण्यासाठी राज्य सरकार सातत्याने निर्णय घेत असून, महाराष्ट्रातील दुष्काळसदृश परिस्थिती जाहीर करून विविध सवलती देण्यासोबतच कर्जमुक्तीद्वारे बळीराजाला पुन्हा नव्याने उभे केले जात आहे.
आधार प्रमाणीकरण तातडीने पूर्ण करण्याचे आवाहन
पालकमंत्री जयकुमार रावल यांनी स्पष्ट केले की, योजनेच्या निकषानुसार पात्र ठरलेल्या शेतकऱ्यांची यादी आधार प्रमाणीकरणासाठी प्रसिद्ध करण्यात आली आहे. प्रसिद्ध झालेल्या यादीत नाव असूनही ज्या शेतकऱ्यांनी अद्याप प्रमाणीकरण केलेले नाही, त्यांनी तातडीने जवळच्या ‘आपले सरकार सेवा केंद्र’ (CSC) येथे जाऊन बायोमेट्रिक प्रमाणीकरण पूर्ण करावे.
प्रमाणीकरण पूर्ण होताच संबंधित पात्र लाभाची रक्कम त्वरित शेतकऱ्यांच्या बँक खात्यावर जमा होईल. तांत्रिक कारणामुळे किंवा प्रमाणीकरण बाकी असल्यामुळे जिल्ह्यातील एकही शेतकरी लाभापासून वंचित राहू नये, अशा सूचना प्रशासनाला देण्यात आल्या आहेत.
पात्र शेतकऱ्यांना तातडीने मिळणार नवे पीक कर्ज
कर्जमुक्तीचा मुख्य उद्देश केवळ जुने कर्ज माफ करणे एवढाच नसून शेतकऱ्याला आगामी शेतीकामासाठी सक्षम करणे हा आहे. त्यामुळे ज्या शेतकऱ्यांचे थकीत कर्ज नील (Zero) झाले आहे, अशा सर्व पात्र शेतकऱ्यांना बँकांनी विनाविलंब नवीन पीक कर्ज मंजूर करावे, असे स्पष्ट निर्देश सर्व बँकांना देण्यात आले आहेत. यामुळे धुळे जिल्ह्यातील शेतकऱ्यांना रब्बी व पुढील हंगामासाठी आर्थिक बळ मिळणार आहे.