मुंबई: भारतीय रंगभूमी आणि चित्रपटसृष्टीवर आपल्या दमदार आवाजाने व सशक्त अभिनयाने अधिराज्य गाजवणारे ज्येष्ठ अभिनेते नाना पाटेकर यांच्या निधनाने संपूर्ण महाराष्ट्र शोकाकुल झाला आहे. नाना पाटेकर यांच्या निधनाने भारतीय कलाविश्व, रंगभूमी आणि समाजकारणाचे कधीही भरून न येणारे नुकसान झाले आहे, अशा शब्दांत उपमुख्यमंत्री सुनेत्रा अजित पवार यांनी आपल्या तीव्र भावना व्यक्त करत त्यांना भावपूर्ण श्रद्धांजली वाहिली आहे.
कला आणि सामाजिक संवेदनशीलतेचा संगम
उपमुख्यमंत्री सुनेत्रा पवार यांनी आपल्या शोकसंदेशात म्हटले की, “नाना पाटेकर हे केवळ एक अद्वितीय आणि हरहुन्नरी अभिनेते नव्हते, तर त्यांच्या व्यक्तिमत्त्वात अभिनयाचा अस्सल गाभा आणि समाजाविषयीची अफाट संवेदनशीलता यांचा अप्रतिम संगम होता. रंगभूमीपासून मोठ्या पडद्यापर्यंत त्यांनी साकारलेली प्रत्येक भूमिका प्रेक्षकांच्या मनात कायमस्वरूपी कोरली गेली आहे. ‘नटसम्राट’, ‘क्रांतिवीर’, ‘परिंदा’ यांसारख्या अनेक अजरामर कलाकृतींमधील त्यांचा अभिनय नव्या पिढीसाठी नेहमीच दीपस्तंभ राहील.”
या दुःखद प्रसंगी संपूर्ण राज्यभरातून विविध क्षेत्रांतील दिग्गजांकडून शोक व्यक्त केला जात आहे. यापूर्वी नाना पाटेकरांच्या जाण्याने महाराष्ट्राचा बाणेदार आवाज हरपला; उपमुख्यमंत्री एकनाथ शिंदे यांनी वाहिली भावपूर्ण श्रद्धांजली आणि त्यांच्या योगदानाचा गौरव केला. तसेच नाना पाटेकर हे जनसामान्यांशी घट्ट नाळ असणारे अद्वितीय अभिनेते: राज्यपाल जिष्णू देव वर्मा यांनी वाहिली भावपूर्ण श्रद्धांजली अर्पण करून शोक प्रकट केला होता.
पवार कुटुंबीयांशी असलेले जिव्हाळ्याचे ऋणानुबंध
नाना पाटेकर आणि पवार कुटुंबातील कौटुंबिक स्नेहाची आठवण काढताना उपमुख्यमंत्री सुनेत्रा पवार अत्यंत भावूक झाल्या. त्यांनी सांगितले की, “नानांचे आदरणीय अजितदादांशी अत्यंत आपुलकीचे, प्रेमाचे आणि विश्वासाचे नाते होते. कौटुंबिक सुख-दुःखाच्या प्रत्येक वळणावर ते खंबीरपणे आमच्या पाठीशी उभे राहिले. त्यामुळे त्यांच्या जाण्याने झालेली हानी ही केवळ महाराष्ट्रासाठी नव्हे, तर आमच्या संपूर्ण कुटुंबासाठी अत्यंत वैयक्तिक आणि न भरून येणारी मोठी हानी आहे.”
शेतकऱ्यांसाठीचे ‘नाम फाउंडेशन’चे कार्य सदैव स्मरणात राहील
अभिनयाच्या सर्वोच्च शिखरावर पोहोचल्यानंतरही नाना पाटेकर यांनी जमिनीशी असलेली नाळ कधीही तुटू दिली नाही. महाराष्ट्रातील दुष्काळग्रस्त शेतकरी बांधव आणि वंचित घटकांच्या मदतीसाठी त्यांनी मकरंद अनासपुरे यांच्यासमवेत सुरू केलेल्या ‘नाम फाउंडेशन’चे कार्य अद्वितीय आहे. जलसंधारण, बंधारे निर्मिती आणि शेतकऱ्यांच्या आत्महत्या रोखण्यासाठी त्यांनी घेतलेले परिश्रम कायम प्रेरणादायी ठरतील, असेही सुनेत्रा पवार यांनी नमूद केले.
कलाक्षेत्रासह सामाजिक बांधिलकी जपणारे हे लाडके व्यक्तिमत्त्व आता काळाच्या पडद्याआड गेले असून, त्यांच्या अंत्यविधीबाबत सर्व स्तरातून शोकभावना उमटत आहेत. ज्येष्ठ अभिनेते नाना पाटेकर यांच्यावर डोणजे येथे शासकीय इतमामात अंत्यसंस्कार; राजकीय, सामाजिक आणि कला क्षेत्रातील मान्यवरांकडून भावपूर्ण श्रद्धांजली वाहण्यात आली आहे.