मुंबई: महाराष्ट्रात अन्न व औषध प्रशासनाने (FDA) प्रतिबंधित गुटखा, पानमसाला आणि इतर आरोग्यास घातक तंबाखूजन्य पदार्थांच्या विक्रीविरोधात मोठी मोहीम हाती घेतली आहे. ३० आणि ३१ मे रोजी संपूर्ण राज्यात राबविण्यात आलेल्या धडक मोहिमेत तब्बल ३२ आरोपींना अटक करण्यात आली असून २६ दुकाने व आस्थापने सील करण्यात आली आहेत. या कारवाई दरम्यान १२ लाख १६ हजार ९६५ रुपये किमतीचा मुद्देमाल जप्त करण्यात आला आहे.
अन्न व औषध प्रशासनाचे आयुक्त तुकाराम मुंढे यांच्या थेट निर्देशानुसार बृहन्मुंबई, कोकण, पुणे, नाशिक, छत्रपती संभाजीनगर आणि अमरावती या विभागांमध्ये ही मोठी कारवाई करण्यात आली. यामध्ये कोकण विभागात सर्वाधिक कारवाई झाली असून, येथील १६ आस्थापनांवर कारवाई करून १६ जणांना अटक करण्यात आली आहे.
विभागीय पातळीवर झालेली मोठी कारवाई:
- कोकण विभाग: १६ आस्थापनांवर धाड टाकून १६ जणांना अटक.
- बृहन्मुंबई: एका ठिकाणी कारवाई करून २ आरोपींना अटक.
- पुणे विभाग: ३ ठिकाणी कारवाई करून २ जणांना अटक.
- नाशिक विभाग: २ ठिकाणी कारवाई करून २ आरोपींना अटक.
- छत्रपती संभाजीनगर: ११ ठिकाणी धडक कारवाई करून ७ जणांना अटक.
- अमरावती विभाग: ३ ठिकाणी कारवाई करून ३ आरोपींना अटक.
समाजातील अशा बेकायदेशीर आणि आरोग्याला घातक ठरणाऱ्या कृत्यांवर आळा घालण्यासाठी प्रशासनासोबतच मूल्याधिष्ठित पत्रकारिता आणि सजग नागरिक अत्यंत महत्त्वाची भूमिका बजावू शकतात.
कडक कायद्यांतर्गत गुन्हे दाखल
प्रतिबंधित गुटखा आणि पानमसाला विक्रेत्यांवर केवळ जप्तीची कारवाई न करता, त्यांच्यावर गंभीर स्वरूपाचे गुन्हे दाखल करण्यात आले आहेत. यामध्ये भारतीय न्याय संहिता (BNS) चे कलम १२३, २२३, २७४, २७५ आणि अन्न सुरक्षा मानके कायद्याच्या कलम २६, २७, ३०(२) (a) आणि कलम ५९ अंतर्गत गुन्हे (FIR) नोंदवून आरोपींना अटक करण्यात आली आहे.
नागरिकांना आयुक्त तुकाराम मुंढे यांचे आवाहन
अन्नपदार्थांच्या दर्जाबाबत किंवा भेसळीबाबत शंका आल्यास नागरिकांनी थेट अन्न व औषध प्रशासनाशी संपर्क साधून तक्रार करावी, असे आवाहन आयुक्त तुकाराम मुंढे यांनी केले आहे. तक्रार करताना स्वतःचे नाव, संपर्क क्रमांक, भेसळ होणाऱ्या आस्थापनेचा अचूक पत्ता आणि अन्नपदार्थाची माहिती देणे गरजेचे आहे.
हवामान आणि आरोग्याच्या दृष्टीने जागरूक राहण्यासाठी आमचे इतर अपडेट्स, जसे की महाराष्ट्र मान्सून अपडेट आणि शेती सल्ला देखील नक्की वाचा.