सिंधुदुर्ग: दोडामार्ग परिसरातील पशुपालक आणि शेतकऱ्यांसाठी अत्यंत दिलासादायक बातमी आहे. दोडामार्ग येथील राज्यस्तरीय पशुवैद्यकीय दवाखाना (श्रेणी-१) च्या नूतन इमारतीचे लोकार्पण राज्याचे मत्स्यव्यवसाय व बंदरे मंत्री तसेच जिल्ह्याचे पालकमंत्री नितेश राणे यांच्या शुभहस्ते उत्साहात पार पडले. या सुसज्ज आणि अद्ययावत इमारतीमुळे तालुक्यातील पशुधनावर योग्य वेळी दर्जेदार उपचार मिळण्याचा मार्ग मोकळा झाला आहे.
सुमारे ७३ लाख रुपये खर्चून उभारली अद्ययावत इमारत
दोडामार्ग येथील या पशुवैद्यकीय दवाखान्याचे बांधकाम सार्वजनिक बांधकाम विभाग, सावंतवाडी यांच्या देखरेखीखाली दर्जेदार पद्धतीने पूर्ण करण्यात आले आहे. या संपूर्ण प्रकल्पासाठी ७२ लाख ६८ हजार रुपयांचा निधी खर्च करण्यात आला आहे. सर्व आवश्यक सोयीसुविधांनी युक्त असलेल्या या इमारतीमुळे पशुपालकांना एकाच छताखाली विविध वैद्यकीय सेवा उपलब्ध होणार आहेत.
दोडामार्ग तालुक्यात शेतीसोबतच दुग्धव्यवसाय आणि पशुपालन मोठ्या प्रमाणावर केले जाते. मात्र, पुरेशा पायाभूत सुविधांच्या अभावामुळे जनावरांवर तातडीने उपचार मिळणे अनेकदा कठीण होत असे. आता या नवीन दवाखान्यामुळे जनावरांचे आजार, लसीकरण आणि आणीबाणीच्या प्रसंगी वेळेत उपचार मिळून पशुपालकांचे मोठे आर्थिक नुकसान टळणार आहे.
ग्रामीण भागातील विकासकामांना वेग
सिंधुदुर्ग जिल्ह्यातील ग्रामीण आणि दुर्गम भागातील पायाभूत सुविधांचा दर्जा सुधारण्यासाठी शासन सातत्याने प्रयत्नशील आहे. यापूर्वी पालकमंत्री नितेश राणे यांच्या हस्ते दोडामार्ग तालुक्यातील पिकुळे येथे नूतन तलाठी कार्यालयाचे लोकार्पण करण्यात आले होते, तसेच प्रशासकीय कामकाजात पारदर्शकता आणि सुलभता आणण्यासाठी सासोली येथे नूतन तलाठी कार्यालयाचे लोकार्पण देखील पार पडले आहे. महसूल विभागासोबतच आता पशुसंवर्धन विभागालाही सक्षम इमारत मिळाल्याने शेतकऱ्यांमध्ये समाधानाचे वातावरण आहे.
लोकार्पण सोहळ्यास मान्यवरांची उपस्थिती
या महत्त्वपूर्ण लोकार्पण सोहळ्यास जिल्हा परिषद अध्यक्ष प्रमोद कामत, जिल्हाधिकारी तृप्ती धोडमिसे, दोडामार्ग पंचायत समितीच्या सभापती पार्वती गवस, सावंतवाडीचे उपविभागीय अधिकारी वीरसिंग वसावे, पशुसंवर्धन उपायुक्त समीर बिलोलीकर, सार्वजनिक बांधकाम विभागाच्या कार्यकारी अभियंता पूजा इंगवले, दोडामार्गचे तहसीलदार राहुल गुरव तसेच सार्वजनिक बांधकाम उपविभागाच्या उपविभागीय अधिकारी सीमा गोवेकर यांच्यासह स्थानिक शेतकरी आणि नागरिक मोठ्या संख्येने उपस्थित होते.