मुंबई: पंतप्रधान नरेंद्र मोदी यांच्या सार्वजनिक सेवेतील २५ वर्षांच्या उल्लेखनीय कार्यपूर्तीचे औचित्य साधून महाराष्ट्र शासनाच्या सामाजिक न्याय व विशेष सहाय्य विभागाच्या वतीने राज्यभरात १७ सप्टेंबर ते १७ ऑक्टोबर दरम्यान महिनाभरासाठी ‘सेवा संकल्प अभियान’ राबविण्यात येत आहे. या अभियानांतर्गत शासकीय योजनांची माहिती तळागाळातील नागरिकांपर्यंत पोहोचवणे आणि विविध समाजोपयोगी उपक्रम राबविण्यावर विशेष भर दिला जात आहे.
सामाजिक न्याय मंत्री संजय शिरसाट, राज्यमंत्री माधुरी मिसाळ आणि प्रधान सचिव डॉ. हर्षदीप कांबळे यांच्या मार्गदर्शनाखाली हे अभियान संपूर्ण महाराष्ट्रात प्रभावीपणे राबवले जात आहे. या संदर्भात आयुक्त डॉ. दीपा मुंडे-मुधोळ यांनी क्षेत्रीय अधिकाऱ्यांना आवश्यक सूचना जारी केल्या आहेत. यापूर्वी पंतप्रधान नरेंद्र मोदी यांच्या वाढदिवसानिमित्त राज्यपाल जिष्णु देव वर्मा यांच्या हस्ते ‘आशीर्वादाचा दिवा’ प्रज्वलित करून विविध सेवा उपक्रमांना सुरुवात करण्यात आली होती, त्याच धर्तीवर हे अभियानही पुढे नेले जात आहे.
‘संवाद सेतू’च्या माध्यमातून थेट नागरिकांशी संवाद
सामाजिक न्याय विभागाच्या कल्याणकारी योजनांचा थेट लाभ पात्र लाभार्थ्यांपर्यंत पोहोचविणे हा या अभियानाचा मुख्य उद्देश आहे. यासाठी जिल्हा पातळीवर ‘संवाद सेतू’ कार्यक्रमांचे आयोजन करण्यात येत आहे. या उपक्रमाद्वारे लाभार्थ्यांच्या जीवनात योजनांमुळे घडून आलेल्या सकारात्मक बदलांचा संवाद घडवून आणला जाईल.
तसेच, प्रशासकीय सेवा अधिक सुलभ करून नागरिकांना वेळेत दाखले व सेवा पुरवण्यासाठी शासनाचा प्रयत्न सुरू असून, जसे लोकसेवा हक्क कायद्याच्या प्रभावी अंमलबजावणीसाठी विविध पातळ्यांवर काम सुरू आहे, त्याचप्रमाणे या मोहिमेत ग्रामीण भागातील गरजू विद्यार्थ्यांना आवश्यक विविध जात प्रमाणपत्रे व इतर कागदपत्रांचे वेळेत वाटप करण्याचे नियोजन करण्यात आले आहे.
‘सेवा माझे योगदान’ अंतर्गत होणारे विविध उपक्रम
या अभियानांतर्गत अधिकारी व कर्मचाऱ्यांच्या सहभागातून खालीलप्रमाणे विविध सामाजिक उपक्रम राबवले जाणार आहेत:
- आरोग्य व रक्तदान: रक्तदान शिबिरे, मोफत सर्वसाधारण आरोग्य तपासणी आणि महिला आरोग्य व स्वच्छता जनजागृती.
- पर्यावरण व स्वच्छता: व्यापक वृक्षारोपण मोहीम आणि सार्वजनिक परिसराची स्वच्छता.
- संवेदनशील घटकांना भेट: अनाथालये, वृद्धाश्रम यांना भेटी देऊन आवश्यक मदत व संवाद.
- दिव्यांग व डिजिटल साक्षरता: दिव्यांग व्यक्तींसाठी सहाय्य उपक्रम तसेच डिजिटल साक्षरतेवर भर.
शासकीय वसतिगृहांमध्ये ‘विकसित भारत’ स्पर्धांचे आयोजन
सामाजिक न्याय विभागाच्या अखत्यारीतील शासकीय वसतिगृहे, निवासी शाळा आणि अनुदानित वसतिगृहांमध्ये विद्यार्थ्यांसाठी ‘विकसित भारत’ या संकल्पनेवर आधारित चित्रकला, निबंध आणि वक्तृत्व स्पर्धा आयोजित करण्यात येणार आहेत. तसेच, योजनांचा लाभ घेतलेल्या यशस्वी लाभार्थ्यांच्या यशोगाथा (Success Stories), व्हिडीओ आणि प्रतिक्रिया डिजिटल माध्यमातून सोशल मीडियावर प्रसारित करून जनजागृती अधिक व्यापक करण्यात येणार आहे.