मुंबई: महाराष्ट्राच्या पूर्व आणि पश्चिम सीमांना जोडण्यासाठी राज्य सरकारने एक मोठे पाऊल उचलले आहे. विदर्भातील दळणवळण व्यवस्था अधिक सक्षम करण्यासाठी आणि विकासाला गती देण्यासाठी ५४७ किलोमीटर लांबीच्या चार नवीन प्रवेश नियंत्रित द्रुतगती महामार्ग (Expressway) प्रकल्पांना मुख्यमंत्री देवेंद्र फडणवीस यांच्या अध्यक्षतेखालील पायाभूत सुविधा समितीच्या बैठकीत प्रशासकीय मंजुरी देण्यात आली आहे.
५१,९०६ कोटींचे महाप्रकल्प
या महत्त्वाकांक्षी प्रकल्पांची एकूण स्थापत्य किंमत ३२,४७८ कोटी रुपये असून, संपूर्ण बांधकाम खर्च ५१,९०६.३५ कोटी रुपये इतका अंदाजित आहे. हे काम ‘महाराष्ट्र राज्य रस्ते विकास महामंडळ’ (MSRDC) मार्फत पूर्ण केले जाणार असून, हे सर्व प्रकल्प सप्टेंबर २०२८ ते डिसेंबर २०२८ या कालावधीत पूर्ण करण्याचे नियोजन सरकारने केले आहे.
विदर्भाच्या या पायाभूत सुविधांमधील प्रगतीला नागपूर विमानतळाच्या आधुनिकीकरणामुळे अधिक वेग मिळणार असून, यामुळे संपूर्ण पूर्व महाराष्ट्राचा चेहरामोहरा बदलणार आहे.
मंजूर झालेले ४ मुख्य महामार्ग आणि त्यांची वैशिष्ट्ये:
१. नागपूर – गोंदिया द्रुतगती मार्ग
- लांबी: १६२.३७७ कि.मी.
- मार्ग: गवसी मानपूर (नागपूर) ते सावरी (गोंदिया).
- लेन: ३+३ (सहा पदरी).
- भूसंपादन: १६३४.२७ हेक्टर.
- फायदा: नागपूर, भंडारा आणि गोंदिया या तीन जिल्ह्यांना थेट कनेक्टिव्हिटी मिळणार.
२. भंडारा- गडचिरोली द्रुतगती मार्ग
- लांबी: ९४.२४१ कि.मी.
- मार्ग: बोरगाव (भंडारा) ते ऋणमोचन (चंद्रपूर).
- लेन: ३+३ (सहा पदरी).
- फायदा: भंडारा, गोंदिया आणि गडचिरोली या जिल्ह्यांमधील व्यापार वाढीस मदत होईल.
३. नागपूर-चंद्रपूर द्रुतगती मार्ग
- लांबी: २०४.७९९ कि.मी.
- मार्ग: सेलडोह (वर्धा) ते नवेगाव मोरे (चंद्रपूर).
- लेन: २+२ (चार पदरी).
- फायदा: नागपूर आणि चंद्रपूर जिल्ह्यातील ९ तालुक्यांना याचा थेट लाभ होईल.
४. नवेगाव मोरे- कोनसारी ते सुरजागड ग्रीन फिल्ड रस्ता
- लांबी: ८५.७६५ कि.मी.
- मार्ग: नवेगाव मोरे (चंद्रपूर) ते मंगेर (गडचिरोली).
- महत्व: हा मार्ग प्रामुख्याने खनिज वाहतुकीसाठी अत्यंत महत्त्वाचा ठरणार असून तो समृद्धी महामार्गाला जोडला जाणार आहे.
रस्ते विकास प्रकल्प राबवताना कामाच्या गुणवत्तेवर आणि पारदर्शकतेवर शासनाचा विशेष भर आहे. यापूर्वी न्हावरा फाटा ते जामखेड महामार्ग कामात झालेल्या हलगर्जीपणाची दखल घेत जशी कडक कारवाई करण्यात आली होती, तसाच पारदर्शकपणा याही प्रकल्पांत राखण्याच्या सूचना देण्यात आल्या आहेत.
विकासाचा महामार्ग: खनिजे आणि उद्योगांना मिळणार चालना
मुख्यमंत्री देवेंद्र फडणवीस यांनी निर्देश दिले आहेत की, नवेगाव मोरे ते सुरजागड हा मार्ग विदर्भातील खनिज संपत्तीच्या वाहतुकीसाठी अत्यंत महत्त्वाचा आहे, त्यामुळे याचे काम प्राधान्याने पूर्ण करावे. तसेच, पश्चिम महाराष्ट्र ते कोकणाला जोडणाऱ्या टनेल रस्त्याबाबतही अभ्यास करण्याचे आदेश यावेळी देण्यात आले आहेत. या नवीन महामार्गांमुळे विदर्भातील मागास भागांत उद्योगांचे जाळे निर्माण होण्यास मदत होईल.