नागपूर शहराच्या विकासाला नवी गती; पायाभूत सुविधांच्या मोठ्या प्रकल्पांना हिरवा कंदील
नागपूर: नागपूर शहराला जागतिक स्तरावरील व्यापार आणि दळणवळणाचे केंद्र बनवण्यासाठी राज्य सरकारने महत्त्वपूर्ण पाऊल उचलले आहे. नागपूर शहराभोवती भव्य बाह्यवळण रस्ता (Ring Road), त्यालगत ४ आधुनिक वाहतूक बेट (ट्रक आणि बस टर्मिनस) आणि एक भव्य आंतरराष्ट्रीय व्यापार आणि आर्थिक केंद्र (IBFC) विकसित करण्यास मुख्यमंत्री देवेंद्र फडणवीस यांनी मंजुरी दिली आहे.
सह्याद्री अतिथीगृह येथे पार पडलेल्या नागपूर महानगर प्रदेश विकास प्राधिकरणाच्या (NMRDA) ११ व्या बैठकीत हे महत्त्वपूर्ण निर्णय घेण्यात आले. या बैठकीला उपमुख्यमंत्री एकनाथ शिंदे, राज्यमंत्री माधुरी मिसाळ आणि नागपूरचे पालकमंत्री चंद्रशेखर बावनकुळे (व्हिडिओ कॉन्फरन्सिंगद्वारे) उपस्थित होते. राज्याच्या सर्वांगीण प्रगतीसाठी आणि विकसित महाराष्ट्र-२०४७ चे ध्येय गाठण्यासाठी हे प्रकल्प अत्यंत मोलाचे ठरणार आहेत.
प्रकल्पाची ठळक वैशिष्ट्ये आणि निधीची तरतूद
या बैठकीत नागपूर महानगर प्रदेश विकास प्राधिकरणाच्या २०२५-२६ च्या सुधारित आणि २०२६-२७ च्या अनुमानित अंदाजपत्रकास मान्यता देण्यात आली. मुख्यमंत्र्यांनी या प्रकल्पांसाठी हुडकोकडून (HUDCO) कर्ज घेण्यासाठी महानगर आयुक्तांना अधिकार प्रदान केले आहेत. यासोबतच महाराष्ट्र अर्बन इन्फास्ट्रक्चर फंड (MUIF) कडून मिळणाऱ्या कर्जाच्या प्रस्तावांनाही मंजुरी देण्यात आली आहे.
जसे सध्या छत्रपती संभाजीनगरचा विकास सुसाट वेगाने सुरू आहे, त्याच धर्तीवर नागपूरमध्येही आधुनिक पायाभूत सुविधांचे जाळे विणले जाणार आहे.
पाणीपुरवठ्यासाठी वैनगंगा-नळगंगा नदीजोड प्रकल्पाचा आधार
भविष्यातील नागपूर शहराची वाढती लोकसंख्या आणि पाण्याची गरज ओळखून एक मोठा निर्णय घेण्यात आला आहे. गोसीखुर्द सिंचन प्रकल्पातून नागपूर महानगर क्षेत्रापर्यंत जलवाहिनी टाकण्यासाठी वैनगंगा-नळगंगा नदीजोड प्रकल्पांतर्गत अधिकचे १० मीटर रुंदीचे आणि सुमारे ५० किलोमीटर लांबीचे भूसंपादन करण्यास मान्यता देण्यात आली आहे. यामुळे शहराच्या पिण्याच्या पाण्याचा प्रश्न दीर्घकाळासाठी सुटण्यास मदत होईल.
नवीन नागपूर आणि ‘IBFC’ चे स्वप्न
नागपूरमध्ये ‘नवीन नागपूर’ अंतर्गत आंतरराष्ट्रीय व्यापार आणि आर्थिक केंद्र (International Business and Finance Centre) उभारले जाणार आहे. हे केंद्र व्यावसायिक गुंतवणुकीसाठी आकर्षणाचे ठिकाण ठरेल. तसेच, NMRDA च्या स्वतःच्या लोगोला व्यापार चिन्ह (Trademark) म्हणून कॉपीराईटसह वापरण्यासही मंजुरी देण्यात आली आहे.
या सर्व निर्णयामुळे नागपूरचा चेहरामोहरा बदलणार असून, यामुळे स्थानिक रोजगार वाढण्यास आणि शहराच्या आर्थिक विकासाला मोठी चालना मिळणार आहे.