मुंबई : महाराष्ट्रात आरोग्य, शिक्षण, कौशल्यविकास, ग्रामीण भागातील जलसंधारण आणि हवामान बदल प्रतिबंधासाठी कार्यरत असलेल्या आगा खान डेव्हलपमेंट नेटवर्क (AKDN) च्या सामाजिक उपक्रमांना राज्य शासनाकडून संपूर्ण सहकार्य आणि पाठबळ दिले जाईल, अशी ग्वाही मुख्यमंत्री देवेंद्र फडणवीस यांनी दिली आहे.
पाचवे आगा खान म्हणून पदभार स्वीकारल्यानंतर पहिल्यांदाच महाराष्ट्राच्या दौऱ्यावर आलेले प्रिन्स रहीम आगा खान यांनी शिष्टमंडळासह मुंबईतील फेअरमाँट हॉटेलमध्ये मुख्यमंत्री देवेंद्र फडणवीस यांची भेट घेतली. नुकतेच महामहिम प्रिन्स रहीम आगा खान यांचे मुंबईत आगमन झाले असून, त्यांनी राज्यातील शाश्वत विकासाच्या दृष्टीने विविध मुद्द्यांवर सरकारसोबत संवाद साधला.
ग्रामीण भागातील जलसंधारण आणि पर्यावरण संवर्धनावर भर
मुख्यमंत्री देवेंद्र फडणवीस यांनी AKDN मार्फत ग्रामीण भागात राबविण्यात आलेल्या जलव्यवस्थापन आणि पर्यावरण संवर्धन कामांचे विशेष कौतुक केले. दुष्काळग्रस्त आणि पाणीटंचाईच्या गावांमध्ये संस्थेच्या उपक्रमांमुळे उल्लेखनीय बदल घडून आले आहेत. या कामांचा अधिक विस्तार करण्यासाठी राज्य शासन सार्वजनिक-खासगी भागीदारी (PPP) तत्त्वावर सहकार्य करण्यास उत्सुक असल्याचे मुख्यमंत्र्यांनी सांगितले. राज्यातील ‘मायक्रो फॉरेस्ट’ आणि हवामान कृती उपक्रमांवर भर देत ग्रामीण तसेच नागरी भागातील पर्यावरण संतुलन राखणे शक्य होईल, असा विश्वासही यावेळी व्यक्त करण्यात आला.
आरोग्य सुविधा आणि ज्येष्ठ नागरिकांसाठी विशेष रुग्णालये
या महत्त्वपूर्ण बैठकीत आरोग्य सुविधांच्या विस्तारावर सविस्तर चर्चा झाली. यामध्ये खालील महत्त्वाच्या मुद्द्यांचा समावेश होता:
- प्रस्तावित बालरुग्णालय व जेरियाट्रिक केअर : वाढत्या वृद्ध लोकसंख्येसाठी विशेष जेरियाट्रिक (वृद्धापकाळ आरोग्य) रुग्णालय आणि अत्याधुनिक पुनर्वसन केंद्र उभारणे.
- वैद्यकीय प्रशिक्षण : शासकीय वैद्यकीय महाविद्यालयांच्या सहकार्याने डॉक्टरांना जेरियाट्रिक क्षेत्रातील विशेष प्रशिक्षण देणे.
- कौशल्याधारित प्रशिक्षण : आरोग्य क्षेत्रात आवश्यक असणाऱ्या पॅरामेडिकल व इतर तांत्रिक मनुष्यबळासाठी कौशल्य विकास प्रशिक्षण सुरू करणे.
शहरी उष्णता नियंत्रण आणि वारसा संवर्धन
हवामान बदलामुळे वाढणाऱ्या शहरी उष्णतेवर मात करण्यासाठी AKDN शिष्टमंडळाने तयार केलेल्या अभ्यास आराखड्याची माहिती मुख्यमंत्र्यांना दिली. शहरांमध्ये हरित क्षेत्र वाढवणे आणि पर्यावरणपूरक नगररचना करणे काळाची गरज असल्याचे मुख्यमंत्र्यांनी नमूद केले. यासोबतच महाराष्ट्रातील ऐतिहासिक वास्तूंचे जतन आणि सांस्कृतिक वारसा संवर्धनासाठी संस्थात्मक सहकार्य वाढवण्यावर दोन्ही बाजूंनी सहमती दर्शविली.
या बैठकीस कौशल्य विकास मंत्री मंगल प्रभात लोढा, सांस्कृतिक कार्य मंत्री ॲड. आशिष शेलार, आमदार अमीन पटेल, मुख्यमंत्र्यांचे अपर मुख्य सचिव लोकेश चंद्र आणि मुख्य राजशिष्टाचार अधिकारी डॉ. राजेश गवांदे उपस्थित होते. प्रिन्स रहीम आगा खान यांनी महाराष्ट्रात सामाजिक आणि लोककल्याणकारी प्रकल्प अधिक वेगाने राबविण्याची तयारी दर्शवली आहे.