सिंधुदुर्ग: खरीप हंगामातील पिकांची नेमकी सद्यस्थिती जाणून घेण्यासाठी आणि शेतकऱ्यांच्या अडचणी थेट समजून घेण्यासाठी सिंधुदुर्ग जिल्ह्याचे पालकमंत्री नितेश राणे यांनी देवगड तालुक्यातील शिरगाव परिसरातील शेतांमध्ये जाऊन प्रत्यक्ष पाहणी केली. शेवरे तांबळवाडी येथील शेतकरी विठोबा घाडी यांच्या शेताच्या बांधावर पोहोचून त्यांनी भात पिकाची पाहणी केली असता, पावसाच्या खंडामुळे भात पिकांची वाढ खुंटल्याचे समोर आले आहे.
पावसाच्या कमतरतेमुळे भातशेती संकटात
यंदा मागील वर्षाच्या तुलनेत पावसाचे प्रमाण अत्यंत कमी राहिले आहे. परिणामी भूगर्भातील पाणीपातळी घसरली असून विहिरींच्या पाण्याच्या पातळीतही मोठी घट झाली आहे. याचा थेट फटका खरीप हंगामातील भात पिकाला बसला असून पिके करपण्याच्या मार्गावर आहेत. स्थानिक उपसभापती अमोल लोके यांनी परिसरातील पाण्याची टंचाई आणि पिकांच्या बिकट परिस्थितीबाबत पालकमंत्र्यांना सविस्तर माहिती दिली.
राज्यात इतरत्रही अशीच परिस्थिती निर्माण झाली असून, काही दिवसांपूर्वीच राज्यातील २६५ तालुक्यांमध्ये दुष्काळ जाहीर करून प्रशासनाला पंचनाम्याचे आदेश देण्यात आले आहेत.
शासन शेतकऱ्यांच्या पाठीशी खंबीर – नितेश राणे
शेतकऱ्यांशी संवाद साधताना पालकमंत्री नितेश राणे म्हणाले की, “शेतकऱ्यांच्या प्रत्यक्ष भावना आणि ग्राउंड रियालिटी समजून घेण्यासाठीच आम्ही थेट बांधावर जात आहोत. शेतकऱ्यांवर आलेले हे संकट शासनाच्या निदर्शनास आणून दिले जाईल. मुख्यमंत्र्यांनी जाहीर केलेल्या सरसकट मदतीचा लाभ बळीराजाला मिळवून देण्यासाठी प्रशासनाला तातडीने पावले उचलण्याच्या सूचना देण्यात आल्या आहेत. शासन कोणत्याही परिस्थितीत शेतकऱ्यांना वाऱ्यावर सोडणार नाही.”
यापूर्वीही विविध जिल्ह्यांत मंत्र्यांकडून पाहणी केली जात असून शेतकऱ्यांना मदतीत कोणतीही कमतरता पडू देणार नाही अशी भूमिका राज्य सरकारने वारंवार स्पष्ट केली आहे.
शिरगाव लघु पाटबंधारे तलावाच्या गेट दुरुस्तीचे तातडीने आदेश
या पाहणी दौऱ्यादरम्यान शिरगाव भागातील ग्रामस्थांनी एका महत्त्वाच्या समस्येकडे पालकमंत्र्यांचे लक्ष वेधले. शिरगाव लघु पाटबंधारे तलावाच्या गेटची दुरवस्था झाल्यामुळे पाण्याचा अपव्यय होत असून शेतीसाठी पाणी उपलब्ध होत नाही, अशी तक्रार ग्रामस्थांनी केली. या समस्येचे गांभीर्य लक्षात घेत, पालकमंत्री नितेश राणे यांनी उपस्थित जलसंधारण व लघु पाटबंधारे विभागाच्या कार्यकारी अभियंत्यांना तलावाच्या गेट दुरुस्तीचे काम तातडीने हाती घेण्याचे स्पष्ट निर्देश दिले.
या दौऱ्याप्रसंगी जिल्हाधिकारी तृप्ती धोडमिसे, जिल्हा परिषदेच्या मुख्य कार्यकारी अधिकारी डॉ. अपूर्वा बासूर, जिल्हा अधीक्षक कृषी अधिकारी भाग्यश्री नाईकनवरे, उपविभागीय अधिकारी जगदीश कातकर, तहसीलदार शितल जाधव यांच्यासह संबंधित विभागाचे वरिष्ठ अधिकारी आणि स्थानिक शेतकरी मोठ्या संख्येने उपस्थित होते.