मुंबई: राज्यात जलसंधारण व मृद संवर्धनाबाबत जनजागृती निर्माण करण्यासाठी राज्य शासनाच्या मृद व जलसंधारण विभागाच्या वतीने २१ ऑगस्ट रोजी संपूर्ण महाराष्ट्रात ‘जलसंधारण दिन’ उत्साहात साजरा केला जाणार आहे. या निमित्ताने राज्यभरात ‘महा वॉकेथॉन-वॉक फॉर वॉटर’ (Maha Walkathon – Walk for Water), जलसंधारणाची शपथ, शाळा-महाविद्यालयांमध्ये विविध प्रबोधनात्मक स्पर्धा आणि तरुणांसाठी ‘रील्स स्पर्धा’ आयोजित करण्यात आली आहे. या महा वॉकेथॉनमध्ये नागरिकांनी मोठ्या संख्येने सहभागी व्हावे, यासाठी क्यूआर कोड (QR Code) द्वारे ऑनलाईन नोंदणीची सुविधा उपलब्ध करून देण्यात आल्याची माहिती मृद व जलसंधारण मंत्री संजय राठोड यांनी दिली.
सहभागासाठी क्यूआर कोडद्वारे ऑनलाईन नोंदणी आवश्यक
मंत्री संजय राठोड यांनी स्पष्ट केले की, ‘महा वॉकेथॉन-वॉक फॉर वॉटर’ उपक्रमात सहभागी होण्यासाठी नागरिकांनी क्यूआर कोड स्कॅन करून ऑनलाईन नोंदणी करणे आवश्यक आहे. २१ ऑगस्ट रोजी आयोजित करण्यात येणाऱ्या या उपक्रमात सहभागी होणाऱ्या प्रत्येक नागरिकाला शासनाकडून डिजिटल ‘ई-प्रमाणपत्र’ (E-Certificate) देऊन गौरविण्यात येईल. या जनजागृती मोहिमेच्या प्रभावी प्रसिद्धीसाठी सोशल मीडियावर #MahaWalkathon, #WalkForWater आणि #SaveSoilSaveWater या अधिकृत हॅशटॅगचा वापर करण्याचे आवाहन करण्यात आले आहे.
राज्यात शाश्वत जलव्यवस्थापनासाठी शासन कटिबद्ध असून, यापूर्वीच शेतकरीहिताला सर्वोच्च प्राधान्य देत जलसंपदा विभागाला आर्थिकदृष्ट्या स्वयंपूर्ण करण्याच्या दृष्टीने पावले उचलली जात आहेत. तसेच दुष्काळमुक्तीसाठी नदीजोड प्रकल्पांद्वारे महाराष्ट्र दुष्काळमुक्त करण्याचे उद्दिष्ट समोर ठेवून काम सुरू आहे. या पार्श्वभूमीवर जलसंधारण सप्ताहाचे आयोजन अत्यंत महत्त्वपूर्ण ठरणार आहे.
तरुणांसाठी ‘Reel for Soil and Water Conservation’ स्पर्धा
राज्यातील १५ ते ३० वयोगटातील युवक-युवतींच्या सर्जनशीलतेला वाव देण्यासाठी आणि डिजिटल माध्यमांतून मृद व जलसंधारणाचा संदेश घराघरांत पोहोचवण्यासाठी इन्स्टाग्रामवर राज्यस्तरीय रील्स स्पर्धेचे आयोजन करण्यात आले आहे.
रील्स स्पर्धेचे महत्त्वाचे नियम व अटी:
- स्पर्धेची थीम: ‘Save Soil, Save Water, Secure Tomorrow’
- पात्र वयोगट: १५ ते ३० वर्षे
- कालावधी: रीलचा कालावधी ३० ते ६० सेकंद असावा.
- माहिती: रीलच्या सुरुवातीला स्पर्धकाचे पूर्ण नाव, जिल्हा आणि रीलचा मूळ उद्देश स्पष्ट करणे आवश्यक आहे.
- पोस्टिंग: ही रील स्वतःच्या पब्लिक इन्स्टाग्राम अकाउंटवर पोस्ट करून विभागाच्या अधिकृत अकाउंटला टॅग करावी आणि
#SaveSoilSaveWaterया हॅशटॅगचा अनिवार्यपणे वापर करावा.
अधिकृत सोशल मीडिया हँडल्स:
नागरिक व स्पर्धक अधिक माहितीसाठी खालील अधिकृत खात्यांना भेट देऊ शकतात:
- Instagram: @mahawalkathon2026
- Facebook: MahaWalkathon2026
- X (Twitter): @MahaWalkathon26
१५ ते २१ ऑगस्ट दरम्यान जलसंधारण सप्ताह आणि त्यानंतर १५ ऑगस्ट २०२६ ते २६ जानेवारी २०२७ या कालावधीत राज्यव्यापी जलसंधारण अभियान राबविण्यात येणार आहे. राज्यातील सर्व शेतकरी बांधव, युवक, सामाजिक संस्था व नागरिकांनी या उपक्रमात उत्स्फूर्तपणे सहभागी व्हावे, असे आवाहन करण्यात आले आहे.