मुंबई: भारत आणि जपानमधील द्विपक्षीय संबंधांना नव्या आर्थिक सहकार्याची दिशा देण्याची हीच सुवर्णसंधी असून, जपानी उद्योगांच्या विस्तारासाठी महाराष्ट्र शासन सर्वतोपरी सहकार्य करण्यास सज्ज आहे. जपानी कंपन्यांनी महाराष्ट्राकडे केवळ भांडवली गुंतवणुकीचे केंद्र म्हणून न पाहता, भारतासह जागतिक बाजारपेठेतील विस्तारासाठी एक धोरणात्मक भागीदार आणि सक्षम ‘लॉजिस्टिक्स हब’ म्हणून पाहावे, असे ठाम प्रतिपादन राज्याचे वस्त्रोद्योग मंत्री संजय सावकारे यांनी केले.
वांद्रे येथील हॉटेल ताज लँड्स एन्ड येथे ‘निक्केई एशिया’ आणि ‘कॉन्फेडरेशन ऑफ इंडियन इंडस्ट्री’ (CII) यांच्या संयुक्त विद्यमाने आयोजित ‘निक्केई इंडिया-जपान इकॉनॉमी अँड इन्व्हेस्टमेंट फोरम’मध्ये ते बोलत होते.
भारत-जपान भागीदारी: तंत्रज्ञान आणि क्षमतेचा संगम
आपल्या भाषणात मंत्री संजय सावकारे म्हणाले की, भारत आणि जपानमधील ऐतिहासिक संबंध हे परस्पर आदर, विश्वास आणि समान मूल्यांवर आधारलेले आहेत. सध्याच्या जागतिक परिस्थितीत उत्पादन, तंत्रज्ञान, नावीन्यपूर्ण संशोधन, पुरवठा साखळी बळकटीकरण आणि शाश्वत विकास या क्षेत्रांमध्ये दोन्ही देशांना एकत्र काम करण्याची मोठी संधी उपलब्ध झाली आहे.
जपानकडे प्रगत तंत्रज्ञान, अचूकता, कार्यक्षमता आणि उत्पादन क्षेत्रातील जागतिक दर्जाची गुणवत्ता आहे; तर भारताकडे जगातील सर्वात मोठी बाजारपेठ, कुशल व तरुण मनुष्यबळ आणि प्रचंड आर्थिक विकासाची क्षमता आहे. ही सांगड अत्यंत सामर्थ्यशाली ठरणार असून, ही भागीदारी प्रत्यक्षात उतरवण्यासाठी महाराष्ट्र देशात अग्रगण्य भूमिका बजावत आहे.
महाराष्ट्रातील उद्योग आणि वस्त्रोद्योगातील संधी
महाराष्ट्र हे देशाचे आर्थिक इंजिन असून ऑटोमोबाईल, इलेक्ट्रिक मोबिलिटी (EV), प्रगत अभियांत्रिकी, रसायने, इलेक्ट्रॉनिक्स, कृषी आणि वस्त्रोद्योग या क्षेत्रांमध्ये राज्याची कामगिरी उल्लेखनीय राहिली आहे. व्यवसाय सुलभतेसाठी शासन विविध सुधारणा करत असून, नुकत्याच झालेल्या जीएसटी परिषदेच्या ५७व्या बैठकीत मोठे निर्णय घेण्यात आल्याने औद्योगिक परिसंस्थेला आणखी बळकटी मिळाली आहे.
याशिवाय, महसूल व प्रशासकीय पारदर्शकता वाढवण्यासाठी राज्यभरात डिजिटल प्रणालीचा वापर वाढत आहे, ज्याप्रमाणे महाखनिज २.० पोर्टलशी विविध विभागांच्या संगणकीय प्रणाली तातडीने जोडा अशा स्वरूपाच्या सुधारणांमुळे उद्योगांना प्रशासकीय कामात सुलभता मिळत आहे.
२.९१ लाख नव्या रोजगारांची निर्मिती होणार
वस्त्रोद्योग हे मोठ्या प्रमाणावर रोजगार निर्माण करणारे क्षेत्र असल्याचे नमूद करत मंत्री सावकारे म्हणाले, आधुनिक तंत्रज्ञान, कुशल कामगार, पायाभूत सुविधा आणि जागतिक बाजारपेठ यांचा समन्वय साधत आंतरराष्ट्रीय स्तरावर स्पर्धात्मक वातावरण तयार करणे हे शासनाचे ध्येय आहे. ‘महाराष्ट्र इन्व्हेस्टमेंट समिट’दरम्यान झालेल्या विविध करारांतून तब्बल २ लाख ९१ हजार नव्या रोजगारांची निर्मिती होणार आहे. त्यामुळे जपानी कंपन्यांसाठी स्थिर व दीर्घकालीन उत्पादन केंद्र म्हणून महाराष्ट्र ही सर्वोत्तम निवड ठरेल, असा विश्वास त्यांनी शेवटी व्यक्त केला.
या परिषदेस भारतातील जपानचे राजदूत केइची ओनो, निप्पॉन लाइफ इंडियाचे व्यवस्थापकीय संचालक संदीप सिक्का, जपान बँक फॉर इंटरनॅशनल कोऑपरेशनच्या जागतिक प्रमुख काझुको साकुमा, टोयो इंजिनिअरिंगचे व्यवस्थापकीय संचालक ताकाशी कावाहारा यांच्यासह दोन्ही देशांतील नामवंत उद्योगपती उपस्थित होते.