मुंबई: अफकॉन्स इन्फ्रास्ट्रक्चर लिमिटेडने (Afcons Infrastructure Limited) सामाजिक उत्तरदायित्व (CSR) निधीच्या माध्यमातून बालरुग्णांसाठी कर्करोग निदान सुविधा उपलब्ध करून दिली आहे. या स्तुत्य उपक्रमामुळे कर्करोगाचा संशय असलेल्या ९४ बालकांच्या आणि त्यांच्या पालकांच्या जीवनात नवी उमेद निर्माण झाली आहे. या अत्यंत महत्त्वाच्या आणि संवेदनशील उपक्रमाचे मुख्यमंत्री देवेंद्र फडणवीस यांनी तोंडभरून कौतुक केले आहे.
टाटा मेमोरियल हॉस्पिटलच्या सहकार्याने मोठी मदत
अफकॉन्स इन्फ्रास्ट्रक्चर लिमिटेडने २०२५-२६ या वर्षात शिक्षण, आरोग्य सेवा आणि महिला सक्षमीकरण अशा विविध क्षेत्रांमध्ये अनेक महत्त्वाकांक्षी सीएसआर उपक्रम राबविले आहेत. यामध्ये देशभरातील संभाव्य कर्करोगग्रस्त बालरुग्णांसाठी तातडीची निदान सेवा सुरू करण्यात आली आहे. या उपक्रमांतर्गत अफकॉन्सने टाटा मेमोरियल हॉस्पिटलच्या (Tata Memorial Hospital) माध्यमातून ‘Emergency Diagnostic Support for Children with Suspected Cancer’ या विशेष योजनेसाठी ५० लाख रुपयांचे आर्थिक सहाय्य केले आहे. या आर्थिक मदतीमुळे देशभरातील ९४ बालकांना वेळेत अचूक निदान आणि आवश्यक वैद्यकीय तपासण्या मोफत उपलब्ध झाल्या आहेत.
वेळेवर निदान हीच रुग्णावर उपचाराची पहिली पायरी: मुख्यमंत्री
या उपक्रमाचे कौतुक करताना मुख्यमंत्री देवेंद्र फडणवीस म्हणाले, “कर्करोगासारख्या गंभीर आणि जीवघेण्या आजारात वेळेवर निदान होणे अत्यंत गरजेचे असते. अनेकदा अत्यंत बिकट आर्थिक परिस्थितीमुळे गरीब कुटुंबांना महागड्या वैद्यकीय तपासण्या करणे शक्य होत नाही. अशा परिस्थितीत अफकॉन्सने पुढे येऊन दिलेली ही मदत केवळ आर्थिक स्वरूपाची नसून, यामुळे निष्पाप बालकांच्या उपचार प्रक्रियेला मोठी गती मिळाली आहे.”
मुख्यमंत्री पुढे म्हणाले की, शासनाच्या आरोग्य सुधारणांच्या प्रयत्नांना खाजगी क्षेत्राची अशीच भक्कम साथ मिळाली, तर आपण आरोग्य आणि सामाजिक विकासाची उद्दिष्टे अधिक वेगाने गाठू शकतो. शाश्वत विकासासाठी शिक्षण आणि आरोग्य क्षेत्राला प्राधान्य देणे गरजेचे आहे, जे की विकसित महाराष्ट्र २०४७ चा नवा रोडमॅप तयार करतानाही शासनाच्या अजेंड्यावर आहे.
आरोग्य क्षेत्राला बळकटी देण्याचा सरकारचा संकल्प
राज्यामध्ये उत्कृष्ट दर्जाच्या आरोग्य सुविधा सर्वसामान्य जनतेला मिळाव्यात यासाठी शासन सातत्याने काम करत आहे. नुकतीच नवी मुंबईत जागतिक दर्जाची मेडिसिटी उभारण्याची घोषणा करण्यात आली असून, यामुळे आरोग्य यंत्रणेला आधुनिक तंत्रज्ञानाची जोड मिळणार आहे. कॉर्पोरेट क्षेत्राच्या सामाजिक बांधिलकीच्या अशा उपक्रमांमुळे शासकीय योजनांना अधिक बळ मिळते, असे मतही मुख्यमंत्र्यांनी यावेळी व्यक्त केले.
शाश्वत विकासासाठी कॉर्पोरेट सोशल रिस्पॉन्सिबिलिटी (CSR) महत्त्वाचे
अफकॉन्सने केवळ आरोग्य क्षेत्रातच नव्हे, तर शिक्षण आणि महिला सक्षमीकरणासाठी देखील भरीव गुंतवणूक केली आहे. समाजातील वंचित आणि दुर्बल घटकांच्या जीवनमानामध्ये सकारात्मक आणि कायमस्वरूपी बदल घडवून आणण्यासाठी सीएसआर (CSR) उपक्रमांची भूमिका अत्यंत मोलाची ठरत असल्याचे मुख्यमंत्र्यांनी अधोरेखित केले. सार्वजनिक आणि खासगी क्षेत्रातील ही भागीदारी भविष्यात अधिक मजबूत करण्याचे आवाहनही त्यांनी यावेळी केले.