बोगस डॉक्टर नोंदणी रॅकेटवर महाराष्ट्र वैद्यकीय परिषदेची धडक कारवाई; ऑनलाइन पोर्टल छेडछाड प्रकरणी सायबर पोलिसांत तक्रार

मुंबई: राज्यात वैद्यकीय क्षेत्राची विश्वासार्हता धोक्यात आणणारा एक मोठा गैरप्रकार उघडकीस आला आहे. परदेशी वैद्यकीय पदवीधरांच्या (FMG – Foreign Medical Graduates) नोंदणीमध्ये बनावट कागदपत्रांचा आधार घेणे तसेच महाराष्ट्र वैद्यकीय परिषदेच्या (MMC) अधिकृत ऑनलाइन नोंदणी पोर्टलमध्ये बेकायदेशीर छेडछाड केल्याप्रकरणी परिषदेने अत्यंत आक्रमक भूमिका घेतली आहे. या संपूर्ण प्रकरणाची सखोल चौकशी महाराष्ट्र सायबर विभागाकडे सोपवण्यात आली असून, दोषींवर फौजदारी व कडक प्रशासकीय कारवाई केली जाणार आहे.

अंतर्गत तपासणीत २२ संशयित डॉक्टर रडारवर

महाराष्ट्र वैद्यकीय परिषदेमार्फत नियमित अंतर्गत तपासणी आणि नोंदणी अभिलेखांची सूक्ष्म छाननी सुरू असताना हा गंभीर प्रकार निदर्शनास आला. प्राथमिक चौकशीमध्ये तब्बल २२ संशयित परदेशी वैद्यकीय पदवीधर आढळून आले आहेत. या पदवीधरांनी सादर केलेल्या कागदपत्रांमध्ये विसंगती असल्याचे स्पष्ट झाले आहे.

हा गैरव्यवहार समोर येताच परिषदेने तत्काळ पावले उचलत ऑनलाइन नोंदणी प्रणालीची सुरक्षा प्रणाली अद्ययावत केली. तसेच संशयित व्यक्तींना त्यांच्या मूळ शैक्षणिक कागदपत्रांसह प्रत्यक्ष पडताळणीसाठी परिषदेच्या कार्यालयात हजर राहण्याचे कडक निर्देश दिले आहेत.

महाराष्ट्र सायबर पोलिसांकडून सखोल तपास सुरू

डिजिटल प्रणालीमध्ये झालेली छेडछाड आणि कागदपत्रांमधील फेरफार यांचे धागेदोरे शोधण्यासाठी परिषदेने सायबर सेलकडे अधिकृत तक्रार नोंदवली आहे. सायबर पोलिसांनी या प्रकरणाचा तपास युद्धपातळीवर सुरू केला असून, यामध्ये काही महत्त्वाची माहिती आणि तांत्रिक पुरावे हाती आले आहेत. वैद्यकीय परिषदेचे अधिकारी या तपासात पोलिसांना सर्वतोपरी सहकार्य करत आहेत.

एककीडे राज्य शासन आरोग्य यंत्रणेच्या सक्षमीकरणावर भर देत असताना, जसे की राज्यात मानसिक आरोग्य सेवांचे जाळे बळकट करण्यासाठी अनेक नव्या उपाययोजना केल्या जात आहेत, अशा वेळी वैद्यकीय क्षेत्रात बनावट मार्गाने प्रवेश करू पाहणाऱ्यांवर आळा घालणे तितकेच अत्यावश्यक बनले आहे.

वैद्यकीय नियम आणि रुग्णांच्या सुरक्षिततेला प्राधान्य

महाराष्ट्र वैद्यकीय परिषद अधिनियम, १९६५ आणि भारतीय न्याय संहितेनुसार दोषींवर कठोर कारवाईची प्रक्रिया सुरू आहे. वैद्यकीय सेवेतील पारदर्शकता राखण्यासाठी ज्याप्रमाणे आरोग्य तपासणी व नियमांचे काटेकोर पालन केले जाते, त्याच धर्तीवर केवळ वैध व अधिकृत डॉक्टरांनीच राज्यात सेवा द्यावी, हा परिषदेचा मुख्य उद्देश आहे.

वैद्यकीय परिषदेने स्पष्ट केले आहे की:

• बनावट कागदपत्रांच्या आधारे मिळवलेली कोणतीही नोंदणी तात्काळ रद्द केली जाईल.
• ऑनलाइन प्रणालीशी छेडछाड करणाऱ्या कोणत्याही रॅकेटची पाळेमुळे खणून काढली जातील.
• रुग्णांच्या जिवाशी खेळ करणाऱ्या बनावट व्यक्तींना कोणत्याही परिस्थितीत पाठीशी घातले जाणार नाही.

नागरिकांना आणि रुग्णांना महत्त्वाचे आवाहन

रुग्णांनी आणि नागरिकांनी कोणताही संशय असल्यास डॉक्टरांच्या वैद्यकीय पदवी व नोंदणीची सत्यता तपासावी. यासाठी महाराष्ट्र वैद्यकीय परिषदेच्या अधिकृत संकेतस्थळावर जाऊन नोंदणी क्रमांक पडताळण्याचे आवाहन परिषदेने केले आहे. जर कोणाला बनावट प्रॅक्टिस किंवा संशयास्पद बाबी आढळल्यास तात्काळ परिषदेशी संपर्क साधण्याचे आवाहन करण्यात आले आहे.