नाशिक: नाशिक महानगरपालिका हद्दीतील बंद पडलेल्या शाळांच्या इमारतींची तातडीने दुरुस्ती करून आधुनिक पायाभूत सुविधांसह त्या पूर्ववत सुरू कराव्यात. महापालिका शाळांमध्ये विद्यार्थ्यांसाठी सुरक्षित, स्वच्छ आणि गुणवत्तापूर्ण शैक्षणिक वातावरण तयार करून विद्यार्थी पटसंख्या वाढवण्यासाठी ठोस कृती आराखडा राबवावा, असे स्पष्ट निर्देश राज्याचे मंत्री दादाजी भुसे यांनी दिले आहेत.
मंत्री दादाजी भुसे यांनी नाशिक शहरातील पंचवटी येथील मनपा प्राथमिक शाळा क्र. ३०, सिडको येथील मनपा माध्यमिक शाळा तसेच जेलरोड भागातील मनपा शाळा क्र. ५६ येथे प्रत्यक्ष भेट देऊन शाळांच्या सद्यस्थितीची सविस्तर पाहणी केली. या दौऱ्याप्रसंगी महापौर हिमगौरी आहेर-आडके, उपमहापौर विलास शिंदे, अजय बोरस्ते, प्रविण तिदमे यांच्यासह मनपाचे वरिष्ठ अधिकारी उपस्थित होते.
शाळांचे वर्गीकरण आणि तात्काळ दुरुस्तीच्या सूचना
पाहणीदरम्यान मंत्री भुसे यांनी वर्गखोल्या, पिण्याच्या पाण्याची सोय, स्वच्छतागृहे, सुरक्षितता आणि विद्यार्थ्यांच्या शैक्षणिक प्रगतीचा आढावा घेतला. महापालिका क्षेत्रात सध्या कुलूपबंद असलेल्या शाळांची वस्तुस्थिती तपासून त्यांचे वर्गीकरण करण्याचे निर्देश त्यांनी दिले. ज्या शाळांच्या इमारती किंवा परिसराची दुरवस्था झाली आहे, तिथे प्राधान्याने दुरुस्तीची कामे हाती घ्यावीत, असे त्यांनी नमूद केले.
विद्यार्थ्यांना दर्जेदार आणि तंत्रज्ञानस्नेही शिक्षण देण्याबाबत बोलताना ते म्हणाले की, एकीकडे राज्य शासन मराठी भाषा डिजिटल युगात सक्षम ज्ञानभाषा म्हणून विकसित करत आहे; तर दुसरीकडे स्थानिक स्वराज्य संस्थांच्या शाळांमध्येही आधुनिक साधनांचा वापर वाढणे तितकेच गरजेचे आहे.
पालकांचा दृष्टिकोन बदलण्यासाठी शाळांचा कायापालट आवश्यक
मंत्री भुसे यांनी स्पष्ट केले की, महापालिका शाळांकडे सर्वसामान्य पालकांचा पाहण्याचा दृष्टिकोन अधिक सकारात्मक झाला पाहिजे. यासाठी शाळांचा परिसर आकर्षक, आनंददायी व बोलका असायला हवा. खाजगी शाळांच्या तुलनेत मनपा शाळांमध्ये उत्तम शैक्षणिक वातावरण आणि खेळण्यासाठी सुरक्षित क्रीडांगणे उपलब्ध झाल्यास विद्यार्थीसंख्या निश्चितच वाढेल. याचबरोबर समाजात सकारात्मक मूल्यांची रुजवण व्हावी, यासाठी सामाजिक सलोखा आणि नैतिक शिक्षणावर भर देण्याची आवश्यकताही व्यक्त करण्यात आली.
कालबद्ध कृती आराखडा तयार करण्याचे आदेश
ज्या शाळांमध्ये विकासकामे किंवा दुरुस्तीचे प्रस्ताव प्रलंबित आहेत, ती कामे वेळेत पूर्ण करण्यासाठी अधिकाऱ्यांनी कालबद्ध नियोजन करावे. बंद पडलेल्या शाळा पुन्हा सुरू झाल्यानंतर त्या भागातील वंचित व गरजू घटकांतील विद्यार्थ्यांना त्यांच्या घराजवळ मोफत व दर्जेदार शिक्षणाची सोय उपलब्ध होईल, असा विश्वास मंत्री दादाजी भुसे यांनी व्यक्त केला.