मुंबई: महाराष्ट्रातील अतिमागास भटके विमुक्त समाजाच्या विविध प्रश्नांवर तोडगा काढण्यासाठी भटके विमुक्त विकास परिषदेच्या शिष्टमंडळाने नुकतीच राज्यपाल जिष्णु देव वर्मा यांची भेट घेतली. मुंबईतील लोकभवन येथे पार पडलेल्या या बैठकीत समाजातील ज्वलंत समस्यांवर सविस्तर चर्चा करण्यात आली.
यावेळी राज्यपालांनी शिष्टमंडळाला आश्वासित केले की, अतिमागास भटक्या विमुक्त समाजातील प्रतिनिधींना लवकरच लोकभवन येथे निमंत्रित करून त्यांच्या समस्या सविस्तरपणे जाणून घेतल्या जातील. राज्यपालांनी घेतलेली ही सकारात्मक भूमिका समाजासाठी अत्यंत महत्त्वाची मानली जात आहे. विशेष म्हणजे, अलीकडेच राज्यपालांनी राज्यपालांच्या ताफ्यातील वाहने कमी करून इंधन बचतीचा नवा आदर्श समोर ठेवला आहे, ज्यामुळे त्यांच्या साधेपणाची आणि जनहिताच्या कामांची सर्वत्र चर्चा होत आहे.
शिक्षण आणि कागदपत्रांच्या प्रश्नांवर चर्चा
शिष्टमंडळाने भटक्या विमुक्त समाजाच्या शिक्षण, आरोग्य आणि शासकीय नोंदींसंबंधीच्या कागदपत्रांच्या समस्यांवर राज्यपालांचे लक्ष वेधले. अनेक कुटुंबांकडे आजही जातीचे दाखले आणि आधार कार्ड यांसारखी आवश्यक कागदपत्रे नाहीत, ज्यामुळे ते शासकीय योजनांपासून वंचित राहत आहेत. या संदर्भात, ३१ ऑगस्ट रोजी होणाऱ्या ‘विमुक्त दिना’निमित्त कागदपत्रे वितरणाच्या कार्यक्रमाचे निमंत्रणही राज्यपालांना देण्यात आले.
ज्याप्रमाणे सरकार ऊसतोड कामगारांसाठी नवीन कल्याणकारी कायदा आणण्यासाठी प्रयत्नशील आहे, त्याच धर्तीवर भटके विमुक्त समाजाच्या सर्वांगीण विकासासाठी पावले उचलण्याची मागणी या बैठकीत करण्यात आली.
यमगरवाडी प्रकल्पाला राज्यपाल भेट देणार
परिषदेच्या वतीने राज्यपालांना धाराशिव जिल्ह्यातील तुळजापूर तालुक्यातील यमगरवाडी येथील ‘एकलव्य विद्या संकुल’ या प्रकल्पाला भेट देण्याचे आग्रहाचे निमंत्रण देण्यात आले. हा प्रकल्प भटक्या विमुक्त मुलांच्या शिक्षणासाठी कार्यरत असून, राज्यपालांनी या निमंत्रणाचा सकारात्मक विचार करण्याचे आश्वासन दिले.
या शिष्टमंडळात भटके विमुक्त विकास परिषदेचे अध्यक्ष उद्धव काळे, कार्याध्यक्ष डॉ. संजय पुरी, कार्यवाह नरसिंग झरे, कोषाध्यक्ष नरेश पोटे, विदर्भ संयोजक राजेंद्र दोनाडकर, प्रांत सहसंयोजक शरद मखर आणि राहुल चव्हाण आदी मान्यवर उपस्थित होते. समाजातील वंचितांच्या विकासासाठी अशा प्रकारची चर्चा भविष्यात फलदायी ठरेल, अशी आशा व्यक्त करण्यात येत आहे.