नागपूर: जागतिक बँकेच्या अहवालानुसार नागपूर हे देशातील एक अत्यंत वेगाने विकसित होणारे शहर ठरत आहे. पायाभूत सुविधांच्या विकासामुळे शहराचा कायापालट होत असून नागपूरला एका वैश्विक शहराची नवी ओळख मिळत आहे. या पार्श्वभूमीवर नागपूरच्या सुनियोजित आणि शाश्वत विकासासाठी निधीची कोणतीही कमतरता भासू दिली जाणार नाही, अशी ठाम ग्वाही राज्याचे मुख्यमंत्री देवेंद्र फडणवीस यांनी दिली आहे.
नागपूर महानगरपालिकेच्या ऐतिहासिक हिरवळीवर आयोजित एका विशेष सोहळ्यात ते बोलत होते. या कार्यक्रमात शहरातील ४७६ स्वच्छतादूतांना (सफाई कामगार) कायम स्वरूपी नियुक्तीपत्रे, तसेच सरळसेवा भरतीद्वारे १०३ गुणवंत युवकांना नियुक्तीपत्रांचे वाटप करण्यात आले. या सोहळ्याच्या अध्यक्षस्थानी केंद्रीय रस्ते वाहतूक व महामार्ग मंत्री नितीन गडकरी उपस्थित होते.
सफाई कामगारांसाठी मोफत घरकुल आणि मोठी घोषणा
शहराचे आरोग्य आणि स्वच्छता टिकवून ठेवणाऱ्या स्वच्छतादूतांच्या पाठीशी राज्य सरकार खंबीरपणे उभे आहे. लाड-पागे समितीच्या शिफारशींची प्राधान्याने अंमलबजावणी करत ४७६ स्वच्छतादूतांना कायम सेवेत समाविष्ट करण्यात आले आहे. याशिवाय, नागपूर महानगरपालिकेने स्वच्छता कर्मचाऱ्यांसाठी ३०० चौरस फुटांची मोफत घरे देण्याची अभिनव योजना सुरू केली आहे. ही योजना राबवणारे नागपूर हे राज्यातील पहिले शहर ठरले आहे. अतिरिक्त बांधकाम हवे असल्यास नाममात्र शुल्कात मोठे घर देण्याचा निर्णयही घेण्यात आला आहे.
नागपूर आणि विदर्भाच्या सर्वांगीण विकासासाठी राज्य शासन विविध आघाड्यांवर काम करत आहे. पायाभूत सुविधांसोबतच आरोग्य सेवेत सुधारणा करण्यासाठी सातत्याने प्रयत्न केले जात आहेत. यादृष्टीने नागपुरात ‘न्यू एरा हॉस्पिटल’चे मुख्यमंत्री देवेंद्र फडणवीस यांच्या हस्ते भव्य उद्घाटन करून विदर्भातील नागरिकांना जागतिक दर्जाच्या वैद्यकीय सुविधा उपलब्ध करून देण्यात आल्या आहेत.
कौशल्य विकास आणि नवीन तंत्रज्ञानाचा अवलंब
नागपूरच्या झपाट्याने होणाऱ्या विकासामुळे आणि उंचावणाऱ्या इमारतींमुळे प्रशिक्षित मनुष्यबळाची गरज निर्माण झाली आहे. यासाठी सफाई कामगारांच्या मुलांसाठी महानगरपालिकेने विशेष कौशल्य विकास प्रशिक्षण कार्यक्रम सुरू करावा, अशी सूचना मुख्यमंत्र्यांनी केली. शहराच्या शाश्वत आणि पर्यावरणाभिमुख विकासावर भर देताना त्यांनी स्वच्छता व पर्यावरणाचे महत्त्व अधोरेखित केले. यापूर्वीही पर्यावरणाचा संदेश हाच संतांचा विचार! ‘पर्यावरणाची वारी पंढरीच्या दारी’ उपक्रमात मुख्यमंत्री देवेंद्र फडणवीस यांचे प्रतिपादन आपण ऐकले आहे.
स्मार्ट वाहतूक सेवा आणि २४ तास पाणीपुरवठा: नितीन गडकरी
अध्यक्षीय भाषणात केंद्रीय मंत्री नितीन गडकरी यांनी स्पष्ट केले की, शहराच्या भौतिक विकासासोबतच स्वच्छता, खेळाची मैदाने, २४ तास पाणीपुरवठा आणि पारदर्शक प्रशासनाला प्राधान्य दिले पाहिजे. प्रत्येक प्रभागात मुलांसाठी खेळाची मैदाने व बेरोजगारांसाठी कौशल्य विकास केंद्र सुरू करण्यावर भर द्यावा, असे त्यांनी सुचवले.
याच कार्यक्रमात नागपूरकरांसाठी ‘आपली बस’ या सार्वजनिक वाहतूक सेवेचे तिकीट व्हॉट्सॲप (WhatsApp) द्वारे डिजिटल पद्धतीने उपलब्ध करून देण्याच्या सुविधेचा शुभारंभ करण्यात आला. यामुळे नागपूर शहर अधिक ‘स्मार्ट’ आणि डिजिटल होण्याच्या दिशेने एक पाऊल पुढे पडले आहे.
कार्यक्रमाचे प्रास्ताविक महापौर नीता ठाकरे यांनी केले, तर उपमहापौर लीना हाथीबेड यांनी उपस्थितांचे आभार मानले. या प्रसंगी पालकमंत्री चंद्रशेखर बावनकुळे, आमदार मोहन मते, कृष्णा खोपडे, मनपा आयुक्त डॉ. विपिन इटनकर, आणि विविध पदाधिकारी व नगरसेवक मोठ्या संख्येने उपस्थित होते.