नवी दिल्ली: देशाची राजधानी नवी दिल्ली येथील कोपर्निकस मार्गावरील महाराष्ट्र सदनात यंदा भव्य सार्वजनिक गणेशोत्सवाचे दिमाखदार आयोजन करण्यात आले आहे. या महोत्सवाचे अधिकृत निमंत्रण महाराष्ट्राचे राज्यपाल जिष्णू देव वर्मा यांना निवासी आयुक्त तथा सचिव डॉ. श्वेता सिंघल यांनी प्रत्यक्ष भेटून दिले. या भेटीदरम्यान त्यांनी राज्यपालांना उत्सवात होणाऱ्या विविध धार्मिक, सामाजिक आणि मराठमोळ्या सांस्कृतिक कार्यक्रमांची सविस्तर माहिती दिली.
सार्वजनिक गणेशोत्सव समितीच्या वतीने महाराष्ट्र सदनात १४ ते २५ सप्टेंबर दरम्यान हा महाउत्सव उत्साहात साजरा होणार आहे. डॉ. श्वेता सिंघल यांच्या मार्गदर्शनाखाली आयोजित होणाऱ्या या उत्सवामुळे राजधानी दिल्लीत महाराष्ट्राच्या समृद्ध कला, संस्कृती, परंपरा आणि लोकजीवनाचे विलोभनीय दर्शन घडणार आहे. याआधीही राष्ट्रीय स्तरावर नवी दिल्लीत महाराष्ट्राचा डंका अनेक उपक्रमांच्या माध्यमातून वाजला असून, आता गणेशोत्सवाच्या माध्यमातून सांस्कृतिक वैभव दिल्लीकरांसमोर सादर केले जाणार आहे.
असा असेल गणेशोत्सवाचा कार्यक्रम
उत्सवाच्या पहिल्या दिवशी, म्हणजेच १४ सप्टेंबर रोजी सकाळी १० वाजता श्रींची भव्य मिरवणूक काढण्यात येईल. त्यानंतर सकाळी ११ वाजता मान्यवरांच्या उपस्थितीत विधिवत प्राणप्रतिष्ठापना केली जाईल. पहिल्या दिवशी सायंकाळी जुन्या महाराष्ट्र सदनात भक्तिमय भजनाचा कार्यक्रम होईल. तसेच उत्सव काळात दररोज सकाळी ९ वाजता आणि सायंकाळी ६:१५ वाजता महाआरतीचे आयोजन करण्यात आले आहे.
सांस्कृतिक मेजवानी आणि दिग्गज कलाकारांची उपस्थिती
राज्यात ज्याप्रमाणे गणेशोत्सवाला राज्य महोत्सवाचा दर्जा देऊन संस्कृतीचे संवर्धन केले जाते, त्याच धर्तीवर दिल्लीतही विविध सांस्कृतिक कार्यक्रमांची मेजवानी रसिकांसाठी उपलब्ध असणार आहे:
- १५ सप्टेंबर: आकाशवाणी रंगभवन येथे अभिनेते भरत जाधव यांचा सुपरहीट मराठी नाट्यप्रयोग ‘सही रे सही’ सादर केला जाईल.
- १७ सप्टेंबर: कवी वैभव जोशी आणि संदीप खरे यांचा लोकप्रिय काव्य-संगीताचा विशेष कार्यक्रम रंगेल.
- १८ सप्टेंबर: संतोष भांगरे प्रस्तुत ‘महाराष्ट्राची लोककला’ हा पारंपरिक लोकनृत्यांचा कार्यक्रम होणार आहे.
- १९ सप्टेंबर: श्री सत्यनारायण महापूजा, महाप्रसाद आणि सायंकाळी गझलनवाज भीमराव पांचाळे यांचा मराठी गझल गायनाचा सुरेल कार्यक्रम होईल.
- २० सप्टेंबर: डॉ. बाबासाहेब आंबेडकर सेंटर येथे गायिका वैशाली सामंत, गायक ऋषिकेश रानडे, शरद दाते यांच्या सुश्राव्य आवाजात ‘मराठी चित्रपट गीते’ हा विशेष सांगीतिक कार्यक्रम पार पडेल.
याशिवाय पाककला स्पर्धा, भरतनाट्यम, ‘खेळ पैठणीचा’, पारंपरिक लावणी, तसेच हिंदी-मराठी सुगम संगीताचे विविध कार्यक्रम रसिकांसाठी पर्वणी ठरणार आहेत. महोत्सवाची सांगता २५ सप्टेंबर रोजी भव्य झांज पथक आणि विसर्जन मिरवणुकीने होईल.
नागरिकांना विनामूल्य प्रवेश व नोंदणीचे आवाहन
या उत्सवातील सर्व कार्यक्रम नागरिकांसाठी विनामूल्य आहेत. मात्र, गर्दीचे योग्य नियोजन व्हावे यासाठी १५, १७, १८, २० आणि २३ सप्टेंबर रोजीच्या विशेष सांस्कृतिक कार्यक्रमांसाठी ऑनलाइन नोंदणी करणे अनिवार्य करण्यात आले आहे. दिल्लीतील सर्व नागरिक आणि गणेशभक्तांनी मोठ्या संख्येने सहभागी होऊन या सांस्कृतिक वैभवाचा आनंद घ्यावा, असे आवाहन निवासी आयुक्त डॉ. श्वेता सिंघल यांनी केले आहे.