मुंबई: आंतरराष्ट्रीय स्तरावर सामाजिक, शैक्षणिक आणि विकासात्मक कार्यासाठी ओळखल्या जाणाऱ्या आगा खान डेव्हलपमेंट नेटवर्कचे प्रमुख प्रतिनिधी महामहिम प्रिन्स रहीम आगा खान आणि त्यांच्या उच्चस्तरीय शिष्टमंडळाचे आज मुंबईत आगमन झाले. मुंबईतील छत्रपती शिवाजी महाराज आंतरराष्ट्रीय विमानतळावर त्यांचे शासकीय इतमामात आणि उत्साहात स्वागत करण्यात आले.
महाराष्ट्र शासनाच्या वतीने राजशिष्टाचार मंत्री जयकुमार रावल यांनी पुष्पगुच्छ देऊन महामहिम प्रिन्स रहीम आगा खान यांचे मनःपूर्वक स्वागत केले. यावेळी उभयतांमध्ये राजशिष्टाचारानुसार प्राथमिक सदिच्छा चर्चा पार पडली.
प्रशासकीय वरिष्ठ अधिकाऱ्यांची उपस्थिती
या स्वागत समारंभाच्या वेळी विमानतळावर राज्य प्रशासनातील अनेक महत्त्वाचे वरिष्ठ अधिकारी उपस्थित होते. यामध्ये राज्याचे मुख्य राजशिष्टाचार अधिकारी तथा सचिव डॉ. राजेश गवांडे, मुंबईचे अतिरिक्त पोलीस आयुक्त अभिनव देशमुख आणि मुंबई उपनगरचे जिल्हाधिकारी सौरभ कटियार यांच्यासह विविध विभागांचे संबंधित अधिकारी व शिष्टमंडळाचे प्रतिनिधी उपस्थित होते. विमानतळावरील स्वागत सोहळ्यानंतर महामहिम प्रिन्स रहीम आगा खान आणि त्यांचे शिष्टमंडळ पुढील नियोजित कार्यक्रमांसाठी रवाना झाले.
आगा खान नेटवर्कच्या माध्यमातून जगभरात तसेच भारतात आरोग्य, शिक्षण, ग्रामीण विकास आणि सांस्कृतिक संवर्धन क्षेत्रात महत्त्वपूर्ण योगदान दिले जाते. महाराष्ट्रातही सामाजिक विकासाला गती देण्यासाठी राज्य सरकार विविध आंतरराष्ट्रीय व सामाजिक संस्थांशी समन्वय साधत आहे. अलीकडेच शासनाने बालकांच्या आरोग्यासाठी दुभंगलेले ओठ व टाळू असलेल्या बालकांना मोफत उपचार देण्याबाबत महत्त्वपूर्ण पाऊल उचलले आहे.
त्याचप्रमाणे राज्यातील युवकांच्या सर्वांगीण विकासासाठी आणि कौशल्य वृद्धीसाठी पंडित दीनदयाळ उपाध्याय रोजगार महाकुंभ यांसारख्या उपक्रमांमधून मोठ्या प्रमाणावर रोजगाराच्या संधी निर्माण केल्या जात आहेत. महामहिम प्रिन्स रहीम आगा खान यांच्या या दौऱ्यामुळे सामाजिक विकास आणि संस्थात्मक सहकार्याला नवी दिशा मिळण्याची शक्यता वर्तवली जात आहे.