पुणे जिल्ह्यातील औद्योगिक आणि माहिती तंत्रज्ञान क्षेत्राची ओळख असलेल्या चाकण आणि हिंजवडी परिसरातील पायाभूत सुविधांना मोठा दिलासा देणारा निर्णय राज्य शासनाने घेतला आहे. चाकणमधील रस्ते, पाण्याचा निचरा आणि वाहतूक सुधारणेसाठी १ हजार ४०० कोटी रुपये, तर हिंजवडीतील वाहतूक कोंडी सोडवण्यासाठी ४२६ कोटी रुपयांच्या एकात्मिक पायाभूत विकास आराखड्यास मुख्यमंत्री देवेंद्र फडणवीस यांनी तत्वतः मंजुरी दिली आहे.
सह्याद्री अतिथीगृहात पार पडलेल्या उच्चस्तरीय बैठकीत पुण्याचे जिल्हाधिकारी जितेंद्र डुडी यांनी या आराखड्याचे सादरीकरण केले. यावेळी नगरविकास राज्यमंत्री माधुरी मिसाळ, मुख्य सचिव राजेश अग्रवाल यांच्यासह विविध विभागांचे वरिष्ठ अधिकारी उपस्थित होते. चाकण आणि हिंजवडीतील या प्रकल्पांची प्रत्यक्ष अंमलबजावणी डिसेंबरपासून सुरू करण्याचे नियोजन असून, पुढील पावसाळ्यापूर्वी नागरिकांना याचे दृश्य परिणाम दिसून येतील, असा विश्वास प्रशासनाने व्यक्त केला आहे.
हा प्रकल्प पुणे आर्थिक क्षेत्राचा महाविस्तार: २०३६ पर्यंत २२० अब्ज डॉलर अर्थव्यवस्थेचे लक्ष्य साध्य करण्याच्या दृष्टीने अत्यंत महत्त्वपूर्ण ठरणार आहे.
चाकण औद्योगिक परिसरातील ७८ किमी नाल्यांची स्वच्छता
पावसाळ्यात चाकण एमआयडीसी परिसरात पाणी साचून उद्योग आणि वाहतूक ठप्प होण्याच्या समस्येवर कायमस्वरूपी तोडगा काढण्यात येणार आहे. सुमारे ७८ किलोमीटर लांबीच्या नैसर्गिक नाल्यांवरील अतिक्रमणे हटवण्याचे काम ७० ते ८० टक्के पूर्ण झाले असून, उर्वरित काम जून २०२७ पर्यंत पूर्ण करण्याचे उद्दिष्ट आहे. यासोबतच ३८ किलोमीटर लांबीची पावसाळी गटार व्यवस्था, पुलांची क्षमतावाढ आणि पाणी साठवण तलावांची निर्मिती करण्यात येणार आहे.
७५ किलोमीटर रस्त्यांचे होणार आधुनिकीकरण
चाकणमधील एकूण ४९८ किमी रस्त्यांपैकी अत्यंत महत्त्वाच्या पहिल्या टप्प्यातील ७५ किलोमीटर रस्त्यांचे सुधारणा काम तातडीने हाती घेतले जाणार आहे. यात भूसंपादनाची गरज भासणार नसून उपलब्ध रस्त्यांच्या जागेचा पुरेपूर वापर केला जाईल:
- पादचाऱ्यांसाठी स्वतंत्र मार्ग: कामगारांच्या सुरक्षेसाठी स्वतंत्र पादचारी मार्ग, सुरक्षित रस्ता ओलांडण्याची यंत्रणा उभारली जाईल.
- सार्वजनिक वाहतुकीला बळ: पुणे आणि पिंपरी-चिंचवडमधून येणाऱ्या कामगारांसाठी सुमारे ५०० अतिरिक्त बसेसचे नियोजन करण्यात येणार आहे, ज्यामुळे रस्त्यावरील खासगी वाहनांचा ताण कमी होईल.
- स्मार्ट ट्रॅफिक सिस्टीम: परिसरातील ६ प्रमुख चौकांची फेररचना, अनधिकृत कट बंद करणे, आणि कृत्रिम बुद्धिमत्ता (AI) आधारित सिग्नल यंत्रणा, सीसीटीव्ही व रडार बसवले जातील.
राज्यातील सर्वसमावेशक सुधारणांवर भर देत असताना विकासाच्या बाबतीत महाराष्ट्र देशात नवा आदर्श निर्माण करेल – मुख्यमंत्री देवेंद्र फडणवीस यांचा विश्वास या निर्णयाच्या माध्यमातून पुन्हा एकदा अधोरेखित होतो.
हिंजवडी आयटी पार्कसाठी ४२६ कोटींचा आराखडा
हिंजवडी आयटी हबमधील वाहतूक कोंडी सोडवण्यासाठी ४२६ कोटी रुपयांच्या विशेष आराखड्यास मान्यता देण्यात आली आहे. या आराखड्यानुसार खालील कामे होणार आहेत:
- हिंजवडीतील विजेची समस्या कायमस्वरूपी मिटवण्यासाठी ६ एकर जागेत वीज उपकेंद्र उभारण्यात येणार आहे.
- वाहतूक शिस्तीसाठी महाराष्ट्र सुरक्षा दलाचे (MSF) १०० जवान तैनात केले जातील.
- घनकचरा व्यवस्थापनासाठी पिंपरी-चिंचवड किंवा पुणे महानगरपालिकेमार्फत कचरा संकलन यंत्रणा कार्यान्वित केली जाईल.
विविध विभागांमध्ये समन्वय साधण्याचे निर्देश
एमआयडीसी, पीएमआरडीए, सार्वजनिक बांधकाम विभाग आणि जिल्हा परिषद या सर्व यंत्रणांनी निधी व नियोजनात परस्पर समन्वय ठेवावा, असे निर्देश मुख्यमंत्र्यांनी दिले आहेत. याशिवाय चाकण व हिंजवडीत पार्किंग समस्या दूर करण्यासाठी एमआयडीसीने उपलब्ध करून दिलेल्या पार्किंग जागांचा पूर्ण क्षमतेने वापर केला जाईल, ज्यामुळे रस्त्यांवर होणारे अनधिकृत पार्किंग थांबेल आणि वाहतूक सुरळीत राहण्यास मदत होईल.