२६/११ च्या शहिदांना सायप्रसच्या राष्ट्राध्यक्षांची भावपूर्ण श्रद्धांजली; ‘ताज पॅलेस’ येथील स्मारकाला दिली भेट
मुंबई: मुंबईतील २६/११ च्या भीषण दहशतवादी हल्ल्यातील शहिदांना संपूर्ण जगाने वेळोवेळी आदरांजली वाहिली आहे. याच पार्श्वभूमीवर, भारताच्या अधिकृत दौऱ्यावर असलेले सायप्रस प्रजासत्ताकचे राष्ट्राध्यक्ष निकोस क्रिस्टोडौलिडेस यांनी मुंबईतील हॉटेल ताज महाल पॅलेस येथे जाऊन २६/११ दहशतवादी हल्ल्यातील शहिदांना भावपूर्ण श्रद्धांजली अर्पण केली.
नुकतेच सायप्रसचे राष्ट्राध्यक्ष निकोस क्रिस्टोडोलाइड्स यांचे मुंबईत दिमाखात आगमन झाले होते. या दौऱ्यादरम्यान त्यांनी मुंबईतील ऐतिहासिक आणि महत्त्वाच्या ठिकाणांना भेटी दिल्या, ज्यामध्ये ताज पॅलेस येथील स्मारकाचा प्रामुख्याने समावेश होता.
‘ट्री ऑफ लाइफ’ स्मारकाजवळ वाहिली आदरांजली
हॉटेल ताज पॅलेस येथील भेटीदरम्यान, राष्ट्राध्यक्ष निकोस क्रिस्टोडौलिडेस आणि त्यांच्या पत्नी तथा सायप्रसच्या प्रथम महिला फिलिप्पा कारसेरा यांनी २६/११ च्या शहिदांच्या स्मरणार्थ उभारण्यात आलेल्या ‘ट्री ऑफ लाइफ’ (Tree of Life) स्मारकाला भेट दिली. त्यांनी या स्मारकाजवळ पुष्पचक्र अर्पण करून शहिदांच्या शौर्याला अभिवादन केले. तसेच, येथे मेणबत्ती पेटवून अत्यंत शांत व गंभीर वातावरणात आदरांजली वाहण्यात आली.
भारत आणि सायप्रस संबंधांचे नवे पर्व
या महत्त्वपूर्ण भेटीमुळे भारत आणि सायप्रस यांच्यातील मैत्रीपूर्ण संबंध आणखी दृढ झाले आहेत. दहशतवादाविरुद्धच्या लढ्यात सायप्रस भारताच्या सोबत असल्याचे या आदरांजलीतून पुन्हा एकदा अधोरेखित झाले आहे. केवळ सुरक्षाच नव्हे, तर दोन्ही देशांमध्ये कला आणि संस्कृतीच्या क्षेत्रातही नवीन दालने खुली होत आहेत. याच पार्श्वभूमीवर, भारत व सायप्रस यांच्यातील सांस्कृतिक संबंध अधिक दृढ झाले असून चित्रपट निर्मितीसाठी सायप्रस ‘खुला स्टुडिओ’ ठरणार असल्याची माहितीही समोर आली आहे.
याप्रसंगी विविध क्षेत्रांतील मान्यवर आणि वरिष्ठ शासकीय अधिकारी उपस्थित होते. सायप्रसच्या राष्ट्राध्यक्षांनी व्यक्त केलेली ही संवेदना मुंबईकर आणि संपूर्ण भारतीयांसाठी अत्यंत आदरयुक्त ठरली आहे.