सोलापूर: महाराष्ट्र शासनाचा सांस्कृतिक कार्य विभाग, सांस्कृतिक कार्य संचालनालय आणि श्री श्रद्धानंद समाज सार्वजनिक आजोबा गणपती ट्रस्ट यांच्या संयुक्त विद्यमाने ऐतिहासिक परंपरा लाभलेल्या मानाच्या आजोबा गणपतीच्या प्रांगणात भव्य ‘सांस्कृतिक महोत्सव’ मोठ्या उत्साहात संपन्न झाला. नटराज पूजन आणि दीपप्रज्वलनाने या महोत्सवाचे दिमाखदार उद्घाटन करण्यात आले.
या सोहळ्यास माजी राज्यमंत्री तथा ट्रस्टचे अध्यक्ष विजयकुमार देशमुख, आमदार सुभाष देशमुख, विधानपरिषद सदस्य राजाभाऊ राऊत, सांस्कृतिक कार्य संचालनालयाचे संचालक प्रशांत खेडेकर, प्रसिद्ध गायक पं. अजित कुमार कडकडे, माजी आमदार प्रशांत परिचारक, ट्रस्टचे उपाध्यक्ष काकासाहेब मेंडके, रिजनल मार्केटिंग हेड दीपक किंगर, जिल्हाध्यक्ष संतोष पवार, जिल्हाध्यक्ष अमोल शिंदे, नगरसेवक नागेश पाटील, शिवानंद पाटील, बबीता धुम्मा, गीता गवई यांच्यासह ट्रस्टचे सर्व पदाधिकारी आणि भाविक मोठ्या संख्येने उपस्थित होते.
१८८५ पासूनची ऐतिहासिक व सांस्कृतिक परंपरा
या प्रसंगी बोलताना विजयकुमार देशमुख यांनी आजोबा गणपती उत्सवाच्या गौरवशाली वारशाचा उल्लेख केला. ते म्हणाले की, “आजोबा गणपतीच्या सार्वजनिक उत्सवाला १८८५ पासूनची प्रदीर्घ परंपरा लाभली आहे. सोलापूरच्या सामाजिक आणि सांस्कृतिक जीवनात या परंपरेला अढळ स्थान आहे. धार्मिक श्रद्धेबरोबरच कला, संगीत, समाजप्रबोधन आणि लोकसंस्कृतीचे संवर्धन या उत्सवाच्या माध्यमातून निरंतर केले जात आहे.” काळानुरूप या महोत्सवाचा विस्तार होत गेला असून, तो सोलापूरच्या सांस्कृतिक वैभवाचा अविभाज्य भाग बनला आहे.
राज्यात सध्या विविध उपक्रमांतून संस्कृतीचा जागर सुरू आहे. यापूर्वी ‘लोककलेतील श्रीगणेश’ कार्यक्रमाला रसिकांचा उत्स्फूर्त प्रतिसाद मिळाल्याचे आपण पाहिले आहे, त्याचप्रमाणे गणेशोत्सवाचा मंच सामाजिक जनजागृतीसाठीही उपयुक्त ठरत असून ‘लोकसंवाद’ अभियानाला गणेशोत्सव मंडळांमध्ये जोरदार प्रतिसाद मिळत आहे.
सांस्कृतिक उपक्रमांमुळे सामाजिक ऐक्य वृद्धिंगत
दीपक किंगर यांनी आपल्या मनोगतात स्पष्ट केले की, गणेशोत्सव हा केवळ धार्मिक सोहळा नसून कला, संगीत आणि लोकसहभागाला दिशा देणारा एक प्रभावी उत्सव आहे. अशा दर्जेदार सांस्कृतिक आयोजनांमुळे समाजात सौहार्द, सकारात्मकता आणि सामाजिक एकोपा टिकून राहण्यास मोठी मदत होते.
तरुणांनी सांस्कृतिक चळवळीत पुढे यावे: आमदार सुभाष देशमुख
आमदार सुभाष देशमुख यांनी आजोबा गणपतीच्या पूजेचा मान दिल्याबद्दल ट्रस्टचे आभार व्यक्त केले. तसेच महाराष्ट्र शासनाच्या सांस्कृतिक कार्य विभागाने सोलापुरात हा महोत्सव आयोजित केल्याबद्दल समाधान व्यक्त केले. सोलापूर शहराच्या सर्वसमावेशक विकासासाठी आणि समृद्ध परंपरेचे रक्षण करण्यासाठी नव्या पिढीतील तरुणांनी सांस्कृतिक चळवळींमध्ये सक्रिय सहभाग घेतला पाहिजे, असे आवाहन त्यांनी केले.
पं. अजित कुमार कडकडे यांच्या संगीत रजनीने रंगत
महोत्सवाच्या निमित्ताने आयोजित शास्त्रीय व भक्ती संगीताच्या मैफलीत प्रसिद्ध गायक पं. अजित कुमार कडकडे यांच्या सुश्राव्य गायनाने उपस्थितांची मने जिंकली. त्यांच्या अप्रतिम संगीत सादरीकरणाला रसिकांकडून भरभरून दाद मिळाली. महाराष्ट्राच्या सांस्कृतिक वारशाचे संवर्धन आणि जतन करण्याच्या उद्देशाने आयोजित या उपक्रमाने सोलापूरच्या सांस्कृतिक जगतात एक नवा उत्साह निर्माण केला आहे.