नागपूरच्या विकासाला मोठी गती! बाह्यवळण रस्ता, ४ वाहतूक बेट आणि आंतरराष्ट्रीय व्यापार केंद्राला मंजुरी

नागपूर शहराच्या पायाभूत सुविधा आणि आर्थिक प्रगतीसाठी राज्य सरकारने एक अत्यंत महत्त्वपूर्ण निर्णय घेतला आहे. नागपूर शहराभोवती बाह्यवळण रस्ता (Ring Road) विकसित करणे आणि त्यालगत ४ आधुनिक वाहतूक बेटे (Truck and Bus Terminus) उभारण्याच्या प्रस्तावाला मुख्यमंत्री देवेंद्र फडणवीस यांनी मंजुरी दिली आहे.

सह्याद्री अतिथीगृह येथे नागपूर महानगर प्रदेश विकास प्राधिकरणाची (NMRDA) ११ वी बैठक मुख्यमंत्री फडणवीस यांच्या अध्यक्षतेखाली पार पडली. या बैठकीला उपमुख्यमंत्री एकनाथ शिंदे, नागपूरचे पालकमंत्री चंद्रशेखर बावनकुळे आणि वरिष्ठ प्रशासकीय अधिकारी उपस्थित होते. या बैठकीत नागपूरच्या भविष्यातील गरजा लक्षात घेऊन अनेक महत्त्वाकांक्षी प्रकल्पांवर शिक्कामोर्तब करण्यात आले.

आंतरराष्ट्रीय व्यापार आणि आर्थिक केंद्र (IBFC)

नवीन नागपूर अंतर्गत ‘आंतरराष्ट्रीय व्यापार आणि आर्थिक केंद्र’ (IBFC) विकसित करण्याचा महत्त्वाचा निर्णय या बैठकीत घेण्यात आला. या प्रकल्पासाठी तसेच बाह्यवळण रस्त्यासाठी हुडकोकडून (HUDCO) कर्ज मिळवण्याचे अधिकार महानगर आयुक्तांना प्रदान करण्यात आले आहेत. ज्याप्रमाणे छ्त्रपती संभाजीनगरच्या विकासाला मोठी गती देण्यासाठी विशेष निधीची तरतूद करण्यात आली आहे, त्याच धर्तीवर नागपूरच्या पायाभूत सुविधांसाठी मोठा निधी उभारला जात आहे.

पाणीपुरवठ्यासाठी ५० किमी लांबीची जलवाहिनी

नागपूर महानगर क्षेत्राची भविष्यातील पाण्याची निकड पूर्ण करण्यासाठी ‘वैनगंगा-नळगंगा नदीजोड’ प्रकल्पांतर्गत ५० किमी लांबीच्या जमिनीचे अधिग्रहण करण्यास मंजुरी देण्यात आली आहे. या प्रकल्पासाठी १० मीटर रुंदीची जागा आरक्षित केली जाणार असून यामुळे नागपूरच्या ग्रामीण आणि शहरी भागातील पाण्याचा प्रश्न सुटण्यास मदत होईल. नागपूरच्या विकासासाठी आणि शेतकऱ्यांच्या हितासाठी प्रशासन विशेष प्रयत्नशील असल्याचे यावेळी स्पष्ट झाले.

बैठकीतील इतर महत्त्वाचे निर्णय:

• अर्थसंकल्पास मान्यता: प्राधिकरणाच्या २०२५-२०२६ आणि २०२६-२०२७ च्या सुधारित व अनुमानित अर्थसंकल्पास मान्यता देण्यात आली.
• NMRDA लोगो: नागपूर महानगर प्रदेश विकास प्राधिकरणाच्या लोगोला व्यापार चिन्ह (Trademark) म्हणून कॉपीराईटसह वापरण्यास मंजुरी मिळाली.
• कर्ज योजना: महाराष्ट्र नागरी पायाभूत सुविधा विकास कर्ज योजनेअंतर्गत (MUIF) निधी उभारण्यास मान्यता देण्यात आली.

या प्रकल्पांमुळे नागपूरच्या दळणवळण व्यवस्थेत सुधारणा होईलच, शिवाय आंतरराष्ट्रीय स्तरावरील आर्थिक केंद्रामुळे रोजगाराच्या नवीन संधीही उपलब्ध होतील. नागपूरच्या दीर्घकालीन शहरी आणि आर्थिक विकासाला यामुळे मोठी चालना मिळणार आहे.