बुलढाणा: समाजातील दिव्यांग, ज्येष्ठ नागरिक आणि गरजू घटकांना दैनंदिन जीवनात स्वावलंबी बनवण्यासाठी आवश्यक सहाय्यक उपकरणे उपलब्ध करून देणे ही समाजाची नैतिक व सामूहिक जबाबदारी आहे. अशा गरजूंची निस्वार्थ सेवा करणे हीच खरी ईश्वरसेवा आहे, असे प्रतिपादन केंद्रीय आरोग्य व कुटुंब कल्याण राज्यमंत्री प्रतापराव जाधव यांनी केले.
पंतप्रधान नरेंद्र मोदी यांच्या वाढदिवसानिमित्त देशभरात राबवल्या जाणाऱ्या ‘सेवा संकल्प अभियाना’चा भाग म्हणून बुलढाणा येथील ‘प्रधानमंत्री दिव्याशा केंद्र’ येथे विशेष साहित्य वाटप कार्यक्रमाचे आयोजन करण्यात आले होते. राज्यात विविध ठिकाणी अशा स्वरूपाचे उपक्रम सुरू असून, सेवा संकल्प अभियानांतर्गत सामाजिक न्याय विभागाकडून विविध लोककल्याणकारी उपक्रम सक्रियपणे राबविले जात आहेत.
२८० हून अधिक लाभार्थ्यांना २६ लाखांचे साहित्य वाटप
या कार्यक्रमात केंद्रीय राज्यमंत्री प्रतापराव जाधव यांच्या हस्ते २८० पेक्षा जास्त दिव्यांग व वयोवृद्ध लाभार्थ्यांना तब्बल २६ लाख रुपयांच्या विविध आधुनिक सहाय्यक साहित्याचे वितरण करण्यात आले. शारीरिक हालचालींवर मर्यादा आलेल्या आणि दैनंदिन कामांसाठी दुसऱ्यांवर अवलंबून असणाऱ्या नागरिकांना त्यांच्या गरजेनुसार व्हीलचेअर्स, कमोड चेअर्स, ट्रायसिकल आणि चालण्यासाठी सहाय्यक ठरणाऱ्या साधनांचे वाटप करण्यात आले.
या अभियानाची व्याप्ती स्पष्ट करताना त्यांनी सांगितले की, ज्याप्रमाणे मुंबईत ‘सेवा संकल्प अभियान’ अंतर्गत मोफत आरोग्य तपासणी व सामाजिक उपक्रम राबवले जात आहेत, त्याच धर्तीवर ग्रामीण भागातील शेवटच्या घटकांपर्यंत शासकीय योजनांचा लाभ पोहोचवण्यासाठी प्रशासन कटिबद्ध आहे.
आयुष्मान भारत योजनेचा लाभ घेण्याचे आवाहन
ज्येष्ठ नागरिकांना उतारवयात गंभीर आजारांवरील उपचारांचा मोठा आर्थिक भुर्दंड सहन करावा लागू नये, यासाठी केंद्र शासनाने ‘आयुष्मान भारत प्रधानमंत्री जन आरोग्य योजना’ सुरू केली आहे. ग्रामीण भागातील नागरिकांनी आशा सेविका, आरोग्य कर्मचारी आणि ग्रामस्तरावरील आरोग्य यंत्रणेशी संपर्क साधून आपली आयुष्मान कार्डे तातडीने तयार करून घ्यावीत, असे आवाहन प्रतापराव जाधव यांनी केले. संकटसमयी उपचारासाठी धावपळ होऊ नये म्हणून आधीच आवश्यक आरोग्य ओळखपत्रे तयार ठेवणे आवश्यक असल्याचे त्यांनी स्पष्ट केले.
जिल्ह्यात आरोग्य सुविधांचे जाळे सक्षम होणार – आमदार संजय गायकवाड
कार्यक्रमास उपस्थित आमदार संजय गायकवाड यांनी सांगितले की, बुलढाणा जिल्ह्यात शासकीय वैद्यकीय महाविद्यालय आणि आयुर्वेदिक महाविद्यालयाचे काम वेगाने प्रगतीपथावर आहे. यामुळे सर्वसामान्य नागरिकांना उत्तम दर्जाच्या आरोग्य सुविधा स्थानिक पातळीवरच उपलब्ध होतील. तसेच उतारवयात आई-वडिलांची व ज्येष्ठ नागरिकांची काळजी घेणे हे प्रत्येक कुटुंबाचे कर्तव्य असून समाजानेही दिव्यांगांच्या सक्षमीकरणासाठी पुढे आले पाहिजे, असे त्यांनी नमूद केले.
या प्रसंगी नगराध्यक्ष पूजा गायकवाड, जिल्हाधिकारी डॉ. प्रवीणकुमार देवरे, जिल्हा परिषद मुख्य कार्यकारी अधिकारी गुलाब खरात, जिल्हा शल्यचिकित्सक डॉ. दत्तात्रय बिराजदार, महिला व बालविकास अधिकारी प्रमोद एंडोले, डॉ. गौरव बरोई, दिव्यांग कल्याण व पुनर्वसन संस्थेचे अध्यक्ष सुरेश छाजेळ, सचिव जयसिंग जयवार यांच्यासह अनेक मान्यवर व नागरिक मोठ्या संख्येने उपस्थित होते.